کورد سیاسی-حربی پارتی‌لرینه باخارساق، ان گوجلولرینی بونلاردان عیبارت اولدوغونو سایابیلمک اولار : “کومله” ، “پژاک” ، ” کوردوستان دموکرات پارتیسی” ، ” ایرانین کوردوستان دموکرات پارتیسی”. کومله پارتیسینده ایندییه قدر بیر چوخ پارچالانما اوز وئرمیشدیر. پژاک ایسه پ.ک.ک نین ایران قولودور. بو پارتی‌لرین هر ایکیسی یعنی کومله و پژاک “کوردوستانین دوغوسو” سؤیلمیندن اوزون موددتدیر قوللانیرلار.
کوردوستان دموکرات پارتیسی ۱۹۴۵ ایلینده یارانیر و سونرالار آدینی ایرانین کوردوستان دموکرات پارتیسینه ده‌ییشیر. همین قوجامان کورد پارتیسی ۲۰۰۴-جو ایلینده پارچالاناراق کوردوستان دموکرات پارتیسی و ایرانین کوردوستان دموکرات پارتیسینه بؤلونور. حال حاضیردا کوردوستان دموکرات پارتیسی نین گئنل باشقانی خالد عزیزی و ایرانین کوردوستان دموکرات پارتیسی اسیه مصطفی هجری‌ باشچیلیغی ایله یونلدیلیر.
هر حالدا خالد عزیزی یؤنلندیردیگی پارتی ایفراطی میللیتچیلیک ادبیاتیندان قوللانیر و مصطفی هجری‌نین پارتیسینین مرکزی کمیته‌سین اوتوریته اولماقلا سوچلاییر.سون زامانلاردا سیلاحلی ساواشا قالخان بو پارتی اؤز گوجلرینی ایفراطی میللیتچیلیک ادبیاتی ایله جذب ائده‌بیلیر. بو ترورچو پارتی، “کوردوستانین دوغوسو” _شرق کردستان_ عیبارتینی اؤز بیلدیریش‌لرینده و سیاسی سؤیلمینده سیخ شکیلده قوللانماقدادیر. سون زامانلاردا هژار قاسمی آدلی عوضوونون اؤلومو ایله باغلی بیلدیریشینده بو سؤیلمدن قوللانماسینی بیر آیدین اؤرنک کیمی سونابیلریک.
“ارومیه اوستانی” و “کوردوستانین دوغوسو” سؤیلمیندن قوللانان کورد پارتیلر دقیقن هانسی بؤلگه لری قصد ائدیر و بو عیبارت هانسی جغرافیایی-سیاسی خریطه لری قاپساییر؟ کورد پارتیلری بو سورغویا رسم ائتدیکلری خریطه لرله آچیق شکیلده آیدینلیق گتیرمیشلر. بو اوزدن کورد ترورچو تشکیلاتلاری و حتی سیاسی تشکیلاتلاری اینانجیندا “کوردوستانین دوغوسو”، باتی آزربایجان، کوردوستان اوستانی،کرمانشاه و بو اوستانلارلا قونشو اولان ایلام و همدان اوستانلارینی قاپساییر.
نه ایسه، باتی آزربایجان مسئله‌سینه گلینجه، آزربایجان میللی حرکتی، اؤزونه آزربایجان میللتینین منافعینی قوروماغی هدف توتموش بیر سیاسی آخیم کیمی بو مسئله ایله ایلگیله‌نیر و طبیعی‌دیر کی بو سیاسی-کولتورل آخیمدا یئرآلمیش شخصلر و تشکیلاتلارین تپکیسی ایله‌ده قارشیلانیر. بو تپکیلر سونوجوندا کورد و آزربایجانلی سیاسی گروپلاری آراسیندا لفظی چاتیشمالار باشلانابیلیر.
کورد پارتی‌لر او جومله دن کوردوستان دموکرات پارتیسی باتی آزربایجان اوستانی حاقدا ایکی یؤنلو سیاسی سؤیلمدن قوللانیر. باتی آزربایجان اوستانین “ارومیه اوستانی” آدلاندیراراق، کوردوستانین دوغوسون ساوونار سیلاحلی گوجلرینی بو اوستاندا یئرلشدیریر. یعنی بو توپراقلاری کوردوستان حئسابلاییر و بو دوغرولتودا بو توپراقلاردا ایران رژیمی ایله موباریزه آپارماسینی مشروع ساییر. عئینی زاماندا بو توپراقلاری موناقیشه‌لی اولدوغو اوچون رفراندوملا گله‌جه یینین بلیرلنمه سینی ایره لی سورور.
بو ایکی یؤنلو سیاستین پرده آرخاسی دوشونجه‌لر وارمی دئیه سوالی یانیدلاماق اوچون بابک بی چلبیانلی ایله دانیشدیق و کوردلرین ندن باتی آزربایجان عیبارتی یئرینه ارومیه اوستانی و دوغو کوردوستان عیبارتیندن قوللاندیقلارینی سوروشدوق. چلبیانلی‌نین فیکیرنجه، کوردلر، یاییلماجی بیر سیاست‌دن قوللانیرلار و اونلارین آماجی بولانیق سودان بالیق توتماقدیر. ساوالان پورت‌لا دانیشیق آپاران سایین چلبیانلی “کوردلرین ایستر تروریست هورگوتلرى ایستر سیاسى پارتیلرى یایلماجى پولوتیکا اساسیندا باتى آزربایجانین بیر سیرا شهرلرینده دوغو کوردوستان خریطه‌سینده گوسترمگه چالیشیرلار. اونلار اورتادوغو فیرتیناسینى بیر تاریخى فورصت کیمی ده‌یرلندیررک چالیشیرلار بولانیق سودان بالیق توتسونلار، آنجاق بو ایدعادا اولان کوردلر آغیللارین باشلارینا توپلامالیدیرلار باتى آزربایجاندان بیر سانتیم توپراق قوپورماق اوچون گرک ٣۵ میلیون گونئى آزربایجان تورک اولوسونون اوستوندن گئچسینلر بوراسى اورمودور گونئى آزربایجان! بورا کرکوک، قامیشلى دئییل” دئدی.
