غفور امامی زاده، قازاقیستانین آلماتی شهرینده دوزنله نن رسمی تؤرنله اؤدوللندیریلدی
اولوسلار آراسی کاشغرلی محمود حکایه یاریشماسیندا بیرینجی اولان غفور امامی زاده، قازاقیستانین آلماتی شهرینده دوزنله‌نن رسمی تؤرنله اؤدوللندیریلدی.
مرکزی آنکارادا بولونان آوراسیا یازارلار بیرلیگی نین اؤنجولویونده و تورکیه جمهوریتی کولتور باقانلیغی‌نین دستگی ایله دوزنله‌نن یاریشمانین بو ایلکی اؤدول تؤرنی ۲۱ دسامبر ۲۰۱۶ تاریخینده قازاقیستانین آلماتی شهرینده گرچکلشدیریلدی.
تورک دونیاسی نین ۱۷ بؤلگه سیندن اونلارجا یازارین قاتیلدیغی تؤرنده، یاریشمادا رتبه قازانانلارا اؤدوللر وئریلدی. تورک دونیاسی نین ان بؤیوک اؤدولونو ایسه آذربایجانین خیاو شهریندن یئته‌نکلی یازار غفور امامی زاده آلدی.
غفور امامی زاده، وارلیق درگیسی‌نین ایلک دفعه ایران-آذربایجان ساحه‌سینده دوزنله‌دیگی کاشغرلی محمود حکایه یاریشماسیندا “قیرمیزیم” آدلی حکایه‌سی ایله بیرینجیلیگی قازانمیش و ایکینجی آشامایا یوکسلمیشدی. ایکینجی آشامادا دا بیرینجیلیک عنوانینی آلان امامی زاده، اولوسلار آراسی کاشغرلی محمود حکایه یاریشماسی‌نین ان اؤنملی اؤدولونه لایق گؤرولموشدور.
تؤرن، قازاقیستان یازارلار بیرلیگی باشقانی و کولتور باخانی‌نین آچیلیش دانیشماسی ایله باشلادی. آردیندان آوراسیا یازارلار بیرلیگی باشقا دوکتور یعقوب عمراوغلو، تورکیه کولتور مستشاری و چئشیدلی اؤلکه‌لردن گلن یازارلار دانیشدیلار. غفور امامی زاده دانیشماسیندا بیرینجی اولماقدان دویدوغو ممنونیت و موتلوغو ایفاده ائده رک، آوراسیا یازارلار بیرلیگی باشقانی یعقوب عمراوغلونا و وارلیق درگیسی‌نین مسئول مودورو محمدرضا هیئته درین تشکورلرینی بیلدیردی.
آردیندان غفور امامی زاده نین اؤدولو کولتور مستشاری طرفیندن اونا تقدیم اولوندو.
آوراسیا یازارلار بیرلیگی باشقانی یعقوب عمراوغلو، مدنیت درگیسینه وئردیگی مصاحبه ده گونئی آذربایجاندان بیر یازارین یاریشمایا قاتیلماسی و بیرینجی اولماسینی، بو ایلکی یاریشمانین ان اؤنملی حادثه سی کیمی دگرلندیردی. عمراوغلو دئدی: “بو هم گونئی آذربایجان ادبیاتی، هم ده بیزیم اوچون اؤنملی بیر اولایدیر. دیلیمیزه، ادبیاتیمیزا یئنی بیر یازیچی گلدی. گونئی آذربایجاندان بیر تورکون بیرینجی یئری توتماسی بوتون تورک دونیاسی اوچون سئویندیریجی‌دیر. او، ادبیات ساحه‌سینده تانینیر و بو اؤدولو آلماقلا داها دا تانیناجاق.”
عمر اوغلو، بیرینجیلیگی قازانان یازارلارین، او جمله‌دن غفور امامی زاده‌نین اثرلرینی بیر کیتاب شکلینده تورکیه تورکجه‌سینده یایینلایاجاقلارینی ایفاده ائتدی.
آوراسیا یازارلار بیرلیگی باشقانی ماراقلی بیر مسئله‌یه داها اشاره ائتدی. او دئدی: “بیر قورال اولاراق اؤدول تؤره‌نی، بیرینجیلیگی قازانان یازارین اؤلکه‌سینده دوزنله‌نیر. گئچن ایلکی یاریشمانین بیرینجیسی قازاقیستاندان اولدوغو اوچون بو ایلکی تؤرن آلماتی‌دا اولدو. بئله‌لیکله گلن ایل تؤرن تبریزده اولمالی‌دیر. تبریزین شرطلری‌نین نئجه اولاجاغینی بیلمیرم، آنجاق بیز تؤره‌نی تبریزده دوزنله‌مگه حاضیریق.”
خاطیرلاتمالی ییق کی، بو یاریشمادا تورکیه دن محمد عاکیف دومان ایکینجی و قازاقیستاندان نورلان اورازالین اوچونجو اولدو.
