دونیا قادینلار گونونه اؤزل اولاراق اورمو تئکنیک (صنعتی) بیلیم یوردوندا، اونلو تورک قادین شاعیری نیگار خانیم خیاوی‌نین قاتیلیمی ایله تورکجه “چیچک” شعیر آخشامی کئچیریلدی. بو شعیر آخشامی اورمو تئکنیک (صنعتی) بیلیم یوردوندا چالیشان شمس درنه‌گینین “قیزیل آلما” و “آی ایشیغیندا” شعیر آخشاملاریندان سونرا اوچونجو تورکجه شعیر آخشامی ایدی.

بو شعیر آخشامیندا یاخلاشیق ۲۰ اؤیرنجی چئشیتلی تورک شاعیرلریندن قادین، آنا دیلی، سئوگی، وطن و … قونولاردا شعیرلر اوخودولار. شعیر آخشامی‌نین قوناغی دیرلی نیگار خانیم خیاوی قادین حاقلارینا ایشاره ائدیب تورک ادبیاتی، دیلی، تاریخی و… قونولاردا چالیشان قادینلاردان دا سؤز ائتدی. آیریجا نیگار خانیم خیاوی ایراندا اسکی و یئنی دؤنمده تورکجه قوشوق و دوزیازی دورومونو دیرلندیردی.

“چیچک” آدی دده قورقود کیتابیندا آدی کئچن “بانوچیچک” خاتونا ایشاره‌دیر، دده قورقود کیتابیندا “بانوچیچک” خاتون، ارکک قادین ائشیتلیگینین سیمگه‌سیدیر.

شمس درنه‌گی اورمو تئکنیک (صنعتی) بیلیم یوردوندا تورک اؤیرنجی‌لرین چابالاری ایله تورکلوک و اکینج (کولتور) آلانیندا چالیشان بیر درنکدیر.