۲۱ آذر گونو شوبهه سیز گونئی آذربایجان تورکلرین تاریخینده پارالاق و اونودولماز بیر گوندور.

محض بوگونده آزربایجان تورکلرین ایگریمی ایللیک موبایزه سی سونوج وئرمیشدی. قاجار تورک سولاله سی یخیلدیقدان سونرا حوکومتی اله کئچرین پهلوی رژیمی آشیری فارس میللیتچیلگینه دایاناراق اولکه ده آسیملاسیون سیاستی یوروتمگه باشلادی. پهلوی رژیمینین عیرقیچی سیاستینده غیری فارس میللتلر و اوزللیکه تورک میللتی اوزل یئر آلیردی.

ایلک باشدان پهلوی رژیمینه قارشی موجادیله آپاران تورک میللتی نهایت ۲۱ آذر ۱۳۲۴ –ده دونیا و بولگه شرایطیندن ده فایدالاناراق «آزربایجان میلی حوکومتی»-نی یاراتدی.

آزربایجان دموکرات فرقه سی «سید جعفر پیشه وری» رهبرلیگی آلتیندا ۲۱ آذر۱۳۲۴ ایلینده آزربایجان میلی حوکومتینی قوردو. تورکجه دولتین رسمی دیلی اولدو و مکتبلرده درسلر تورکجه کئچیریلدی. میلی حوکومت گونئی آزربایجاندا بویوک اصلاحاتا ال ووردو. اینسانلار اوزلرینی خوشبخت حیس ائدیردی، اولکه ده بوللوق، زنگیلک و آزادلیق یارانمیشدی.

خالق دوشمنلری هر زامانکی کیمین آزربایجانین گلیشمه سیندن راحاتسیز اولموشدو. پهلوی رژیمی باخمایاراق کی «آزربایجان میلی حوکومتی»-نی ۱۳۲۵ خورداد آیندا رسمیته تانیمیشدی آذر آیندا حیله کارلیقلا آزربایجاندا قتل عام یاراداراق یئنی قورولان دولتی دئویرمگی باشاردی.

معاصیر تاریخیمیزده ۲۱ آذرگونونده ایلک آزربایجان دولتی قورولدوغو اوچون بوگون بیزیم اوچون بوگون«گونئی آزربایجان دولتچیلیک گوندور».
آزربایجان میلی دیرنیش تشکیلاتی ۲۱ آذر گونئی آزربایجان دئولتچیلیک گونونو بؤیوک میلتیمیزه تبریک ائدیر.

آزربایجان میلی دیرنیش تشکیلاتی اولاراق میلتیمیزین وارلیغی و اوزگورلوگو اوغروندا سومورگه چی رژیمله موباریزه آپارماغی اوزوموزه میلی گورو بیلرک بو موقدس یولدا یورولمادان و اوسانمادان موجادیله ائدچگیمیزی بیر داها بو وسیله ایله بیلدیریریک.

اوردا بیر یول وار اوزاقدا او یول بیزیم یولوموزدور
دونمه سکده وارماساقدا او یول بیزیم یولوموزدور

آزربایجان میلی دیرنیش تشکیلاتی سوزجوسو بابک چلبیانلی
۲۰ آذر ۱۳۹۴

I.N