سیاسی تشکیلاتچیلیق و اؤن یارغیلاریمیز – داود توران
آزربایجان میللی حرکتی فعاللاری ایله دانیشدیغیمیز زامان ان اؤنملی سورونلاردان بیریسینین سیاسی تشکیلاتچیلیغیمیزین ضعیفلیگی و حتی اولماییشینى دیله گتیریرلر. اما بو سورونون چؤزومو اوچون ده پراتیک بیر چیخیش یولو سونمازلار. میللی حرکتین البته کی ان اؤنملی ضعف نقطه لریندن بیریسی سیاسی تشکیلاتچیلیقدیر. تشکیلاتلارین قورومسال و اورتکن اولماییشی اونلارین ائتکیسینی و گوجونو آزالتماقدادیر. بو سورون تکجه سیاسی تشکیلاتلارین دئییل، گئنل اولاراق میللی حرکتین سورونودور دئییه بیلریک. میللی حرکت ایچریسینده هانسی قورومساللیقدان سؤز ائده بیله ریک؟ هانسی ساحه سی اؤز قورومونو اورتایا قویموش دا ان قارماشیق اولان سیاسی ساحه سی بونو باشارامامیشدیر؟ حرکتلر ایچریسینده اورتایا چیخان قوروملار بللی احتیاجلار دوغرولتوسوندا اولوشمادیقلاری اوچون بوگون بیز بو سورون ایله قارشی قارشییاییق. دوغرودور آد اولسون دئییه اورتایا چیخان سؤزده قوروملاریمیز بئله واردیر. او زامان بیز بو سورونو نئجه آشماللیق؟
بیرینجی واراولان تشکیلاتلاریمیزا اؤن یارغیلی داورانماقدان اوزاق دورمالییق. اونلارین وارلیغینی سورغولاماق یئرینه اونلارا میسیون یوکله مه لییک. ایکینجی سیاسی تشکیلاتلارا و اورادا فعالیت ائدن میللی فعاللارا اؤجو گؤزو ایله باخمایاق. هر کیللی فعال فیکری و ذهنی اولاراق اؤزونه یاخین حیس ائله دیگی بللی بیر تشکیلات ایله ایشله یه بیلر. سیاسی تشکیلاتلاریمیز میللی حرکتین گؤرونن اوزودور. منه گؤره میللی حرکت گؤرونن و اؤنده اولان باشقا ساحه لرده یاراتمالیدیر. ایندیلیک گؤرونن اوزوه اؤن یارغیدان داها چوخ، الشدیرل یازیلار ایله گوجلنمه سینه یاردیم ائتمه لییک. سیاسی تشکیلاتملاریمیزا فیکری اولاراق دستک وئریرسک و اونلارین وارلیقلارینی قبوللنیب اورادا بیر زامانلار اولان ویا هله ده فعالیت ائدنلره اؤجو گؤزو ایله باخماساق او زامان دورومو داها اوبیئکتیو ده یرلندیره بیله ریک.
