وارلیق درگیسینی هدف آلانلارین آماجی نه‌دیر؟
بو سطیرلری بؤیوک بیر اوزونتو و معنوی- اخلاقی مجبوریت حیسی ایله یازیرام. امین اولون اگر وارلیق علیهینه آپاریلان فعالیتلر اینترنته داشینماسایدی، من ده اینترنت اوزریندن آچیقلاما یازماق زوروندا قالمازدیم. آنجاق نه یازیق کی، سون گونلرده وارلیق درگیسی‌نین یئنی نشرینی شائبه آلتینا آپارماق و درگینی ایچیندن پارچالاماق آماجی ایله سایین ابراهیم رفرف و سایین علیرضا صرافی طرفیندن نه اونلارا، نه ده وارلیق درگیسینه یاراشان بیر یازی یایینلاندی و درگی‌نین آنکارادا باسیلماسی باهانه‌سی ایله وارلیق درگیسی هدف تاختاسینا چئوریلدی. البته آتالاریمیز دئمیشکن “هر شئیده بیر خئییر وار.” بلکه بو یازی یایینلانماسایدی، گرچکلر ده گون اوزونه چیخمازدی و آرخامیزدان آتیلان افترالار “اؤلدورمه‌سه‌یدی ده اورک بولاندیرماغا داوام ائدردی.”
منیم بو یازیدان آماجیم کیمسه‌نی هدف آلماق و یا کیمسه‌یه سایغیسیزلیق ائتمک دئییل. تام ترسینه وارلیق درگیسینه یاراشان بیرلیک و برابرلیگی قوروماق و هر سببدن دولایی بیله‌رک و یا بیلمه‌دن اونو داغیتماغا چالیشان عزیز دوستلاریمیزا بو گرچکلری بیر داها خاطیرلاتماقدیر.
بوگون اگر وارلیق درگیسی حاقیندا بو قدر دانیشیلیرسا و هرکس اونونلا ماراقلانیرسا، درگی‌نین گئچن ۳۶ ایلده نه قدر دوغرو یولدا اولدوغونون و خالقین آراسیندا اؤزونه نئجه درین یئر آچدیغی‌نین گؤسترگه‌سی‌دیر. وارلیق درگیسی؛ دوکتور جواد هیئت، دوکتور حمید نطقی، مرحوم محمدعلی فرزانه، اوستاد مشروطه‌چی سؤنمز، اوستاد مجیدزاده ساوالان، مرحوم پیرهاشمی، مرحوم سرداری‌نیا و اوستاد محسنی کیمی قوروجو بؤیوکلریمیزین و داها سونرا درگییه قاتیلان بیر- بیریندن دگرلی آیدین و یازارلارین صمیمی ایش‌بیرلیگی سایه‌سینده زامانلا بیر مکتب حالینا گلدی. شبهه‌سیز گئچن ایللرده ده وارلیق یازارلاری آراسیندا اختلافلار اولموشدور. آنجاق یازارلاریمیزین اولغونلوغو و اورتاق هدفلری اوغروندا صداقتلری نتیجه‌سینده هئچ بیر زامان بو اختلافلار دیشاری چیخمامیش، بیر- بیرلرینه سایغیدا قصور گؤرولمه‌میشدیر.
من و منیم نسیلداشیم اولان بیر چوخ انسان یاخیندان و یا اوزاقدان وارلیق مکتبی‌نین اؤیرنجیلری اولدوق. وارلیق مکتبیندن چوخ شئیلر اؤیرندیک. وارلیق بیزه یالنیز دیلیمیزی، ادبیاتیمیزی، تاریخیمیزی اؤیرتمه‌دی. بیزه غرورلو و شرفلی یاشاماغی دا اؤیرتدی. بیزه حاقسیزلیقلار قارشیسیندا دیک دورماغی دا اؤیرتدی. بیزه اؤیرتدی کی، هدف خالقا خیدمت ایسه، قالانی تفرعاتدیر و یئنه بیزه اؤیرتدی کی، وارلیق «نه اولورسا اولسون، آمّا چیخسین» منطقی ایله حرکت ائدن بیر درگی دئییل. اونون ایلکه‌لری، واز گئچیلمزلری وار. چونکو اونون قوروجولاری دا ایلکه‌لی انسانلاردی. اونلار، حیاتلاری بویونجا «واز گئچیلمزلری» اوچون بیر چوخ شئیدن واز گئچدیلر و بوگون بیزه چوخ دگرلی بیر امانت بوراخدیلار. بو امانت البته کی، بیر گون داها گنج بیر نسله بوراخیلاجاقدی و بوراخیلدی دا. بو طبیعتین قانونودور و بؤیوکلریمیز بو قانونو چوخ یاخشی ادراک ائدر و بوندان ذوق آلارلار. آنجاق بعضاً بو سورج بعضیلری اوچون بیر آز سانجیلی گئچر کی، بونو دا گنج نسلین آنلاییشلا قارشیلاماسی گرکیر.
