آنا وارلیق درگیسی حاقیندا آچیقلاما – محمدرضا هیئت
“آنا وارلیق” آدی ایله یئنی چیخماغا باشلایان درگی‌نین یایینلاندیغینا دایر خبر فیسبوکدا پایلاشیلینجا، بیر چوخ انسان تلفون و یا مساژ یولویلا بو درگی‌نین “وارلیق” درگیسی ایله باغلانتیسی اولوب اولمادیغینی سوروشموش و بو دورومون طرفیمدن آچیقلیغا قوووشماسینی ایسته‌میشدیر. بعضی دوستلاریمیز ایسه “وارلیق” درگیسی‌نین یئنی ساییسی ظن ائده‌رک خبری بگنمیش و یا پایلاشمیش، دورومون نورمال اولمادیغینی آنلایینجا دا بگنیسینی گئری چکمیشدیر.
آیریجا آلدیغیمیز دویوما گؤره، درگینی چیخارانلار، یالان سؤیله‌مک یولویلا “وارلیق” و “آنا وارلیق” درگیلری‌نین بیر-بیری ایله اویوملو (هماهنگ) بیر شکیلده چیخدیغینی، بو قونودا منیمله آنلاشیلدیغینی ایفاده ائده‌رک، بعضی دگرلی یازارلاریمیزدان مقاله ایسته‌میش و اونلار دا “آنا وارلیق” آدلی درگی‌نین “وارلیق” درگیسی‌نین رضایتی ایله چیخدیغینی دوشونه‌رک، مقاله‌لری‌نین یایینلانماسینا ایذین وئرمیشلر.
بو سورولارا جواب اولاراق بلیترمه‌لی‌یم کی “وارلیق” درگیسی‌نین یئنی چیخان درگی ایله یاخیندان و اوزاقدان هر هانسی بیر باغلانتیسی اولمامیش و اولماسی دا مومکون دئییل. چونکو “وارلیق” درگیسی، بو تیپ پارچالاییجی حرکتلرین وارلیق‌ین روحونا آیقیری و درگی‌نین قوروجوسو و دایمی صاحیبی مرحوم پروفسور دوکتور جواد هیئت‌ین روحونا سایغیسیزلیق اولاراق دگرلندیریر. “وارلیق” درگیسی اسکیسیندن داها کیفیتلی بیر شکیلده یایینلانماقدایکن، اونون آدی‌نین و لوقوسونون ایذینسیز قوللانیلماسی، منیم و بعضی یازارلارین مقاله‌سی‌نین ایذینسیز یایینلانماسی اخلاقی دگرلرله مغایر اولوب، مطبوعات قوراللارینا دا آیقیری‌دیر.
“وارلیق” درگیسی یئنی دؤنمینده اوشاقلار اوچون “تومورجوق” آدی ایله تاماماً تورکجه یئنی بیر درگی ده یایینلاماقدادیر. آیریجا “وارلیق” درگیسی‌نین گیریشیمی ایله بو ایل ایلک دفعه اولاراق ایران-آذربایجان تورکلری ده اولوسلار آراسی کاشغرلی محمود حکایه یاریشماسینا قاتیلابیلمیش و بوگونه قدر اثرلرینی دونیایا گؤسترمه امکانیندان محروم قالان گنج یازارلاریمیزین اثرلری اولوسلار آراسی بیر یاریشمادا بیرینجی‌لیگی الده ائتمگی باشارمیشدیر. شبهه‌سیز بو و بونون کیمی یانلیش و پاراللجی حرکتلر، “وارلیق” درگیسی‌نین فعالیتلرینه کؤلگه دوشوره‌بیلمه‌یه‌جک و “وارلیق” درگیسی دوکتور جواد هیئت‌ین و درگی‌نین دگرلی یازارلاری‌نین بلیرله‌دیگی چیزگیده یولونا داوام ائده‌جکدیر.
بورادا “آنا وارلیق” آدلی درگی‌نین ترکیبینده یئر آلمایان “وارلیق” درگیسی یازارلارینا ساغلام و ایلکه‌لی توتوملاریندان دولایی تشکور ائتمگی اؤزومه بورج بیلیرم.
سایغیلاریملا
محمدرضا هیئت
وارلیق درگیسی امتیاز صاحیبی و سوروملو مودورو
