احمد اوبالی نی مناظره یه چاغیریرام

احمد اوبالی جوما گئجه سینده کی شووندا بیر داها مسندسیز ادعالارینی تکرارلاییب اؤزونه خاص لمپن دیلی ایله مخاطب لرین شعورونا توهین ائدرجه سینه بوش و قورو افترالار آتدی.

حسام الدین فرضی زاده آدلی شخصین ادعالاری حاققیندا البته قیسا زاماندا سندلی ایضاحیمیزی یایاجاغیق کی ملت اؤزو قرار وئرسین.

احمد اوبالی داخیل ده و خاریج ده بیر چوخ علاقه سیز شخص و اولایی بیر بیرینه باغلایاراق ذهنینده یاراتدیغی سناریونو پرده له دی و هئچ دوشونمه دی کی بو داخیل ده کی انسانلارا نئجه امنیتی ریسکلر یارادیر. ذاتا بو ایشده تجروبه سی وار.

چوخ ایلگینج دیر کی بو شخص اؤزونو دوغرولوق، وطن سئورلیک، وجدان و انسان سئورلیک آبیده سی بیلیر و باشقالارینین اینانج و اراده سینی اؤز ترازیسینه گؤره اکسیک و آز گؤرور.

هر حالدا مادام کی احمد اوبالی بو قدر دوزلوکدن و شفافلیقدان دم وورور من شخص اولاراق اونو مناظره یه چاغیریرام. بو مناظره اونون ترجیح ائتدیگی هرهانسی مئدیا قورولوشوندا اولابیلر. مادام دئییر من دیرنیشچی لری گوناز تی وی یه قویمارام بویورسون آراز نیوز تی وی ده و یا هانسی مئدیا اورقانینی او ایسته سه اوردا آچیق آچیق دانیشاق.

قویاق میلی وجدان قضاوت ائله سین.

سایقیلاریملا
مجید جوادی

۲۸٫۰۷٫۲۰۱۷