دیره‌نیش تشکیلاتینین سوزجوسو، خوجالی سوی قیریمی ایله باغلی دانیشدی
عزیز میللتیمیز
اوجورکی بیلیرسیز آزربایجانین حاضیردا بئش‌ده بیر توپراغی ائرمنیستان ـ روس اشغالی آلتیندادیر. بو ایشغال ۱۹۸۹ ـ جی ایلدن باشلادی. تاریخی آزربایجان توپراقلاریندا دئولت قوران ائرمنی‌لر ۱۹۸۹ دا آزربایجاندان تکرار توپراق ایدعاسی ائله‌دیلر.
ساواش طبلینه دویه‌رک، ساواش باشلاتماق ایسته‌دیلر. ساوتلر بیرلیی ییخیلدیقدان همن، ائرمنی‌لر روس اوردوسونون دستگی‌ایله آزربایجان توپراقلارین اشغال ائتمه‌یه
باشلادیلار و او توپراقلاردا اللریندن گلن جنایتلری اسیر گلمه‌دیلر و بو جنایتلرین ان وحشی‌سی ۱۹۹۲ ـ جی ایلده خوجالی شهرینده باش وئردی. روس ائرمنی اوردوسو خوجالی شهرینه گیره‌رک ۱۹۹۲ ـ جی ایلین، فئورالین ۲۶ سی( اسفندین ۷) آزربایجان اوشاغی، قادینی، یاشلی سیلاح‌سیز، ساونماسیز انسانلاری کوتلوی شکیلده ان وحشی‌جه‌سینه قتل‌عام ائتدی و یوزلرجه انسانی اسیر توتدو.
نه یازیق کی دونیا اجتماعیتی بونا گوز یومدو و اوزونو ایسلام دونیاسینین لیدری بیلن ایران ایسلام جمهوریتی‌ده بو اولایا گوز یوماراق، آزربایجانا دستک وئرمه‌دی کی هئچ، قارشی ائرمنیستان رژیمینه دستک وئریب اوندان حمایت ائتدی. ایه‌ر روسون سیلاحی سورساتی و ایرانین لوجستیک دسته‌یی اولماسایدی ائرمنی‌لر هئچ زامان اوزلرینه جرعت وئریب آزربایجان توپراغینادا گیره بیلمزدیلر.
بو گون ۲۳ ایل آزربایجانین اشغال ائدیلمه‌سیند‌ن کئچیر، باخمایاراق کی بو گونه قدر بیرلشمیش میللتلرین گوونلیک کونسئیی شورای امنیت‌ده ائرمنیستان ایشغالجیلیینا گوره دورد قطعنامه چیخاریلیب، آما دونیا اجتماعیتی سوسقونلوغوندان سو ایستفاده ائده‌رک ائرمنی‌لر اوز ایشغالچیلیغینا داوام ائدیرلر.
ایه‌ر دونیا اجتماعیتی، ایه‌ر باتی اولکه لری، آمریکا او زامان بو اشغالچیلیغا قارشی سس‌سیز قالماسایدیلار اوز تپکیلرینی گوسترسیدیلر بوگونلری روسیانین، گورجوستانا، مولداویا و اوکراینا قوشون چکمه‌لرینه شاهید اولمازدیق. و بیز اینانیریق کی ایه‌ر باتی‌لی‌لار پوتینی روسیه‌نی دوردورماق ایسته ییرلر ایلک باشدا کرگ قاراباغ مسئله‌سین حلل ائتسین‌لر. گوجلو بیر آزربایجان بولگه ده، باریش و ثوبات اوچون اونملی دیر.
بورادان گونئی آزربایجان‌لی اولاراق ائرمنی خالقینا دا سسله نیره‌م؛اونلار ایه‌ر رفاه ایسته‌ییرلر، ایه‌ر بولوکادان چیخماق ایسته‌ییرلر، ایه‌ر روس سومورگه‌چیلیی آلتیندان اوزلرین قورتارماق ایسته‌ییرلر در حال آزربایجانین اشغال اولموش توپراقلاریندان گئری چکیلمه‌لی‌دیر‌لر، بیزلر گونئی‌لی و قوزئی‌لی اولاراق باریش‌دان یاخشی قونشولوقدان یاناییق.اما اوز ایشغالی توپراقلاریمیزی‌دا آلماق اوچون گوجلو اوردوموز و خالقیمیز وار.
ایه‌ر ائرمنی‌لر ساواشى گوز اونونه آلیرلارسا، گرک ۳۵ میلیون گونئی آزربایجانی‌دا گوز اونونه آلسینلار، چون آزربایجانین اراضی بوتولویو بیزیم قیرمیزی چیزگیمیزدیر و آزربایجانین اراضی بوتویلویوندن مودافیعه ائتمک هر بیر آزربایجان‌لی‌نین ایستر گونئی‌لی و قوزئی‌لی میللی گوره‌وی‌دیر.
سونوندا وطن یولوندا، خوجالی‌دا و آزربایجانین دیگر ایشغال اولونموش رایون‌لاریندا شهید اولان، جانلارین فدا ائدن انسانلارین قارشی‌سیندا باش اییره‌ک، اونلارا آللاه‌دان رحمت دیله‌ییر و اومود ائدیرم کی تئزلیکله وطن‌لریندن، یوردلاریندان قاچقین دوشن سویداشلاریمیز و وطنداشلاریمیز تئزلیکله اوز دوغما یوردلارینا گئری قاییدسینلار.
قاراباغ بیزیم‌دیر بیزیم‌ده قالاجاق
اوردا بیر یول وار اوزاقدا، او یول بیزیم یولوموزدور، دونمه‌سک‌ده وارماساق دا او یول بیزیم یولوموزدور
آزربایجان میللی دیره‌نیش تشکیلاتینین سوزچوسو
بابک چلبیانلی