بورایا قدر هر شئی نورمال. آنجاق اگر بو دورومدان فایدالاناراق مشعلی الینه آلیب ایره‌لیله‌ینلرین اؤنونه داش آتیلیر و یا بو مشعلی آلیب اونو سؤندورمک آرزوسوندا اولانلارا تسلیم ائدیلمک ایستنیرسه، او زامان «دور!» دئمک لازیم.
بلکه ده بو سببدندیر کی، دوکتور جواد هیئت اؤز اوزاق‌گؤرنلیگی ایله بئله بیر دورومون اورتایا چیخابیله‌جگینی تخمین ائتدیگی اوچون هئچ بیر شبهه یئری قالماسین دئیه وارلیق درگیسی ایله باغلی آیری و رسمی بیر وصیتنامه یازمیشدیر.
سؤزونو ائتدیگیم تخریبات یازیسی منی و وارلیق درگیسینی هدف آلدیغی اوچون، اورکدن ایسته‌مه‌سم ده منه جواب وئرمه حاقّی دوغورموشدور. بو وسیله ایله وارلیق درگیسی‌نین دگرلی اوخوجولاری و یا تعقیب‌چیلری‌نین ماراقلاندیغی و سوروشدوغو بعضی مسئله‌لر ده آیدینلیق قازانمیش اولاجاق.
۱- رحمتلی دوکتور جواد هیئتی تانییانلار اونون وارلیق درگیسی اوچون نه قدر حساسیت گؤستردیگینی، گله‌جگینی ریسکه آتماماق اوچون هر جور تدبیر آلدیغینی چوخ یاخشی بیلیرلر. بو اساسدا دوکتور هیئت، ۹/۱۰/۱۳۸۵ (۲۰۰۶) تاریخینده تهرانین ۱۷۴ نومره‌لی دفترخاناسیندا (نوتر) ۶۱۹۵۲ نومره‌لی وصیتنامه ایله، وفات تاریخیندن اعتبارا وارلیق درگیسینی منه دئور (واگذار) ائتمیش و ۲۰۱۴ تاریخینده، یعنی وفاتیندان اؤنجه گونجلله‌دیگی عایله وصیتنامه‌سینده ده بو وصیتی تکرارلایاراق درگینی منه تاپشیرمیشدیر. بو تاریخلر اونا گؤره اؤنملی‌دیر کی، هر ایکی وصیتنامه یازیلدیغیندا دا مرحوم دوکتور هیئت منیم آنکارادا یاشادیغیمی، حتی سون ایللرده ایرانا گئتمه‌دیگیمی هرکسدن یاخشی بیلیردی. حتی بؤیوک قارداشیم وفات ائتدیگینده منه تلفون آچاراق “ساقین بورایا گلمگی دوشونمه” دئیه اویارمیشدی. البته منیم هر هانسی بیر سیاسی فعالیتیم اولمادیغی اوچون حقوقاً و قانوناً بیر انگلیم یوخدور. آنجاق بللی کی، دوکتور هیئت بگ دورومو مساعد گؤرمه‌میش و منیم گئتمگیمی ایسته‌مه‌میشدیر. دئمک ایسته‌دیگیم بو کی، مرحوم دوکتور هیئت، منیم آنکارادا یاشادیغیمی بیلدیگی حالدا او وصیتی یازمیش و سونونا قدر ده فیکرینی دگیشدیرمه‌میشدیر. ماراقلی اولان بو کی، دوکتور هیئت‌ین وفاتیندان بیر آی اؤنجه بو وصیتنامه‌نی سایین صرافی‌یه گؤندرمیشدیم و بوندان دقیق خبرلری واردی. آنجاق ندنسه، هم گئچن بیر ایل سورجینده، هم ده یایینلادیقلاری یازیدا دوکتور هیئت‌ین وصیتینی گؤرمزدن گله‌رک، اؤز دوشونجه‌لرینه گؤره حرکت ائتمیشلر. محتملاً دوکتور هیئت‌ین دفن یئریله باغلی وصیتی‌نین یوخ ساییلماسی، او بیری وصیتلری‌نین ده جیدیه آلینماماسی کیمی بیر آلیشقانلیغا سبب اولموشدور.
