«پرئزیدئنت حسن روحانی دؤنه‌مین‌ده ایرانین خاریجی سیاستی اؤلکه‌نین اساس پرینسیپلری باخیمین‌دان دییشمه‌سه ده، سؤیله‌م/دیسکورسییا اعتباری ایله دییشه‌جک،» دئیه سیاسی اوزمان کریم عسگری پروقنوزلاشدیریر. آنکارا اونیوئرسیتئتی بئینلخالق موناسیبتلر فاکولته‌سین‌ده دوکتورلوق درجه‌سی اوزرین‌ده چالیشان گونئی‌لی فعال آمئریکانین سسی ایله صحبت‌ده حسن روحانی حکومتی دؤنه‌مین‌ده ایرانین خاریجی سیاستی و قرب اؤلکه‌لری هابئله قونشولاری ایله موناسیبتلرده آپاریلاجاق مومکون اصلاحاتلاری، همچینین بو دییشیک‌لیکلرین آذربایجان تورکلرینه تاثیرلرینی شرح ائدیب.
کریم عسگری یئنی پرئزیدئنتین اؤز تونون‌دا فوندامئنتال دییشیک‌لیک آپاراجاغینا امین اولدوغونو دئییر: «احمدی‌نژاد دؤنه‌مین‌ده ایران ایسلام رئسپوبلیکاسی هوجوم‌چو بیر خاریجی سیاست یوردوردو، آنجاق حسن روحانی گرگین‌لیگی آزالتماق ایستیقامتین‌ده حرکت ائدجیینی وورغولاییر. حسن روحانی پرئزیدئنت سئچیلممیش‌دن اؤنجه ده احمدی‌نژادین خاریجی سیاستینی تنقید ائدیردی. بونا گؤره ده ایندی گؤزلر ایرانین اوزردین‌ده‌دیر و یئنی پرئزیدئنتین آپاراجاغی رئفورملاری مونیتور ائدیرلر.»
«حسن روحانی یولبیله‌ن بیری‌سی‌دیر. اونون خاریجی ایشلئر ناظری اولاراق سئچدیی محمد جاواد زریف ده تجروبه‌لی بیر سیاسئت‌چی‌دیر. منجه روحانی دؤنه‌مین‌ده ایران ایسلام رئسپوبلیکاسینین سیاستلرین‌ده بؤیوک دییشیک‌لیکلر آپاریلماسا دا سؤیله‌ملر بیر میقدار دییشه‌جک‌دیر،» دئیه ائکسپئرت علاوه ائدیر. او، حسن روحانینین اؤز رسمی وئب صحیفه‌سین‌ده یهودیلره دینی بایراملاری موناسیبتی ایله تبریک مئساژی گؤندرمه‌سینی همین سیاستین ایستیقامتین‌ده بیر آددیم کیمی قیمتلندیریر.
جناب عسگری ایران ایسلام رئسپوبلیکاسینین خاریجی سیاستین‌ده مومکون دییشیک‌لیکلرین اؤلکه داخی‌لی و او جمله‌دن آذربایجان تورکلری اوزرین‌ده نئجه تأثیر بوراخاجیغینی دا شرح ائدیب: «ایران کیمی دؤولتلر اساساً وارلیقلارینی بحرانلارلا یاشادالارلار. بو اوزده‌ن ده خاریجی بحران اولمادیغین‌دا داخی‌لی بحرانلار یارادارلار. بو دوروم‌دا آذربایجان فعاللاری ایکی سیاست ایزله‌مه‌لی‌دیر؛ ایچری‌ده‌کی فعاللار ایچرینین شرطلرینی نظر آلاراق، یارانان فورستلردن ایستیفاده ائدیب بعضی ایستکلری، او جمله‌دن آنا دیلی و چئوره ایله باغلی طلبلرینی ایر‌لی سوره بیلرلر. خاریج‌ده‌کی فعاللار ایسه لوببی‌چی‌لیک اوزرین‌ده چالیشمالاری گوجله‌ن‌دیره بیلرلر.»
بئینلخالق موناسیبتلر ائکسپئرتینین فیکرینجه سورییا حاکمیتینه قارشی قربین مومکون حربی موداخیله‌سی ایران طرفین‌دن جدی و کسکین بیر تپکی ایله قارشیلانماز:
«یاخین تاریخ‌ده باش وئره‌ن ایراق و افقانیستان محاربه‌لرین‌ده ایرانین گؤسترمیش اولدوغو تپکییه باخا بیلریک. ایران رئگیونال بیر گوج اولسا دا قلوبال بیر گوج دئیی‌دیر، بونا گؤره ده آمئریکا و دیگر قرب اؤلکه‌لری ایله موستقیم ساواشا گیرمز. کئچمیش‌ده ده گیرممیش. آنجاق، ایراق‌دا ائتدیی کیمی دولای‌لی یوللاردان موداخیله ائتمک ایستر، او جمله‌دن دؤیوش‌چو پارتیزان قروپلاری دستکله‌یه‌رک.»
گونئی‌لی ائکسپئرت حسن روحانینین ایرشاد و مدنیت ناظری علی جننتینین ایرانی فارس یوردو آدلان‌دیرماسی و دونیا فارسدیل‌لیلرینی بیر داها بیر آرایا گتیرمک اوغرون‌دا سیاست یوردوجیی ایله باغلی سؤزلرینه ده موناسیبت بیلدیریب: «ایران ایسلام رئسپوبلیکاسی ایدئولوژی بیر نیزام‌دیر. بو ایدئولوگییانین بیر طرفی شیعه‌چی‌لیک، بیر طرفی ایسه فارس‌چی‌لیق‌دیر… بو ساده‌جه روحانی دؤنه‌مینه عایید اولان بیر سیاست دئییل… البته بو آرادا دیگر فارسدیل‌لی اؤلکه‌لرین ده سیاستی اؤن‌م‌لی‌دیر. مثال اوچون تاجیکیستان ایرانا چوخ یاخینلاشماق ایستمیر. بونا گؤره ده، منجه ایرشاد ناظرینین بو صحبتلری داها چوخ داخی‌لی مسرف اوچون‌دور.»
علیرضا قولونجو
