آرازنیوز امکداشلاری نین اوغوز ارگنکون بایرامی موناسیبتلی ایله تبریکی
بؤیوک تورک میلتی:
اوغوز بایرامینی سیزه تبریک ائدیب و قارشی دان گلن بو یئنی ایلده تورک میلتی و وطنیمیز آزربایجانا بؤیوک غلبه لر، و باشاریلار دیله مه یی اؤز بورجوموز بیلیریک.
کئچن ایل آزربایجان اوچون باشاریلی ایل اولماسی ایله بیرلیکده، بیر چوخ دا میلتیمیزی اوزن اولایلارلا دولو ایل اولموشدور. دوشمنه قارشی و آماجلاریمیز اوغروندا میلی بیرلییه دوغرو بؤیوک آددیملار آتیب و میلی آماجلاریمیز اوغروندا بؤیوک باشاریلار الده ائتدیک. تورپاغیمیزا گؤز تیکن لره قارشی دئموکراتیک یوللارلا بؤیوک ظفرلر قازاندیق. موباریزه ده یئنی تجربه لر قازاندیق و میلی قورتولوش آماجیمیزا داها یاخینلاشدیق. دوست گؤرونوملو بیر چوخ دوشمنین داها ماسکالارینی اوزلریندن سالیب، دوست ایله دوشمنین جبهه سی و فرقی داها آیدینلاشدی. سیاسال، کولتورل، بیلیمسل، دوشونجه سل و توپلومسال اولاراق بیر چوخ تجروبه الده ائتمه یی باشارا بیلدیک و آزربایجان میلی حرکتی اولاراق موباریزه صفلریمیز داها سیخلاشدی.
نه قدر دوشمنین بیزه قارشی آپاردیغی غدارلیغی و چیرکین لییی چوخالسادا، بیزده میلت و وطن اوغروندا موباریزه و فعالیت عزم و اراده سی ده، گوجله نیب و محکملشدی. آرتیق دوشمنه آلدانماماق و اونون توخودوغو تورلارا دوشمه مک بیزده بیر دیرلی تجروبه و غایه یه چئوریلدی. موباریزه دوستلاریمیزا گوون داها چوخالیب و آزادلیق سئوگی سی و ایسته یی بیزده داها بلیرگین و درین بیر حالت قازاندی. اؤزوموزه گوو ه ن و یولوموزا اینام میلی فعاللاریمیز اوچون بیر ده یره و معیارا چئوریلدی.
کئچن ایل بیر چوخ ده یرلی شخصیتلریمیزین ده ایتیرمه سی ایلی اولدو. قاراباغ جبهه سینده شهیدلر وئردیک. بیر نئچه ده یرلی عزیزلریمیزی فارس شوونیزمی گیروو توتدو. دوشمنلر طرفیندن وطنیمیز آزربایجان و تورک میلتیمیزه قارشی بیر چوخ فتنه و فساد حیاتا کئچیب و میلی وارلیغیمیزا ضربه لر وورولدو. تورک دونیاسینا قارشی تورک دوشمنلرینین صفلری داها سیخلاشدی.
بوتون بونلارا باخمایاراق بیزده چالیشیقدان و موباریزه دن ال چکمه دیک و موباریزه روحونو ایتیرمه دیک.
اینانیریق بو یئنی ایلده ده داها گوجلو، داها گئنیش و داها باشاریلی موباریزه گونلریمیز اولاجاقدیر. امید ائدیریک میلتیمیز و یوردوموز بو ایل فداکار اؤولادینین میلی بیرلییی، میلی اراده سی، میلی چالیشیغی و میلی موباریزه سی نتیجه سینده میلی قورتولوش و میلی آزادلیق آماجینا داها یاخینلاشاجاقدیر.
بو آماج اوغروندا ” آرازنیوز “اولاراق بیزیمده پاییمیز و رولوموز اولدوغوندان غرور و سئوینج دویوب و بؤیوک تورک میلتیمیزه و آزربایجان وطنیمیزه لاییق بیر اؤولاد اولماغا چالیشماقدان ممنونیت دویماقداییق.
بیر داها اوغوز بایرامینی شانلی تورک میلتینه تبریک ائدیب و وطنیمیز آزربایجانا قورتولوش، تورک میلتیمیزه سعادت، آزادلیق و باش اوجالیق دیله ییریک.
یازی قایناغی : میللی بیرلیک تلگرام کاناللاری
