گونئی آزربایجان میللی حرکتی  گونئی آزربایجان تورکلرینین میللی کیملیکلرینی قوروماق و اونلارا داها رفاهلی بیر گلجک وعدی ایله اؤز مبارزه سینی قاباغا آپاریر. بو ساحه ده سیاسی، توپلومسال و کولتورل اولاراق مبارزه مئتدلاری گلیشدیریر.

میللی حرکتین کولتورل قولو تاریخسل اولماسینا باخمایاراق، میللی حرکتین ان آخسایان قولو دور. دونیا دئییشدیکجه، کولتور آلانی گئنیشلمکده و مبارزه اوچون داها چتین شرایط یارانماقدادیر. کولتور اورتیمی، بیر اولوسون وارلیغینا سورکلیلیک قازاندیریر. توپلوملار، اولدوقلاری قوشوللاردا وارلیقلارینی دوام ائتدیرمک اوچون کولتور اوره تیرلر. کولتور اورتیمی سونوجوندا، بیر طرفدن اؤز میللی کیملیکلرینی درینلشدیریرلر، دیگر طرفدن ایسه باشقا میللت و توپلوملارین کولتورلرینده اریمکدن اؤزلرینی قورورلار. چونکو، توپلوملار کولتورسوز یاشایامازلار. اگر زامان قوشوللارینا دایاناراق اؤز کولتورلرین یارادابیلمه سه لر، باشقا کولتورلر اونلاری اؤز ائتکیسی آلتینا آلیر.

کولتور توپلوملارین روحونون داشیییجی سیدیر. ایندی ایسه، مسئله یه گونئی آزربایجان آچیسیندان باخدیغیمیزدا داها نئت بیر گؤرونتو الیمیزده اولاجاقدیر. گونئی آزربایجان-ین میللی و رسمی بیر دولتی اولمادیغی اوچون کولتورو اورتن گوج مکانیزمالاریندان یوخسوندور. گونئی آزربایجان تورکلری، کولتورلرینی اؤز غیر رسمی چابالاری ایله دوام ائتدیرمه یه چالیشیرلار. اما، گوج مکانیزمالاریندان یوخسون اولدوغو اوچون، بونو گرچکلشدیرمکده چتینلیکلر چکیرلر. آزربایجان میللی حرکتی و میللی فعاللار، مسیونلاریندان بیریسی ائله بو کولتور اورتیمی و سورکلیلیگینی ساغلاماقدیر. چونکو میللی حرکتین مبارزه ماهیتی نین اساسلاریندان بیریسیری، گونئی آزربایجان تورکلرینین کولتورونو دیری توتماقدیر.

کولتورون ان اؤنملی عنصرلاریندان بیریسی و اونا سورکلیلیک قازاندیران اؤیه سی شبهه سیز دیلدیر. دیل، کولتورون بئل سومویودور. چونکو دیل، کولتورون سوموتلاشماسینی ساغلار و اونا عینیت وئریر. اونا گؤره دیر کی گونئی آزربایجان تورکلری ده دیل مسئله سینه بو قدر اؤنم وئریرلر. تورک دیلینده یازماق و یاراتماق، کولتور ساواشیندان بیزیم اساس آراجلاریمیزدان اولماسی گرکیر. تورک دیلینده تکجه شعر، حیکایه و رومان یازماقدان سؤز گئتمیر بورادا. بیز گرک اوخودوغوموز بوتوت آلانلاردا، تورک دیلینده اثرلر یاراداق. تورک دیلینین بیلیمسللیگینی یاشاتماق اوچون، بیلیمین بوتون ساحه لرینده، بو دیل ایله یازمامیز گرکیر. سیاسی و اجتماعی دیرلندیمه لریمیز ده گرک تورک دیلینده اولسون. چونکو اگر بیز کولتورون دیل ساحه سینده باشاریسز اولارساق، دیگر ساجه لری قازانمامیز دا چتین اولاجاقدیر.

منبع: تبریزسسی