اون بئشینجی یوز ایلدن اعتباراً روس میللیتچیلیغی ایلَرله مه یه باشلامیشدیر. او دؤنمه دک دوغو دونیاسی نین بؤیوک بیر بؤلومونه تورکلر حاکیم اولموشلار. فقط روس میللیتچیلیغی نین آنا خطلریندن بیری، آچیق سولارا اولاشماق اولونجا اون بئشینجی یوز ایلده “قازان” ساواشی ایله باشلایان سورَجده روس دؤوولتچیلیغی ایلک آشامادا تاریخده تورکوستان بیلینَن و خزر دنیزی نین ساغ طرفیندن تا دوغوتورکوستانین باشکندینی ایحاطه ائدن جغرافیانی اؤز ایقتیداری آلتینا آلدی.

تورکوستان فتح ائدیلدیکدن سونرا روسلار خزر دنیزی نین سول قیسمیندا ایلَرله مه یه باشلادیلار و یئنی فتح لری نتیجه سینده او گونه دک بَیلربَیی سیستمی ایله ایداره اولونان آزربایجان جغرافییاسی گولوستان و تورکمنچای موقایله لری نتیجه سینده ایکی یه بؤلوندو. بو بؤلونمده آراز چایی ایکی بؤلگه یه سینیر اولاراق تعیین ائدیلدی. ۱۹۸۹ ایلینده قوزئی آزربایجان دا میللی اویانیشین یوکسلمه سی گونئی آزربایجان تورکلرینی ده ائتگیله دی و رحمتلیک ابوالفضل ائلچی بَیین اؤنده رلیگینده حرکت ائدن خالق جئبهه سینین گیریشیمی ایله بوتؤو آزربایجان ایده آلی یئنی دن جانلاندی. بو جانلانمانین ان باریز اؤرنه یی ۳۱ دئکابر ۱۹۸۹ ایلینده یاشاندی. گونئی آزربایجان و قوزئی آزربایجانی ایکی یه بؤلن آراز چایی تیکانلی سیملرله احاطه ائدیلمیشدی. چایین ایکی طرفینده یاشایان تورکلر بوگونده آراز چایینین قیراغینا آخین ائدیب و بو تیکانلی سیملری سمبولیک بیر صورتده اودا وئردیلر و ایکی طرفده کی خالق بیر-بیر ایله اوز به اوز حسرتلی شعرلر اوخویاراق بیر خالق اولدوقلارینی گؤستردیلر. ایران دؤولتی نین کودتاسینی اؤنله مک اوچون ابوالفل ائلچی بَی داها سونرا ایقتیداری حیدر علی یئفه وئرمک مجبوریتینده قالدی و حیدر علی یئف بو گونو تاریخده قالماسی اوچون دونیا آزربایجانلیلار همرأیلیک گونو اولاراق میللی بایرام اعلان ائتدی.
آزربایجان میللی دیره نیش تشکیلاتی نین خبر اورقانی اولاراق بوگونو دونیادا یاشایان ۵۰ میلیون آزربایجانلی یا تبریک ائدیب و میللی حسرتلرین گئده ریلمه سینی آرزو ائدیریک.

آزربایجان میللی دیره نیش تشکیلاتی نین خبر اورقانی
آرازنیوز وئب سایتی اَمَکداشلاری