بوگون ۵۹ گون آجلیق آکسیاسیندیان کئچیر.
۵۹ گون اؤزگورلوک و حاق ایسته کلری اوغروندا دایانمادان جانینی اورتایا قویان قهرمانیمیز،هله ده اؤزگورلویوک اومودونداریر،مرتضی اؤلومو یوخ اؤزگور یاشامی سئچیر.آنجاق بوگون بئله بیر دورومدا چیرکین اولایلارلا اوزله شمه ک اوره ییمه بیر یارا یئرلشدیریر.
آیلار اؤنجه آزربایجانلیلارین غیرت دامارینا آیاق باسان، وطنیمیزی ده ده مالیسی کیمی پای بؤلوش ائدیب (کردستان بهشت پنهان است که باید آباد گردد)دئیه ن شارلاتان پارلمان آدایی، بوگون مرتضی مرادپورون کرئتیک دورومویلا آلای ائدیب (گئدسین غذاسین یئسین) دئیه رک یئنه ده آذربایجان میلتینین میللی حیس لرینی آیاقلادی…
أن آجیسی ،سئچکیلرده شخصی منفعت لری اساسیندا بئله بیر آداما اویونجاق اولوب اوستاد برزگر دئیه دئیه اوی قازاندیران ،مئدیا قاپاقلاریندا بو شخصین شکلینی ووروب هویت چی آدلاندیران و أن اؤنملیسی آزربایجانین گله جه یی ایله اویناییب تورک میلتینین میللی حیس لری و اینانج لاری ایله آلای ائدیلمه زمینه سینی یارادان اوپورتونیست ،پوپولیست لرین بوگون ایسه مرتضی نین شکیلینی پیسلیک باسمیش پروفایل قاپاقلارینا قویوب سانال شبکه لرده بو میلی قهرمانین آجی دورومونو پایلاشاراق اینسانلاری آلدادیب پیسلیک لرینی گیزلتمه یه چالیشمالاریدیر..
سانکی گرچک دن بوگون ایران پارلمانیندا اوتوران آزربایجانلی لار بونلارین دایاز باخیشلاریندا ائله آزربایجان میللتینین وکیللری دیرلر. برزگر لر آزربایجانلینین وکیلی یوخ بلکه فارس شوونیزمینین آزربایجاندا چیرکین سیاست لرینی یورودنلردیرلر. آنجاق بیریلرینین شخصی منفعت لری اساسیندا بو آداما دستک وئریب زامانیندا بو آدامی خط سوم و هویت طلبی جریانی آدینا بیر انحرافی جریان اولاراق آزربایجانین میللی حرکتینین قاباغیندا دستکلمه لری میللتیمیزه سئچکیلر دؤنه مینده ده آیدین اولموشدور. بو شخص لر هر دؤنه ایسته ر فرقلی فیزیک و آدلار ایله آدای اولوب و پارلمانا دا سئچیلسینلر، أما بیز میللی حرکت اولاراق داها آرتیق گوجلو داورانمالییق و داها آرتیق حاق ایسته ک لریمیزی میللتیمیز آراسیندا یاییغینلاشدیریب ،توپلوم دا بیر غالب هئژمونی یه چئوریلمه لییک. گوجلو اولوروقسا ایسته ر ایسته مز بو آدایلار بیز دانیشمادان و سؤیله مه دن میللتین حاق ایسته ک لرین یایغین اولدوغونو گؤروب و اوی آلماق اوچون اونلاری دیله گتیره جک لر و گله ن دؤنه لر بیرداها پارلمان داکی اوتوراجاق یئرلرینی باشقاسینا وئرمه سینلر دئیه اونون اوغروندا چالیشاجاق لار.
بونلارا یالوارمایاجاییق،گوجوموزو گؤسته ره جه ییک کی میللتیمیزین اؤنونده باشلارین ایسینلر.
اؤرنه ک اولاراق قاضی پور اورمو شهرینین میللت وکیلیندن و داورانیشلاریندان آد آپارماق اولار و هامیمیز بیلیریک کی قاضی پورو چیخاردان عامیل آزربایجان میللتینین ایسته ک لرینی آزجا اولسادا دیله گتیرمه سیدیر و بو دؤنه ده پارلمان دا تورک فراکسیونونون یارانماسیندا داها آرتیق بو هئژمونی یه مالیک اولدوغوموز و گونو گوندن میللی حرکتین یایغینلانماسینی گؤره بیلیریک.
