[محمد امین رسول‌زاده]

واقعه‌ی-کربلانی چوخ ائشیتمیشیک. اهلی-بیتین اوراداکی مظلومیتلرینی، مین دورلو شکیل و نؤع‌ده دینله‌میشیک. عاشورا گونونون مظالیمینه هر سنه گؤز یاشی و باش قانی تؤکه‌رک گلمیشیک. گؤزلریمیزله بدنیمیزی زورلایاراق بو خوصوصدا اجیرلر گؤزتله‌میشیک. یالنیز بو، قییامته قدر بؤیوک بیر توفانی-موصیبت قوپاران واقعه حاقیندا ان آز ایشلتدیگیمیز و ان آز زحمت وئردیگیمیز بیر شئی واردیر: عقل!

حالبوکی بو کیمی ایجتیماعی و سیاسی واقعه‌لردن ایستیفاده ائده بیلمک و اونون کونهونه و حیکمتینه لوزومونجا آشینا اولا بیلمک اوچون حیسیاتی بیهوده یئره صرف ائدن گؤز یاشلاریندان زییاده بوندان فایدالی نتیجه‌لر ایستحصال ائده بیله‌جک عقل‌له گؤز یاشلارینی سیله‌جک و میلتلره تسکینلیک بخش ائده‌جک بو بؤیوک قوووته موراجیعت ائتمه‌لی و عاشورا واقعه‌سی اوزرینده دوشونمه‌لیدیر.

بو دوشونجه بیزه نه کیمی بیر حیس تلقین ائدییور؟
ایشته ایکی گون سونرا میثلی گله‌جک اولان بیر گون — عاشورا!

یار و انصاری قیریلمیش، یالنیز بیر ایمام! دوشمن چوخ، آمان یوخ! عرصه تنگ. اؤلوم محقق. بورادان قورتارماق اوچون یالنیز بیر واسیطه وار: تؤوبه و ایلتیجا!

بیزیم ایندیکی تلقی‌لریمیزجه (ایندیکی دئییل، عاشورا شهیدیندن بیر آز سونرا اساسلی بیر صورت آلان “تقییه” فلسفه‌سینین ظهور ائله‌دیگی گونلرین دوشونجه‌سینجه ده بئله) بورادان چیخیلاجاق یول مؤوجود اولدوغو حالدا ایمام اؤلومونه راضی اولویور. بیدعت ائتمک ایسته‌مییور! جیسمن اؤلویور. فقط روحن زینده اولدوغونو ایثبات ائدییور. ایستیقامت-ی-فیکر، ثبات-ی-مسلک و بونلارین موقابیلینده ووجودون هئچ بیر اهمیتی اولمادیغینی نه موثر بیر صورتده ایظهار ائدییور. بو نؤقطه‌ی-نظردن مظلوم دشت نینوا هئچ ده مغلوب دئییلدیر. بلکه او غالیبیتین ان بؤیوک بیر درجه‌سینی تشکیل ائدن روح عظمتی و قلب غلبه‌سینه نایل اولموش بیر موجاهید-ی-حقیقیدیر.

حوسئینی مظلوم بیلیب ده حالینا آغلادیغیمیز حالدا هر قیسم بلا و موصیبتلری آنجاق آغلاماق و یالنیز آغلاماق طریقی ایله ایستیقبال ائتمک مظلومیتینه اؤیرنن بیزلر، ایمامین بو بؤیوک روحو ایله آشینا اولوب اونا ایمتیسال ائتمک خیالیندا هئچ اولمویوروز. بلکه ده بو حال کربلا شهیدینی قبرینده ده راحاتسیز ائتمکده‌دیر.

دین، فیکیر، علم و میلت نامینه شهید و مظلوم اولانلار بشریت تاریخی ایله-ایسلامیت تاریخیده چوخدور. بونلار همیشه و هر بیر میلت آراسیندا تقدیم اولونار و آدلاری احتیراملا آنیلار.  بو، کیمی‌لر حاقیندا گؤسته‌ریلن ان بؤیوک احتیرام، اونلارین بؤیوکلوکلرینه ایمتیسال ائتمکدن عیبارتدیر.

