۲۱ آذر گونئی آزربایجان میلی دؤولتچیلک گونو قوتلو اولسون

۷۱ ایل اؤنجه ۲۱ آذر ۱۳۲۴ گونش ایلینده گونئی آزربایجان خالقی رحمتلیک سید جعفر پیشه وری اوندرلیگینده چاغداش تاریخیمیزین قیزیل صحیفه سی اولان آزربایجان میلی حؤکومتینی قورموشدور.

ایران آدلانان جوغرافیادا مین ایلدن چوخ حؤکومرانلیق سورن تورکلر ۱۳۰۴ – ده باتی گوجلرینین قورغوسو ایله اقتیداری الدن وئردیلر. بئله لیکله قاجار تورک  شاهینین یئرینه آت بیر قاشووچوسو اوتورداراق تورکلرین ائگمنلیگینه تحقیر ائدیجی بیر شکیلده سون وئریلمیشدیر.

باتیلیلار طرفیندن شاهلیق تاختینا سؤیکه نن دوننکی قاشووچو بوگونکو ریضا شاه ایشه باشلار باشلاماز  تک دؤولت تک میللت شوعاری اساسیندا آسیملاسیون سیاستینه اؤز گتیردی. مین ایللر دؤولت قوروب اؤز ائگمنلیگی آلتیندا یاشایان تورکلرین دورومو قبول ائتمکلری ممکون دئیلدی البته!

گونئی آزربایجان تورکلری ایلک گوندن پان فارسیسم دوشونجه سینی داشیان پهلوی رژیمینه قارشی  چیخدیلار. اؤز مقدراتینی تعیین ائتمک اوچون موباریزه ائدن تورکلر نهایت ۲۱ آذر ۱۳۲۴رحمتلیک سید جعفر پیشه وری اؤندرلیگینده (گونئی) آزربایجان میللی حؤکومتینی قوردولار.

آرتیق آزربایحان تورک اینسانی بوتون تحقیر و آیری سئچکیلیکلردن اوزاق ائشید شکیلده اؤز اینسانی حقوقونا صاحیب اولموشدو. پهلوی پان فارسیست ذهنیتی طرفیندن یاساق اولان آنا دیلیمیز آرتیق دؤولتین رسمی دیلی اولموشدو. اؤیرنجیلر بوتون سویه لرده تورک دیلینده ائیتم آلیردی. «آزربایجان دئموکرات فیرقه»-سی حؤکومتی اؤلکه یه آزادلیق گتیرمیش و بؤیوک ایصلاحاتات یاراتمیشدی و اینسالارین خوشبخلیگینی تأمین ائتمیشدی.

لاکین مورتجع لر و آزربایجان دوشمنلری تورک اینسانینین خوشبختلیک و آزادلیقینی قبول ائده بیلمه میش و بئله لیکله پهلوی رژیمی حوققا بازلیق و حیله کارلیقلا آزربایحان میلی حؤکومتی و تهران رژیمی آراسینداکی آنلاشمانی یوخ سایاراق آزربایجانا قوشون چکیب و بؤیوک سوی قیریما ال ووراراق آزربایجان میلی حؤکومتینی قورولاندان تام بیر ایل سونر۲۱آذر ۱۳۲۵ ده ییخمیشدی.

۲۱ آذر گونئی آزربایجان تورکلوگو موباریزه تاریخینده پارالاق بیر اولدوزدور. محض بو گونده گونئی آزربایجان تورکلری اؤز میلی دؤولتلرینی قورموشلار.

آزربایجان تورک میلتینین اؤزگورلوک و قورتولوشو یولوندا موباریزه ائدن «آزربایجان میلی دیرنیش تشکیلاتی» ۲۱ آذر «گونئی آزربایجان میللی دئولتچیلیک گونو»-نو باشدا وطن اوغروندا رژیم محبوسلاریندا اولان میللی فعالار و بؤیوک آزربایجان تورک میللتینه تبریک ائدیر.

اوردا بیر یول وار اوزاقدا،

او یول بیزیم یولوموزدور،

دؤنمه سکده،

وارماساقدا،

او یول بیزیم یولوموزدور…

آزربایجان میلی دیرنیش تشکیلاتی سوزچوسو
بابک چلبیانلی

۲۱/۹/۱۳۹۵