۲- شبهه‌سیز بو وصیتنامه‌دن هامی‌نین ممنون اولماسی مومکون دئییل. بلکه ده سایین صرافی و سایین رفرف سون ایللرده وارلیق درگیسینده چکدیکلری زحمتلردن دولایی وارلیق‌ین امتیازی‌نین اونلاردان بیرینه وئریله‌جگینی دوشوندوکلری اوچون خیال قیریقلیغینا اوغرامیشلار. اگر بئله ایسه، گرچکدن اوزوجو بیر دویغودور. آنجاق بو ایکی عزیز دوستوموزون بو داورانیشی و اینترنتده وارلیق علیهینه یازدیقلاری یازینی پایلاشمالاری، دوکتور هیئت‌ین نه قدر اوزاق گؤرن، ذکی و حاقلی اولدوغونو بیر کز داها اثباتلادی. چونکو اونون اوچون درگی‌نین ساغا- سولا ساپمادان حیاتینا داوام ائتمه‌سی هر شئیدن داها اؤنملی ایدی.
۳- بوندان ایللر اؤنجه وارلیق‌دا آرشیوی دوزنلرکن، مرحوم دوکتور حمید نطقی‌نین اینگیلتره‌دن دوکتور هیئته یازدیغی مکتوبلاری تاپیب و دوکتور هیئت‌ین منه وئردیگی و داها چوخ اؤز اثرلریندن اولوشان مکمل آرشیوی ایله بیرلیکده آنکارایا گتیرمیشدیم. مکتوبلاردان بیرینده دوکتور نطقی‌نین بیر جمله‌سی چوخ دقت چکیجی ایدی: سئوگیلی جواد بگ، اگر باسقیلارا دایانماق چتین‌لشیرسه، شرطلر مساعد اولانا قدر وارلیق درگیسینی یورد دیشیندا چیخاراق.” سون کز دوکتور هیئت بگ آنکارایا گلدیگینده (۲۰۱۲) من بو مکتوبو خاطیرلاتدیم و سوروشدوم کی، اگر گله‌جکده بئله بیر چتین شرایط اولورسا نه ائتمه‌لی‌ییک؟ جواب چوخ قیسا ایدی: «بو دورومدا درگی یا قاپاتیلمالی‌دیر، یا دا باشقا یئرده چیخاریلمالی‌دیر!»
۴- درگی علیهینه یازیلان مشهور یازیدا و صرافی بگین یوروملاریندا دوکتور هیئت‌ین عایله‌سی‌نین امتیاز حاقّینی آلماق اوچون “هئچ بیر اقدام ائتمه‌دیگی” یازیلماقدادیر. بو کیمی یانلیش بیلگیلرین یاییلماسی البته کی بیر آماجا خیدمت ائدیر. آنجاق بو آماج کسینلیکله میلّی و اخلاقی بیر آماج دئییل. چونکو منیم گؤندردیگیم وکالتنامه ایله ایلک آلتی آیدا هم عایله طرفیندن، هم ده گوونیلیر باشقا دوستلارین آراجیلیغی ایله دفعه‌لرله ارشاد اداره‌سینه باش وورولموش و منفی جواب آلینمیشدیر. البته اوراداکی مسئوللار دا مشهور یازینی پایلاشان دوستلاریمیز کیمی وارلیق درگیسی‌نین چیخماسینا قارشی دئییللر، دوکتور هیئت‌ین وصیت ائتدیگی شکیلده چیخماسینا قارشی‌دیرلار.
۵- وارلیق درگیسی بو دوستلاریمیزین ادعا ائتدیگی کیمی بیر “تورکیه درگیسی” دئییل. دگیشن تک شئی وار، او دا مطبعه‌نین آدرسی. دیل، الیفبا، محتوا وس. باخیمیندان تاماماً اسکیسی کیمی‌دیر. مشروطیت دؤنمینده ایستانبولدا چیخان «اختر» قزئتی‌نی “تورکیه قزئتی” اولاراق آدلاندیرماق نه قدر یانلیشسا، وارلیق درگیسینی ده “تورکیه درگیسی” آدلاندیرماق بیر او قدر یانلیشدیر.
