تانینمیش آذربایجانلی شاعیر «فریدون حاصارلی» حیاتینی دئیشدی
الیمیزه چاتان خبره اساسن، چوخ تاسفله آذربایجانین تانینمیش شاعری و ادبی جمعیتیمیزده لاییقینجه سئویلن صمیمی انسان اوستاد فریدون حاصارلی شهریور آیی‌نین اوچونجو گونو تبریز شهرینده حیاتا گؤز یومموشدور.
اوستاد فریدون حاصارلی ۱۳۱۶ینجی ایلده جلفا ماحالی‌نین «یکان کهریز» کندینده آنادان اولموش و گنج چاغلاریندان آذربایجان دیلینده شعر یازماغا باشلامیشدیر.
سئویملی شاعریمیزین جنازه‌سی چرشنبه گونو (۴ شهریور) ساعات ۱۲ ده تبریزین وادی رحمت مزارلیغیندا تورپاغا تاپشیریلاجاقدیر. همن گون آخشام چاغی ساعات ۱۷ دن ۱۹ قده‌ر تبریزین رسالت خیاوانیندا یئرلشن امام حسن مسجیدینده شام غریبان مراسیمی و شهریورین بئشینجی گونو (آدینا آخشامی) اؤلومونون اوچونجو گونو موناسیبتیله لاله خیاوانینداکی امام حسین مسجیدینده خاطیره آخشامی کئچیریله‌جکدیر.
دورنانیوز آذربایجان خبر آژانسی امکداشلاری آدیندان اوستادین مؤحترم عائیله‌سینه، آذربایجان ادبی جمعیتینه و شاعر رضا حاصارلی(دومان) جنابلارینا باشینیز ساغ اولسون دئییب، اوستادین شرفلی خاطیره‌سینی عزیزله‌ییریک.
ایشیق