گونتای گنجآلپ
(بیرینجی یازی)
یوخسول بیر تورک عایله سینده دوغولموش حوسام الدین فرضی زاده. چوخ اؤنملی و دَیرلی بیر کیتاب یازمیشدی. ایران شیعه رئژیمی نین ایدئولوژی تمللرینی کؤکوندن سارسیدان و درین آراشدیرمایا دایانان بیر کیتاب یازمیشدی فرضیزاده. بو گنج و ایستعدادلی آدام یازدیغی کیتابی اوزوندن توتوقلاندی. اعداما محکوم ائدیلدی. بو سیرالاردا اونون فارسجا یازدیغی کیتابلا من تانیش اولدوم. کیتابی اوخویوب بیتیردیکدن سونرا حئیرت ائتدیم. بو یاشدا بئله کیتاب یازماق هر کسین ائده بیله جگی بیر ایش اولا بیلمز دئیه دوشوندوم. کیتابی تورکجه لره ترجومه ائدیب آزربایجاندا و تورکییه ده یاییملاتدیم. اؤزللیکله تورکییه افکاری-عمومیسی فرضی زاده نین حاققینی ساوونماق اوچون چوخ آکتیو اولدو. تورکییه نین تانینمیش آیدینلاری، قلم صاحیبلری مسجیدلرده، ت و-لرده فرضی زاده حاققیندا دانیشدیلار. چوخ ماراقلی بیر حادیثه یه شاهید اولدوم. بوتؤو آزربایجان دئیه اؤزونو ییرتان آزربایجان جومهورییتی نین تانینمیش ضیالیلاریندان بیری ده بو حاقدا بیر آچیقلاما وئرمه دی. بیر حالداکی فرضی زاده کیتابینی تورکجه یازا بیلمه دیگی اوچون اثری نین اوولینده تورک میللتیندن عوزر ایسته میشدی. حتّی ایکی ایل اؤنجه چاپ اولان و اون مینلرجه اینسان طرفیندن اوخونان فرضی زاده نین کیتابی و دوشونجه سی حاقدا ایراندا تورکلرین حاقلارینی ساوونان اینفورماسیون اوداقلاری دا هئچ بیر آچیقلاما وئرمه دیلر. اویسا اونون کیتابیندان پارچالار ت و-لرده، دیگر بیلگی پایلاشیم اوداقلاریندا پایلاشا بیلردیلر. رئژیمین اینانج دیوارلارینی اوچوران بو گنج حاققیندا بیر کیمسه بیلگی وئرمه دی. اویسا کی، فرضی زاده آوروپادا بؤیوک اینتئلئکتوال شخصیتلرین باشلاتدیقلاری آیدینلانما حرکتینی ایراندا باشلادان بیر جاوان اوغلاندیر. آیدینلانما اولمایاجاقسا، هانسی میللی حرکتدن دانیشماق اولار؟
اولوسلار آراسی باسقیلار اوزرینه ایران شیعه رئژیمی فرضی زاده نی نین اعدامینی دوردوردو. ایران محکمه سی اعدامی دوردورماق آماجی ایله فرضی زاده نین پسیکولوژیسی ایله ایلگیلی طیببی بلگه حاضیرلامیشدی. محکمه نین ایسته گی اوزرینه ایراندا دوکتور اونونلا باغلی طیببی راپور یازیر. اؤزللیکله بو سیرالار ایران دؤولتی برجام مسئله سی ایله باغلی غربله سیخ دانیشیقلار آپاریردی. بیر کیتاب یازدیغی اوچون بیر گنج آدامی اعدام ائتمکله برجام موقاویله سی نین تهلوکه یه گیرمه سینی ایسته میردی. آمما عقلی دنگه سی یئرینده اولمایان آدام بئله بیر کیتاب یازا بیلردیمی؟
فرضی زاده بیردن “میللی” حرکتچیلر طرفیندن کشف ائدیلیر. اونو تئلئویزیونا چیخاریرلار! لاکین تئلئویزیوندا اونون یازدیغی کیتاب حاققیندا بیر جومله ده سورمورلار. حیاتینی قورتاما پئشینده چاره سیز دورومدا بولونان فرضی زاده دن دوشونجه سی حاقدا بیر تک سوال دا سوروشولمور. سنی نییه توتوقلاییب اعداما محکوم ائتمیشدیلر سوآلینی هئچ سوروشمورلار. کیتابیندا نه لر وار دئیه سورولمور. تجروبه سیز بو گنج آدامی دئدی-قودو پیسلیگی ایچینه سوخاراق اونو دئهومانیزه ائدیرلر. بیر دوشونجه آدامی جاوان اوغلان بیردن اؤزونو سه وییه سیز صؤحبتلرین ایچینده بولور. اونا یاردیم ائتمه یئرینه، حیاتینی داها دا بدبخت دوروما سوخورلار. گویا تورکییه دن اونو سینیر دیشی ائتدیرن تورکییه ده یاشایان گونئی آرزبایجان* تورکلریمیش! گویا تورکییه ده دؤولت یوخدور و تورک پولیسی گونئیلی* ۵-۴ تورکون فتوالاری ایله چالیشیرمیش. دئیه لیم کی، بونلار دوغرودور. یعنی تورکییه ده کی پولیس سیستئمی{ایرانلی}بیر نئچه تورکون امرینه تابئعدیر. ائی فرضی زاده نی ت و-یه چیخاران آداملار، بوندان سیزه نه؟ سیز فرضی زاده نین کیتابی چاپ اولان بو ایکی ایل عرضینده اونون اثری حاققیندا بیلگی وئردینیزمی؟ وئرمه دینیز. کیتابیندان بؤلوملر تاماشاچیلارا چاتدیریب خالقین ایچینده بئله ضیالی بیر گنجین اولدوغونو سؤیله دینیزمی؟ سؤیله مه دینیز. او زامان هانسی اخلاقی یئتکی ایله هئچ بیر شئیدن خبری اولمایان بو گنج آدامی چیخاریب ت و-ده خالقا سئویمسیز گؤرونتولرله تانیتدیریرسینیز؟ اؤنجه بو گنجین کیم اولدوغو، هانسی دوشونجه یه صاحیب اولدوغونو خالقا چاتدیرماق اوچون یازدیغی اثر حاققیندا بیر موصاحیبه تشکیل ائتمه نیز گرکمزمی ایدی؟ آدامین اینتئلئکتوال شخصیتی حاققیندا هئچ بیر بیلگینیز و اوخوموشلوغونوز یوخکن، حیاتدا قالا بیلمک اوچون اونا-بونا مؤحتاج اولان کیمسه سیز بیر جاوانین علمی شخصیتینی محو ائتمک دوغرو متدمودور؟ ایسلام جومهورییتی نین زیندانیندا مین تور عذاب و ایشکنجه گؤرموش بیر جاوان. اؤنونده بؤیوک بیر اومیدسیزلیک و کیمسه سیزلیک. سادجه بیر کیتاب یازدیغی اوچون آنکارا کوچه لرینده یاتیب اومیدسیزلیک ایچینده قیوریلان بیر گنج آدام. فرضی زاده نین ایستعدادینی دونیایا تانیتدیرماق یئرینه، اونو دئدی-قودو و سه وییه سیزلیک اورتامینا سوخوب دئهومانیزه ائتمک دوغرودورمو؟ ت و-ده یازدیغی کیتاب حاققیندا بیلگی وئریلسه، یا دا بو حاقدا اونونلا علمی بیر موصاحیبه آپاریلسا دونیامی داغیلار؟ بونو ائده مزسینیز. ندن ائده مزسینیز بیلیرسینیزمی؟ چونکو بونو ائتمک اوچون بیر گون زامان آییریب اونون کیتابینی اوخومالیسینیز. کیتابینی اوخورسانیز حئیرت ائدر، هیدایت اولار و دئدی-قودو ائتمه یه زامانینیز قالماز، طلرانسلی داورانارسینیز.
سون اولاراق فرضی زا ده نین ایشی ایله مستقیما مشغول اولان بیری گیبی سؤیله مم گرکیر کی، اونون تورکیه دن دئپورت ائدیلمه سینده هئچ بیر ایران وطنداشی نین تأثیری اولمامیشدیر. کمیسر پلیس دئمیشدیر کی، دئپورت ائتمه مم اوچون اوست مقامدان منه یازیلی بلگه گلمه لیدیر، چونکو منیم الیمده اولان قانونلار بو بلگه لری ایله فرضی زاده نین دئپورت اولماسینی گرکدیریر.
رژیم طرفیندن سخیشدیریلان، حیات ایمکانلاری الیندن آلینان اومیدسیز و تجروبه سیز بیر گنجی باشقالاری ایله حسابلاشماق اوچون قوللانماق مردجه بیر داورانیش دئییلدیر. اونا یاردیم ائتمک ایمکانینیز وارسا، ائدین. یوخدورسا بوراخین و باشینا آنلامسیز و گرسیز دردلر ده سیز یوکله مه یین.
*****
بو یازینی یازمیشدیم آنجاق یایماق فیکریم یوخ ایدی. بو مسئله یه قاریشماق ایسته میردیم. بو گئجه فرضی زاده ایله دانیشدیم و چوخ اوزولدوم. بو اوزدن هم بو یازینی یایماغا قرار وئردیم، هم ده باشقا ایکینجی بیر یازی یازاجاغام…

—————
ایضاحات: یازینین اصلینده «ایران توروکو» ایشلنمیشدیر لاکین آرازنیوز بو قاورامی ایشلتمه دیگی اوچون اونون ائدیت ائدیب «گونئی آزربایجان» یازمیشدیر.