ییرمنیجی یوز ایلین اوللری دوغو دونیاسی نین آیدینلیق دؤورونه گیرمه سوره جی اولموشدور. بو دؤنمده دوغو اینسانی توپلومسال ائوریم سوره جینده یئنی قاوراملارلا تانیش اولدو و یئنی جیل دوشونجه ایله یئنی تانیش اولان بو اینسان، گرچک عالمده اویقولاماغا چابا گؤستردی و تورکییه جمهوریتی ایله قوزئی آزربایجان جمهورییتی بو یئنی ائوره نین نسنه لیگی اولدو.

آزربایجانین بو توپلومسال ائوریمینده ان اؤنده گلن آدی محمد امین رسولزاده اولموشدور.  آزربایجان تاریخی رسولزاده نین یازارلیق و مبارزه دولو یاشامی ایله دوشونجه و میللی دیره نجه صاحیب بیر اؤندره مالیک اولدو. رسولزاده، علی بَی حسین زاده نین تورک دونیاسی اؤزنه سینی آزربایجان بایراغیندا نسنله شدیریب آزربایجان دؤولتچیلیغی نین تملینی قویدو. آرازنیوز سایتی اولاراق بو اولو اؤندَرین دوغوم گونونو بوتون اینسانلیق و آزربایجان تورکلویونه تبریک ائدیریک و اومود ائدیریک رسولزاده نین اثرلری دیققتله گنج نسلیمیز طرفیندن اوخونوب اینجه له نیرکن گونئی آزربایجان جغرافییاسی آیدین و میللی ساواش دویغوسونا صاحیب بیر قوشاق اولسون.