مهرین 19-و اولوسلارآراسی “قیز اوشاغی” گونودور. همین موناسیبته گوره ” عدالت برای ایران” تشکییلاتی ایراندا قیز اوشاقلارینین عره وئریلمه سی حاقدا ببر راپور حاضیرلاییب. راپورد…ا یئر آلمیش آمارلارا گؤره آذربایجان اوستانلاریندا قیز اوشاقلارینین عره وئریلمه سی نه اینکی آز دئییل، بلکه ایرانین اورتالاماسیندان دا چوخدور. ایرانین آمار و ثبت احوال مرکزیندن آلینان آمارلارا گؤره، 1390-جی ایلده، اردبیل اوستانی ایراندا بیرینجی یئری توتاراق 1411 مورد اون یاشدان آشاغی ایزدیواج ثبت ائله ییب. بو رقم سونراکی اوستان یعنی خوزستانین آماریندان 67 دفعه/ برابر چوخدور. شخصا اینانسام دا کی، اردبیل اوستانی حاقدا وئریلن بو آماردا یانلیشلیق اولوب، اما اونا باخمایاراق، تبریز و اورمیه اوستانلای دا ایرانین باشقا اوستانلاری آراسیندا ان بیرینجی یئرلری توتوبلار.

عمومی تصوور بئله دیر کی قیز اوشاق لارینین عره وئریلمه سی مسئله سینده ایرانین وضعیتی منطقه ده اؤلکه لره (افغانیستان و پاکیستان و …) ایله موقاییسه ده و ایران ایچینده ایسه گؤنئی آذربایجانین دورومو داها یاخشی اولسون. اما بو آمارلار بونون ترسینی گؤرسدیر. بئله کی، هم ایرانین او اؤلکه لر له هئچ فرقی یوخدور و هم ده آذربایجان اوستانلارینین بو حاقدا وضعیتی، داها دا پیس دیر. افغانیستان و پاکیستاندا قانون اولاراق، ائولنمه یاشی قیزلار اوچون 16 اولسا دا، ایراندا 13 دیر. بونونلا یاناشی ایراندا حتی 13 یاشدان اوشاقلاری دا محکمه نین ایزنی و دده نین ریضایتی ایله عره وئرمک ممکوندور. بو یعنی، قیز اوشاغینا تجاووزون قانونی لشمه سی.

شوبهه سیز بو وضعیته جاوابده اولانلارین بیری ده آذربایجان قادین حرکاتی دیر. بوتون ایددیعالاریمیزا رغمن، گؤرولن بودور کی نه اینکی، قادینلاریمیزین وضعییتنده نه اینکی فرقلی دئییلیک، بلکه بیر آز دا دالی ییق. بونا گؤره قادین فعاللاریمیز، میللی فعاللاریمیز هرکسدن آرتیق بو مسئله نی اؤنمسه ییب و اویانیش یاراتمالیدیرلار.بیر قادین اولاراق اؤز 8- 10-12-14 یاشلاریمیزی خاطیرلاییب و بیردن عره وئریلمه ییمیزی تصوور ائدک. قاپی دا- قونشودا، کوچه ده ، شهریمیز ده اولان معصوم قیز اوشاقلارینی دوشونک کی، اؤز والدین لرینین جهالتینه قوربان گئدیرلر. 10 یاشیندا بیر قیزی دوشونک کی، ایزدیواج آدی ایله قانونی، عورفی و یا شرعی بیر تجاووزه معروض قالیر. اؤزوموزو، باجیمیزی اونون یئرینه تصوور ائدیب، اونا قارشی موباریزه یه باشلامالییق. بو ایشین هر نه آد آلتیندا اولور اولسون ، کثیف و قیری اخلاقی ایش اولماسیینی دئمه لی و توپلولوموموزو حساس ائتمه لی ییک. ذاتا بو مسئله کیچیک شهرلرده کی جاماعات بیر بیرینی تانییر، باش وئریر. اونا گؤره خالق آراسیندا حساسیت یاراتماقلا، بو ایشی قانونی اولسا دا، قارشی سی آلینا بیلر.
بو آماجلا، “دونیا قیز اوشاغی گونو” نو دیرلندیریب، الده اولان ایمکانلاریمیزلا، فیس بوکدا، توییتر ده بو حاقدا آکتیو اولمالی ییق.