یئنه “وارلیق” و “آنا وارلیق” حاقّیندا _ محمدرضا هیئت
بیلیندیگی اوزره بوندان بیر نئچه گون اؤنجه “وارلیق” و “آنا وارلیق” درگیلری‌نین یازارلاریندان بیر نئچه نفرین قاتیلیمی ایله تهراندا بیر توپلانتی دوزنلنمیش، هر ایکی درگی ایله باغلی، اؤزللیکله ده “وارلیق” لوقوسونون “آنا وارلیق” درگیسی طرفیندن ایشله‌دیلمه‌سی مسئله‌سی تارتیشیلمیش و توپلانتی‌نین سونوندا بیر توتاناق (صورتجلسه) حاضیرلاناراق، امضالانمیشدیر.
توپلانتیدا حضورو اولان “وارلیق” درگیسی‌نین دگرلی یازارلاریندان سایین حسن راشدی‌نین اؤز فیسبوک صفحه‌سینده وئردیگی بیلگیلره گؤره، بو توپلانتیدا آلینان قرارلاردا، “وارلیق” لوقوسونون “آنا وارلیق” درگیسی طرفیندن ایشله‌دیلمه‌مه‌سی؛ “آنا” و “وارلیق” سؤزلری‌نین عینی بویوتلاردا یازیلماسی گرکدیگی ده یئر آلماقدادیر.
“وارلیق” آدی‌نین باشقا بیر درگی طرفیندن قوللانیلماسی‌نین دوغرو اولمادیغی قونوسونداکی دوشونجه‌می تکرارلاماقلا بیرلیکده، بئله بیر توپلانتی‌نین دوزنلنمه‌سی و اؤزللیکله ده “وارلیق” لوقوسونون ایشله‌دیلمه‌مه‌سی ایله ایلگیلی آلینان قرارلاردان دولایی موتلولوغومو ایفاده ائدیر، بو قرارین گئج ده اولسا آلینماسیندان دولایی توپلانتییا قاتیلان هرکسه تشکورلریمی بیلدیریرم.
آنجاق بورادا دقتی چکن و بعضی شبهه‌لرین داوام ائتمه‌سینه نه‌دن اولان مسئله، لوقو ایله ایلگیلی قرارلارین توتاناقدا (صورتجلسه‌ده) یئر آلماماسی‌دیر. اختلافین اساس قایناغی اولان آد و لوقو کیمی اؤنملی بیر مسئله‌یه توتاناقدا اشاره ائدیلمه‌مه‌سی ایستر- ایسته مز عاغیللاردا بعضی سورو اشاره‌لری اولوشدورور.
بیلیندیگی کیمی، “آنا وارلیق” درگیسی‌نین ایلک ساییسیندا “وارلیق” درگیسی‌نین لوقوسو هم قاپاقدا هم ده درگی‌نین بوتون صفحه‌لرینده ایشله‌دیلمیش، “آنا” سؤزو ایسه اولدوقجا کیچیک یازیلمیشدیر. حتی رسیمدن ده گؤرولدویو کیمی، درگی‌نین ایچ صفحه‌لرینده “آنا” سؤزو هئچ یازیلمامیش و یالنیز “وارلیق” یازیلمیشدیر.
شبهه‌سیز بیر کولتور درگیسی‌نین ایلک گؤره‌وی، ادبی انتحاللارا یول وئرمه‌مکدیر. حالبوکی “آنا وارلیق” درگیسی ایلک ساییسندان اعتباراً هم آد هم ده لوقو اولاراق اؤزونو بیر انتحال درگیسی کیمی گؤسترمک ایسته‌میش و اوریژیناللیغینی ایتیرمیشدیر.
بوندان علاوه، حتی اگر بوگون “وارلیق” درگیسی یایین حیاتینا داوام ائتمه‌سه‌یدی بئله، بو آدین و لوقونون باشقالاری طرفیندن ایشله‌دیلمه‌سی‌نین هر هانسی بیر حقوقی و اخلاقی دایاناغی‌نین اولمادیغی هرکسه معلومدور.
سایمیش اولدوغوم بوتون نه‌دنلردن دولایی، تهراندا یاپیلان توپلانتینی اولوملو قارشیلاییر، ایلک ساییدا یاپیلمیش اولان خطانین بیر سونراکی ساییلاردا دوزلدیلمه‌سینی دیله‌ییر و شبهه‌لرین تاماماً اورتادان قالخماسی اوچون لوقو ایله باغلی آلینمیش اولان قرارین توپلانتییا قاتیلان دگرلی یازارلاریمیز طرفیندن یازیلی بیر شکیلده آچیقلانماسی‌نین یارارلی و گرکلی اولدوغونو دوشوندویومو ایفاده ائدیرم.
سایغیلاریملا
محمدرضا هیئت
وارلیق درگیسی امتیاز صاحیبی و سوروملو مودورو
منبع: برگرفته شده از صفحه فیسبوک دکتر محمد رضا هیئت
