تبریز اطلاعاتینین آزربایجان میلی حرکتینه قارشی آچیدیغی “آذریها” وب سیته سی اودغونا اودغونا تهراندا شهریار آغیرلاما تورنینده “مرگ بر آمریکا” باشلیقلی شعرینی بهانه ائدرک میلی فعالاری  اوزلیکله  تانینمیش فعال مهدی بئی نعیمینی یابانجی آژانلار آدلاندیریب.
“آذریها” اؤزو ایران ایطلاعتینا باغلی اولدوغو اوچون هر کسی بیر آژان گورور کیمیسی اوزونه تورک دئیر پان تورک اولور کیمیسی یاشاسین آزربایجان دئیر تورکیه جاسوسو اولور
آرتیق بو ساچما سوزلره کیمسه اینانمیر” آذریها” سایتی او قده ر عیرقیچیلیق هاواسینی بوغولوب کی “مرگ بر آمریکا ” شوعارینا قارشی بیر شعری آمریکایا قارشی گورو!
“دئ مرگ بر آ مریکا” شعری آزربایجانین تانینمیش شاعری شهرک میرزا طرفیندن یازلیب و شهریار آغیرلاما مراسیمینده اوخونموشدور.

دئ مرگ بر آمریکا-شهرک میرزه

ایشین ترسه دوشنده آشین یاغلی پیشنده توچال، اوشون فشمده دئ مرگ بر آمریکا

اوشاق سؤزه باخماسا آرواد سندن قورخماسا موسته جیرین چیخماسا دئ مرگ بر آمریکا

یوخودان تئز دورماسان واختیندا کارت وورماسان ماشینی دوز سورمه سن دئ مرگ بر آمریکا

مانقالی یاندیراندا باده¬نی قالدیراندا بوغلارینی بوراندا دئ مرگ بر آمریکا

ساز و آواز یئرینه راز و نیاز یئرینه بئش واخت ناماز یئرینه دئ مرگ بر آمریکا

مئیدان وئرک سویغونا ییخاق شاهین بوینونا حواله اونا بونا دئ مرگ بر آمریکا

داروخانا مئیخانه مئیخانه خانه-خانه شام، ناهار، صوبحانه دئ مرگ بر آمریکا

قلمی قلم ائیله دیلی قلع و قمع ائیله نه غوصه نه غم ائیله دئ مرگ بر آمریکا

اوزون گئدنی اؤلدور زیندانلارینی دولدور شوکوفه لری سولدور دئ مرگ بر آمریکا

بیداد ائلیر اعتیاد برباد ائو اوشاق، آرواد سن اؤزونو ده آلدات دئ مرگ بر آمریکا

جاوان قالمیر؟ جهنم اوزو گولمور؟ جهنم شادلیق اولمور؟ جهنم دئ مرگ بر آمریکا

آزادی بیان یوخ آبرین یوخ، حیان یوخ هئچ حئسابا قویان یوخ دئ مرگ بر آمریکا

یارین ساچین هؤرنده هر ساعاتدا، هر آندا کوچه ده ایت هورنده دئ مرگ بر آمریکا

قاتیر تپیک ووراندا نوختاسی نی قیراندا ائششگین آنقیراندا دئ مرگ بر آمریکا

طبعین تنبلله ننده بارالار بلله ننده قولتوغون یئلله ننده دئ مرگ بر آمریکا

شیرین جایزه آلسا فرهاد آجیندان اؤلسه البرادعی گلسه دئ مرگ بر آمریکا

دیلیوی باغلاسالار دیلچی نی ساخلاسالار حاققی ناحاقلاسالار دئ مرگ بر آمریکا