تورکییه‌لی تاریخچی‌نین «تورکلرین ایرانی» کتابی قوزئی آزربایجان‌دا یاییملاندی
مشهور تورکیه دیپلوماتی و یازاری رجب آلبایراک-ین «تورکلرین ایرانی» کیتابی آزربایجان تورکجه‌سینده چاپدان چیخیب.
آراز نیوزون آزادلیق رادیوسو وئردیگی بیلگیلره دایاناراق، کیتاب AMEA فولکلور اینستیتوسو علمی شوراسی‌نین قراری ایله نشر اولونوب.
ایکی جیلددن، ۱۲۵۶ صفحه دن (۶۲۸ صفحه + ۶۲۸صفحه) عیبارت قالین بو اثری باکی دؤولت بیلیم‌یوردو تورکولوژی بؤلومون مودیری، پروفسور «رامیز عسکر» آزربایجان تورکجه‌سینه اویغونلاشدیریب.
کیتابدا ایران تورکلری بیلیم‌سل شکیلده سینیفلاندیریلمیش و تانیتدیریلمیش‌دیر. تورکمن، خالاج، قاشقای و خوراسان تورکلریندن عیبارت اولدوغو گؤستریلیب، اونلارین سایی، استان‌لاری، شهر و دیگر یاشاییش منطقه‌لری اوزره دقیق شکیلده حسابلانیب، ایرانداکی آزربایجان تورپاقلارینین دقیق سینیرلاری بلیرله‌نیب.
بورادا ایرانی ایداره ائتمیش صفوی، زند، افشار، قاجار و پهلوی سلسله و خاندانلارینین کرونولوژی‌سی، ان یئنی تاریخین بیر سیرا اؤنملی اولای‌لاری (تبریز انجمنی، مشروطیت حرکاتی، آزادیستان دؤولتی، آزربایجان میللی حؤکومتی، ۲۱ آذر حرکاتی، آغ اینقیلاب، ایسلام اینقیلابی)، تاریخه دامغاسینی وورموش شخصیتلر (ستارخان، باقرخان، محمد تقی خان پسیان، میرزا کوچک خان، شیخ محمد خیابانی، ابولقاسم لاهوتی، سید جعفر پیشه‌وری، دکتر مصدق، روح‌الله خمینی)، موختلیف دؤورلرده مؤوجود اولموش مولکی سیستم و اراضی-اینضباطی بؤلگو، اؤلکه‌ده‌کی خالقلار، عشیرتلر، ائتنیک گروپلار، دینلر و مذهبلر، دیللر و لهجه‌لر، او جومله‌دن تورکجه‌دن فارسجایا کئچمیش سؤزلر، تورکجه توپونیملر، ماراقلی اتنوگرافیک بیلگی‌لر، تاریخی شکیل‌لر، کورک‌چای، گولوستان و تورکمنچای موقاویله‌لری‌نین متنلری وئریلیب.
بو اثر ایندییه‌دک گونئی آزربایجان حاقیندا یازیلمیش ان ماراقلی و معتبر قایناقلاردان بیریدیر.
رجب آلبایراک بو اثری ۳۰ ایل مدت‌ینده ایرانی کند-کند، شهر-شهر دولاشاراق یازیب.