۶- گئچن آی درگی‌نین ایذنینی آلدیقدان سونرا وایبرله صرافی بگه خبر وئردیم. صرافی بگین جوابی چوخ سئویندیریجی و اومودلاندیریجی ایدی: «(ساعات ۱۰:۲۷) سلام محمدرضا بی، تورکیه‌ده وارلیق ژورنالینا مجوز آلا بیلدیگینیز اوچون اولدوقجا سئویندیم و سیزی تبریک ائدیرم. (ساعات ۱۰:۴۱) انشاالله وارلیق آدینی داها اوجالداجاق یئنی بیر مرحله‌نی باشلایاجاغیق. من الیمدن گلنی اسیرگه‌مه‌یه‌جگم. صاباح دوستلار ایله بیر گؤروشوموز وار. بو حاقدا آلدیغیمیز تصمیملری خدمتینیزه چاتدیراجاغام. بیر داها بو خوش خبره گؤره اؤز درین سئوینجیمی بیلدیریب، صمیمی تبریکلریمی بیلدیریرم ۲۰۱۵/۰۷/۲۳»
منیم جوابیم: «(ساعات: ۱۱:۰۵) سلام صرافی بگ، چوخ ساغ اولون. هامیمیزا مبارک اولسون. انشاالله یئنی دؤنم ده ان آز اؤنجه‌کی دؤنم قدر وئریملی اولار. عزیز دوستلارا دا منیم سلام و سایغیلاریمی چاتدیرین لطفا. سیزین و دوستلارینیزین اؤنری و دوشونجه‌لرینی گؤزله‌ییرم. سایغیلارلا. ۲۰۱۵/۰۷/۲۴
بو گؤزل دیلکلردن سونرا صرافی بگین امضاسی ایله بئله بیر یازی‌نین اینترنتده یاییلماسی هم اوزوجو هم ده دوشوندوروجودور. بلکه ده «دوست» سؤزو بیزیم اوچون آیری- آیری آنلاملار ایفاده ائدیر. چونکو صرافی بگین «صاباح دوستلارلا بیر گؤروشوموز اولاجاق» سؤزوندن سونرا بئله بیر یازی‌نین اورتایا چیخماسیندان آنلادیم کی، قلم دوستلارین الینده دئییل!
۷- و آنلاشیلان او کی، بوتون بو چابالاردان و اینترنت اوزریندن تخریبات آپارماقدان مقصد، وارلیق درگیسینه پارالل باشقا بیر وارلیق!!! چیخارتماق و بو قوتسال امانتی نئچه یئره بؤله‌رک اؤنجه لکه‌له‌مک، سونرا دا یوخلوغا چئویرمکدیر. «درگی‌نین بیر قولو بورادا چیخسین، بیر قولو اورادا چیخسین»، «محمدرضا هیئت‌ین چیخاردیغی درگی ایله وارلیق‌ین ساده‌جه آد بنزرلیگی وار» کیمی اوشاقسی جمله‌لر، نه وارلیق درگیسی‌نین گرچک یازارلاری اوچون، نه ده اؤز درگیسینه صاحیب چیخان یئنی نسیل اوچون ایناندیریجی دئییل. اگر گرچکدن ادعا ائدیلدیگی کیمی اورادا تورکجه درگیلر اوچون اویغون شرایط وارسا، توصیه ائدیرم هر شئیدن اؤنجه صرافی بگین قاپاتدیریلان “دیلماج” درگیسینی چیخارماق اوچون چالیشیلسین و “ائل‌بیلیم” درگیسی‌نین قاپادیلماسی‌نین قارشیسی آلینسین. اوندان سونرا دا یئنی تورکجه درگیلر یایینلانسین. آما دوروم بئله‌ایکن، اگر اورادا وارلیق آدی و لوقوسو ایله یئنی بیر درگی یایینلانیرسا بو ایشده ایش وار دئمکدیر و اونون کؤکونو باشقا یئرده آختارماق لازیم. چونکو هم یاسا دیشی (غیر قانونی)، هم ده اخلاقا آیقیری و عینی زاماندا مشروعیتسیز و باغیملی بیر درگی اولار و اونو چیخارانلار خالقین گؤزونده اعتبارلارینی ایتیررلر.
۸- دوکتور جواد هیئت‌ین شخصیتی، بیلیمی، شهرتی و موقعیتیندن دولایی معنوی بیر توخونولمازلیغی واردی. آنجاق بو اؤزللیک نه من ده وار، نه ده مشهور یازینی پایلاشانلاردا.
۹- بورادا بحث ائتدیگیم موضوعلارین هامیسی‌نین بلگه‌سی موجوددور.
۱۰- بو خوشا گلمز اولایا (علیهده‌کی مشهور یازی) باخمایاراق، وارلیق درگیسی بیر بوتوندور. بو درگی کیمسه‌نین مالی دئییل. او بوتون میلّته عادیدیر. سیمگه‌لشمیش بیر سرمایه‌دیر. بیز یالنیز و یالنیز اونون مسئولیتینی داشییریق. من بو حساس شرایطده وصیته گؤره حرکت ائتمگی اؤزومه بورج بیلیرم و امینم کی، دوکتور جواد هیئته سایغی دویان اونون وصیتینه ده سایغی دویار. من درگی‌نین صاحیبی دئییلم، درگی‌نین امتیاز صاحیبی‌یم. اونون اصیل صاحبیی آنا دیلینده تحصیل آلا بیلمه‌ین خالقیمیزین اؤلادلاری‌دیر.
سایغیلاریملا
محمدرضا هیئت