مرتضی قونوسوندا قاییتدیغیمدا آزربایجانیمیزین ایندیکی پیس دوروموندا هرزامان دان چوخ وطنیمیزین سؤمورگه حالیندا اولدوغونو دوشونوره م،هر زاماندان آرتیق حیس ائدیره م وطنیم باشقالارینین ایشغالی و ایستیعماریندادیر.مرتضی ایله بیر گونده آجلیغا باشلایانا(آرش صادقی)، اولوب قالمایان یئرلره نامه لر یازیب کمپین لر یارادان اینسان حاقلاری آدینا چالیشان شوونیستلر، تبریز توتساغیندا بیر اینسانین حاق ایسته ک لری اوچون آجلیغینا گؤز یوما بیلیرلر(اونلاردا بیزی اؤزلرینده ن یوخ ،بلکه اؤزگه و کؤله سانیبلار). منیم اوچون بو مسئله چوخ ساده گؤرونور، بو سوردوغوم سورونون جوابینا ایللردیر کی چاتمیشام. اونلار استعمارگر، بیز ایسه اونلارا مستعمره ساییلیریق، وطنیمین و میللتیمین اونلارا تکجه ارزیشی بوتون وارلیقلارینی تالاماقدادیر. اوگونه ده ک کی آزربایجانین وارلیقلاری تهران مرکزیتلی اولان ایرانین آبادلیغینا خرج اولوناجاقسا و آزربایجانین وارلیغی تهران ،اصفهان،فارس کؤکه نلی شهرلره نفع توخوندوراجاقسا بیزلری بیرآزجا گؤره بیله جک لر. آزربایجان ایگیدلری بونلارین تمامیت ارضیسینی قوروماغا بیر عسگر ساییلا بیلر آنجاق،بو عسگری ایلک آسیمیلاسیون و آردیجا ائلیناسیون سیاست لری ایله باشاردیغی قده ر اؤزونه قول ائله ییب، زامانی گلدیینده اهواز عربلرینین علیه ینه، عراق ارتشی و عرب دونیاسی ایله ساواشدیرا بیله ر، سوریه و حلب ده چیرکین سیاست لری اوغروندا اؤلومه گؤنده ره بیله ر، من آزربایجانی نین جانی فارس شوونیزمی (ایسته ر اصولگرا و اصلاح طلب حکومتی،ایسته ر سوسیال دموکرات یادا لیبرال دموکرات اپوزوسیون و غیر حکومتی) نه اوگونه دک ارزیشلی ساییلا بیله ر کی اؤز میندار دوشونجه لری نین اوغروندا قانیمی تؤکدو ره بیلسین،یوخسا آزربایجانلی

اؤز دیلینین قوروماسینا چالیشیرسا، اؤز گؤلونون مرکز طرفیندن اولان قورودولما سیاستلرینه اعتراضین بیلدیریرسه توتوقلانیب آغیر جزالارا محکوم اولوب توتساقلاردا قالان عؤمرونو کئچیره جک دیر.
اولو اونده ریمیز محمد امین رسولزاده دئمیش کن بیر یولو واردیر “اینسانلارا آزادلیق، میللت لره ایستیقلال”

بوگون بیرداها اؤزلویوموزه قاییدیب، دوشونمه لییک،گرچک دن آزربایجانلی گنجی اولاراق آدیمیزی هویت طلب قویوب آما اصلاح طلب مرکزنشین دئدییی سؤزلرین نشخوارینا چالیشیریقسا ندن بو میللت بیزه گوونیب و بیزی سئچسین؟ سندن گؤزل و دموکراتیک سؤزلری ائله اصلاح طلب مرکز نشین و گئنیش وضعیتده لندن نشین لیبرال لاردا دیله گتیریر لر، أما بو آرادا هر بیرینین سون سؤزون ده آزربایجانلی یا تکجه سؤمورگه اولماق یئتیریر.