حوسام الدین فرزیزاده نئجه دیپوورت ائدیلدی؟ – گونتای گنجآلپ
حوسام الدین فرزیزاده چوخ گنجکن بؤیوک دوشونجه‌لرله اوغراشان بیر ایران وطنداشی تورکدور. اونون فارسجا یازدیغی اؤنملی کیتابینی چوخ آدام اوخومامیشدی. من اونو اوخویوب تورک دیلینه ترجومه ائتدیم. آزربایجاندا و تورکییه ده چاپ اولان کیتاب اوخوجو کوتله‌سی‌نین تقدیرینی قازاندی. بو کیتابی یازدیغی اوچون ایراندا اعداما محکوم ائدیلمیشدی. کیتابی یاییلدیقدان سونرا تورکییه وطنداشلاری ۱۵ مین ایمضایلا ب م اینسان حاقلارینی شؤعبه‌سینه موراجیعت ائده‌رک اونون اعدامینین دوردورولماسی یولوندا یاردیمچی اولمالارینی ریجا ائتدیلر. عینی زاماندا ایرانین تورکییه‌ده‌کی سفیرلیگینه بیر چوخ تورکییه وطنداشلاری مکتوب یازاراق فرزیزاده‌نین اعدامینین دوردورولماسینی ایسته‌دیلر. فرزیزاده‌نین اعدامی ایراندا دوردورولدو. ایراندا قانونی دوکتور اونون دلی اولدوغو، عقلی دنگه‌سی‌نین یئرینده اولمامادیغی، پسیکولوژیک سورونلاری اولدوغویلا باغلی راپور یازاراق اعدامینی دوردورموش و زینداندان بوراخمیشدیلار. بوتون دوسیالارینی بیر یئره توپلاییب تورکییه‌یه گئدن فرزیزاده آنکارادا ب م قاچقینلار اوفیسینه باش وورور. ایراندا رسمی دوکتورون یازدیغی دلیلیک راپورونودا ب م یئتکیلیسینه تقدیم ائدیر. ب م اونا باش وورانلارین دوسیاسینی تورکییه پولیسینه وئرر و بو بوتون قاچقینلار ا وچون کئچرلیدیر. تورکییه پولیسینه گئدن فرزیزاده دوسیاسی‌نین اوزرینده پولیس اونون دلیلیگی و عقلی دنگه‌سی‌نین یئرینده اولماماسییلا باغلی بلگه‌نی گؤرور. تورکییه قانونلارینا گؤره بئله بیر آدام وطنداشلارینا ضرر وئرر دئیه اؤلکه‌ده اوتورما ایزنینه صاحیب اولا بیلمز. بو اوزدن تورکییه پولیسی فرزیزاده‌یه اؤلکه‌دن چیخماسی ا وچون بیر آی واخت وئریر.
تورکییه‌ده اولدوغوندا فرزیزاده منی آرادی. اونون تورکییه‌ده اولدوغونو اؤیرندیکدن سونرا تورکییه‌ده بعضی قوروملارا زنگ ائدرک فرزیزاده‌یه یاردیم ائتمه‌لرینی ریجا ائتدیم. فرزیزاده آنکارادا قالدیغی دؤرد گون بویونجا بیر مسجیدین حیطینده یاتدیغینی منه سؤیله‌دی. منیم خواهیشیم اوزرینه ایستانبولداکی بیر قوروم باشقانی اؤزل آراباسینی شوفؤرو ایله آنکارایا یوللادی. فرزیزاده‌نی آنکارادان ایستانبولا آپاریب بئش اولدوزلو بیر هوتئله یئرلشدیردیلر. پولیسه ده باش ووراراق ب م-نین اونو باشقا اؤلکه‌یه یوللایاجاغی سوره‌ده تورکییه‌ده قالماسی اوچون یاردیمچی اولماسینی ایسته‌دیلر. لاکین پولیس، قانونلاری گؤستررک بونون مومکون اولمایاجاغینی بیلدیرر و وئریلن بیر آی سوره دولدوغوندا فرزیزاده‌نین اؤلکه‌نی ترک ائتمه‌سی گرکدیگینی سؤیله‌رلر. بیر آی سوره دولور، آنجاق فرزیزاده تورکییه‌نی هله ترک ائتمه‌میش. بیر پولیس مأمورو فرزیزاده‌نی گؤتوروب ایران سینیرینا قدر آپاریر و اورادان ایرانا بوراخیر. فرزیزاده‌نین تورکییه‌دن سینیر دیشی ائدیلمه ماجراسی بو شکیلده اولموشدور.
۰۷/۳۱/۲۰۱۷
