موهندیس حسن راشدی: تورکجه درس کلاسیمیزی تعطیل ائتدیلر !
بو ایل بعضی دوستلارین چالیشماسی ایله یایین اورتا آییندان آذربایجان تورکجه سینده کلاسین آچیلماسینا چوخ چالیشدیقدان سونرا نهایت کرجین فردیس منطقه سینده و اونون ولایت آدیندا فرهنگسراسیندا ، فارس دیلی ، موسیقیسی و باشقا ساحه‌ده اولان مختلیف کلاسلارین یانیندا بیزیمده آنا دیلیمیزده ارشاد و فرهنگسرا مسئولو رضایتی ایله درس کلاسی آچیلدی و بیزده بیر اطلاعیه اساسیندا دیلیمزه علاقه سیاولانلاری بو کلاسدا شرکت ائتمه‌یه دعوت ائتدیک .
کلاس عملی صورتده آبان آیی نین یئددی سینده ، هفته‌ده بیر گون پنجشنبه گونلری و ساعات ۱۶ دان ۱۸ قدر تشکیل تاپدی ومن‌ده (حسن راشدی ) اونون اؤیرتمنی اولدوم .
کلاسدا تورک دیللی وطنداشلاریمیزدان علاوه بیر تعداد فارس دیللی علاقمندلرده شرکت ائدیر و تورک دیلی‌نین یازی قایدالارینی ، دیل بیلگیسینی ( قیرامئرینی ) سیستماتیک شکیلده چوخ علاقه ایله اؤیره‌نیردیلر .
ماراقلی‌دیر کی ، بو کلاسدا شرکت ائدن خانیملارین تعدادی آقالاردان چوخ ایدی و فارس علاقمندلردن شرکت ائدن اوچ نفرین اوچوده خانیم ایدی ، تورکلرین ایچیندنده خانیملارین تعدادی آقالاردان چوخ ایدی .
کلاسین برنامه‌سی چوخ نظم‌له و یورودوجو اولمادان قاباغا گئدیردی و کلاسدا شرکت ائدنلر گؤروردولر دیلیمیز نئجه قایدالی – قانونلو بیر دیلدیر و اونون یازیب – اوخوماسی نه قدر لذتلی دیر .
بوجور کلاسلاردا و تورک دیللی لرله فارس دیللی لرین بیر کلاسدا اولماسینا درس وئرمک چوخدا آسان ایش دئییل ، آمما بیز ایشی ائله قاباغا آپاریردیق کی ، هم فارس دیللی‌لر درسدن فایدالانسینلار و هم تورک دیللی‌لره کلاس یورودوجو اولماسین .
کلاسدا اشتراک ائدنلر چوخ ماراقلا وئریلن درسلری اوخویور و گلن هفته‌یه حاضیرلاییردیلار ؛ اونلار دیلیمیزین قانونلارینی اؤرگندیکده اؤزل بیر دویغو ایچینده یاشاییردیلار ، سانکی یئنی بیر دیه‌رلی و کشف اولمامیش علم و بیلیگه ال تاپیبلار .
بو هفته پنجشنبه ۸ بهمن ۱۳۹۴ درسین ۱۲جی جلسه‌سی اولاجاقدی و دؤرد جلسه‌دن سونرا بیر تئرم‌لیک درسیمیزی بیتیریب امتحان آلیب حتی سیرتیفیکئیت ( کارنامه) ورقه‌سی وئریب بیر مختصر مراسیم توتماغادا فیکیرله‌شیردیک کی،خبر وئردیلر کلاسیمیز تعطیل اولسون !
بیز مگر بو کلاسدا اودا ارشاد اداره سی‌نین نظری آلتیندا دیلیمیزین قایدا – قانونوندان باشقا نه درس وئریردیک کی، اودا درسین سونونا یالنیز دؤرد جلسه قالمیش اونو تعطیل ائتدیلر ؟
یعنی تورک دیلی بو قدر قورخوجودور !؟
چرشنبه ۷ بهمن ۱۳۹۴