عقیده، آمال و مسلکی یولوندا اؤلومونه راضی اولوب دا نفسینی فدا ائدن کیم اولورسا-اولسون بؤیوکدور.
و بو بؤیوکلوک تقلیده شایان و تحسینه موستحقدیر!

عاشورا گونو بیزه بؤیله بیر اخلاق تربییه‌سی وئرمک ایقتیدار و صلاحیتینده ایکن، ای‌واه کی، بیز اونو باشقا دورلو قاندیق، هر شئیده اولدوغو کیمی بورادا دا نارفته بیر یولا دوشدوک. حوسئین (ع) ایناندیغی و اعتیقاد ائله‌دیگی فیکری اوستونده اؤلمه‌یینجه اؤزونون ابدی بیر رحمته نایل اولا بیلمه‌یه‌جه‌یینی گؤسترمیش ایکن، بیز “من-من، او-اونا، او-او یانا” تیمثالیندان دؤرد اللی یاپیشیب سادتدارینی اوچ-دؤرد قطره گؤز یاشی موقابیلینده وئریله‌جک قدر اوجوز بیر شئی ساندیق.

فقط ای ماتمگران، آرتیق بوراسینی دوشونمک زامانی دا گلمیشدیر. سیز کربلا واقعه‌ی-جانسوزینه آغلاییرسینیز. فقط تاریخی-هیجرینین ایل باشچیسی اولان تازه محرمده بیر آز اؤزونوزو توخدادیب کئچن ایللره باخینیز، حقیقی بیر نظری-عیبرتله باخمیش اولسانیز کربلانومون بیر چوخ واقعه‌لر گؤره‌جکسینیز. ایشته بو واقعه‌لری ده دوشونونوز. اونلار دا سیزین نظر دیقتینیزی جلب ائتسین. فقط یالنیز بیر ریجا ائدرم کی، آرتیق بو واقعه‌لره آغلامایینیز.

چونکی آغلاماق دینی واقعه‌لرده، روح و ایمانین نزاهت و ایستیراحتی اوچون لازیمی بیر شئی ایسه ده، دونیا ایشلرینده فایدا گتیرمز. طبیعت اولدوقجا غدار و بی‌رحم‌دیر. گؤز یاشلارینا ذره قدری اهمیت وئرمز. گولمه‌یه، آغلاماغا قارشی لاقئیددیر. هله آغلاماقدان بیر آز دا زهله‌سی گئدر. چونکی آغلاماق اعجاز علامتیدیر. عاجیزلرین ایسه طبیعت ان بیرینجی دوشمنیدیر. قوووتلی اولانلاری ساخلار، ضعیف اولانلاری ازر – بودور اونون رفتاری. سیز گلین ده بو خاصیتیندن اؤترو اونا کجمدار دئیینیز. فقط بو اونون گئتدیگی دوغرو بیر یولدور.

تازه ایلیمیزده کؤهنه‌سینده‌کی ایتیردیکلریمیزی تلافی ائتمک ایسته‌ییرسک، گلن محرمه قدر آغلاناجاق حاللاردان بیر آز اولسون، اؤزوموزو خیلاص ائتمک آمالیندا ایسک، فلگین “گجمدار” اولدوغونو آنلایالیم و بؤیله بیر ظالیمه قلبه چالا بیلمک اوچون اینسانی بوشالدان گؤز یاشیندان دئییل، فیکیر ایستیقامتی و عقیده صباتی ایله عملپرورلیکدن کؤمک گؤزله‌یه‌لیم. بؤیوک عاشورانین معظم شهیدینه ایمتیثال ائده‌رک روحی-قهرمانلیغینی درک ائده‌لیم کی، ان بؤیوک اجری ده آنجاق بوندان آلا بیلریز!

کؤچوروب یایینا حاضیرلایان «آرازنیوز» سایتی امکداشلاری