سیدجعفر پیشه وری’نین رهبرلیگی آلتیندا آزربایجان دئموکرات فیرقه سی نین بیر ایل عرضینده گؤردویو ایشلَری بیر مقاله ده احاطه ائتمک ممکن دَییل. حرکت، ایران’ین آزادلیق مبارزه سی، هابئله آزربایجان خالقی نین تاریخینده ائله بؤیوک حادیثه دیر کی، اونون باره سینده چوخلو یازیلمیش و بوندان سونرادا یئنه یازیلاجاقدیر … 21 آذر نئهضتی و اونون رهبرلیگی سون گونه قدر، یعنی 1325-جی ایل آذرین 20-نه قدر اؤز اینقیلابی خطلرینده آزاجیق دا اولسا دَییشیکلیک عمله گتیرمه میشدی. بیر آددیم دا اولست گئری چَکیلمه میشدی. عکسینه زنگان، تئهران جلادلاری طرفیندن قان دریاسینا چئوریلَندن سونرا آزربایجان’ین هر یئرینده تَزه روحییه ایله، 1324-جو ایل 21 آذرده کیندن داها شیددتلی حاضیرلیق گئدیردی. خالق یئنی اومیدلرله میثیلسیز شکیلده سیلاحلارا ساریلیردی. او گونلر آزربایجان’دا اولمامیش آدام ستارخان اؤولادی نین بو درجه ده یوکسک اینقیلابی احوال-روحییه سینی تصوّر ائده بیلمز. بو گونلر 21 آذر نئهضتی نین ایل دؤنومونه حاضیرلیقلا برابر مرکزی کمیته و مرحوم سیدجعفر پیشه وری امری اسایندا “بابک” آدلی کؤنوللولر دسته سی یارانیردی. من بو کؤنوللولر دسته سی نین یارادیلماسیندا شخصاً ایشتیراک ائدیردیم. کؤنوللولر دسته سی سیراسینا داخیل اولماق ایسته یَنلر سایی او قدر ایدی کی، اونلارین هامیسینی مَشق اوچون تعلیمات مئیدانینا سیغیشدیرماق ممکن اولموردو. بو گونلر تبریز’ین بوتون محلله لرینده کی گئنیش یئرلر حربی تعلیمات مئیدانینا چئوریلمیشدی. تفنگ گؤتوروب تعلیمات مئیدانلاریندا مَشق ائله ین قادین و قیزلارین سایی کیشی لردن آز دَییلدی.

مرحوم پیشه وری’نین سونونجو دفعه آذرین 20-ده سحر مرکزی کمیته نین بیناسیندا گؤردوم. او، اولدوقجا توتقون و عصبی ایدی. مرحوم پیشه وری’ده بئله بیر حالتی 1324-جو ایل 21 آذر گونو سحر سرتیپ درخشانی ایله مذاکیره دن قاییداندا پاساژدا گؤرموشدوم. لاکین، اوندا گؤزلرینین ایچی گولوردو. اوزوندن موفقیت یاغیردی. دایانیب گوله-گوله: “اوغلوم، ایشلر نئجه گئدیر؟ زنگینه تسلیم اولماق ایسته میر ( زنگینه اورمییه’ده کی حربی قارنیزونون رئیسی ایدی ) اورمییه’یه کمک گؤندرمک لازیمدیر. ایشلر دوزه لر ان شاء الله” دئییب تله سیک گئتدی. لاکین سونونجو دفعه من اونو گؤرنده باشینی آشاغی سالیب، هئچ نه دئمه دن اؤز اوتاغینا گیردی. سونرا اونو بیرداها گؤره بیلمه دیم …

مرحوم پیشه وری نین ایران’ی ترک ائتمه مسئله سینده چوخلو سی̊رلار واردیر. لاکین هله لیک بونلار آچیلمامیشدی. اونون شورَوی’دن ایران’ا قاییتماغا چالیشماسی و بو چالیشمالار زامانی گؤزلَمَدن وفاتی بو سی̊رلَرین چوخ مَکیرلی و مرکّب اولماسیندان حئکایت آچیر.

یایینا حاضیرلایان: آرازنیوز آراشدیرما مرکزی اَمَکداشلاری