آزربایجان میللی دیرنیش تشکیلاتیندان قوزئی آزربایجان مطبوعاتینا موراجیعت
بیز گونئی آزربایجان فعاللاری اولاراق ایللردیر ایران رژیمی طرفیندن اولماز ایشکنجه و تضییقلره(باسقیلارا) معروض قالان میللی فعاللاریمیزین حاق سسینی دنیایا چاتتیرماق ایستییریک.
تاسسوفله قید ائتملیییک کی، دونیا مطبوعاتی ایران‌دا باش وئرن اینسان حاقلاری و عدالیتسیزلیگه قارشی اوز سسیزلیگینی و بیگانه‌لیگینی داوام ائتدیریر. آنجاق تشکیلاتیمیزین اساسنامه و مرامنامه سینده قید ائدیلدیگی کیمی بیز آزربایجانی بوتوو و بیر میللت اولاراق گورمکده ییک. آزربایجانین شیمال‌یندا و جنوب‌وندا باش وئرن بوتون آجیلار بیزیم اورتاق آجیمیزدیر.
بو گون جزا چکمه موسسیسه لرینده بیر چوخ میللی فعالیمیز چوخ چتین شرطلر آلتیندا صیرف وطن سئوگیسیندن دولایی حبسده‌دیرلر. بونا میثال اولاراق ۶۳ گوندور آجلیق آکسیاسی چکن مرتضی مورادپور یاشام موجادیله سی وئریر و حبیب ساسانیان آدلی باشقا بیر میللی فعال سون آپرل دویوشلرینده شیمالی آزربایجانا کومک ائتمک تقصیری ایله ۷ آیدان چوخدور کی آغیر ایشکنجه‌لره معروض قالیر، بویرکلرینی و گوزلرینی ایتیرمک تهلیکه سی یاشاییر.
تاسسوف حیسسی ایله شیمالی آزربایجان مئدیاسینین سوساراق لاقیدلیگی بیزلر طرفیندن قبول ائدیلمزدیر. بوتون آجیلار بیزیم میللت اولاراق اورتاق آجیمیزدیر. بیزیم اورتاق تاریخیمیز و کئچمیشیمیزین اولماسینی اصلا اونوتمامالیییق و بونلارا رغمن سیزدن ریجامیز بو مساله‌یه ایرانین داخیلی ایشی کیمی باخمایین. بو باش وئرنلر بیرلشمیش میللتلرین (سازمان ملل) اینسان حاقلاری بیاننامه‌سینه ضیددیر.
و سیزلری مرتضی و حبیب کیمی چوخلو گوناه‌سیز یئره حبسه سالینمیش اینسانلارین سسی اولماغا دعوت ائدیریک.
آزربایجان میللی دیرنیش تشکیلاتی
۲۶/۱۲/۲۰۱۶ – تبریز