بابک بی چلبیانلی کوردلرین ایشلتدیگی دوغو و یا باتی کوردوستان عیبارتلرینی حقوقی باخیمدان هئچ بیر استاتوسا مالیک اولمادیغینی سؤیله‌دی و بونو سادجه غیری-رسمی اولاراق قبول ائدیلمه‌سینی وورغولایاراق گرچک دوغو کوردوستانین آنلامینی اؤیرتمه‌یه چالیشدی.
“حاضیردا و تاریخسل اولاراق دونیادا موستقیل کوردوستان آدیندا بیر سیاسى ایدارى واحید اولمادیغى اوچون رسمى شکیلده دوغو و یا باتى کوردوستاندان دانیشماق دوزگون اولا بیلمز آنجاق کورد خالقى حاضیر دورد اولکه ایران، سوریه، عیراق و تورکیه سینیرلاریندا یاشاییرلار. اونلار غیری- رسمى اولاراق ایران دا یاشایان کورد بولگه‌لرینه دوغو کوردوستان، سوریه ده‌‌کیلره باتى، عیراق کورد بولگه سینه گونئى و ایران سینیرلاریندا یاشایان کورد بولگه لرینه دوغو کوردوستان دییرلر. بئله‌لیکله دوغو کوردوستان ایراندا کوردوستان و کیرمانشاه اوستانلاریندا کوردلرین یاشادیقلارى بولگه لرى سایماق اولار” دئیه دیره‌نیش تشکیلاتی‌نین مئدیا اوزره سوروملوسو قئید ائتدی.
حاضیردا واشینگتن‌دا موهاجیرتده یاشایان گونئی آزربایجانلی میللی فعال بابک چلبیانلی‌یا “کورد سیاسی- حربی پارتی‌لری او جومله‌دن کوردوستان دموکرات پارتیسی، سیاسی سؤیلم‌لرینده کوردوستانین دوغوسو (شرق کردستان) عیبارتیندن قوللانیرلار. بو عیبارتین دوغرو آنلامی نه‌دیر؟ بو عیبارتی دقیق اینجه‌له‌مک ایسته‌رسک بو عیبارت هانسی اراضینی قصد ائدیر؟” سوالینی وئردیک.
“وورغولادیغیم کیمی کورد تروریست هؤرگوتلرى و سیاسى قروپلار یایلماجى سیاستى اساسیندا گونئى آزربایجانا توپراق ایدعاسى ائدیرلر، اونلار اگر بو ایدعالاریندان واز گئچمه‌سه‌لر گونئى آزربایجان تورکونون اودو اربیلیده یاخاجاق. بیز دوستلوق و یاخشى قونشولوق موناسیبتیندن یاناییق اما اگر بیزیم توپراقلاریمیزا گوز تیکن وارسا گوزون اویاریق اوزانان ال وارسا اللرین قیراریق” دئیه دیره‌نیش تشکیلاتی‌نین عوضوو یانیدلادی.
او همچینین خالد عزیزی تشکیلاتی‌نین ایران ایطلاعاتی طرفیندن اویونجاغا چئوریلمه‌سینی ایدیعا ائدیب دئدی : “بو آرادا سایین خالید بَیه توصیه ائدیرم باشدا گئتسین ایکى کرئدیت جغرافیا درسى گئچیرسین سونرا دانیشسین. گورونن خالید افندى ایرانین یئنى اویونجاغیدیر. ایران ایطلاعاتى اونو یئملییرک دمکرات جاونلارینى باغدادى قوروماق اوچون ایشید (داعیش) ساواشینا گوندره‌دى و بیر چوخو اورادا هلاک اولدو. عزیز کورد جاونلارى گرک داها آییق ساییق اولسونلار چون عکس حالدا ایران رژیمى اونلاری اؤز پلانلاری دوغرولتوسوندا قوربان ائتدیره‌جک.”
کورد سیاسی تشکیلالاری طرفیندن ایره‌لی سورولن رفراندوم مسئله‌سی ایله باغلی؛ آزربایجانلی سیاسی تشکیلاتلاری او جومله‌دن دیره‌نیش رفراندوملا بو بؤلگه نین بلیرلنمه‌سینه اولوملو تپکی وئرمه‌ییبلر و بو توپراقلارین آزربایجان اراضیسی اولدوغونو وورغولاییبلار. موناقیشه لی توپراقلاری رفراندوملا هانسی اؤلکه‌دن اولماسینی بلیرلمه چوخ دموکراتیک بیر چؤزوم یولو گؤزه گلیر. بابک بی‌دن بونو باتی آزربایجان بؤلگه‌سینده نه بیچیمده و هانسی شراییطده قوللانماغین مومکون اولاجاغینی سوروشدوق.
“رفراندوم باتى آزربایجاندا سوز قونوسو اولا بیلمز چونکی بورادا نه مناقشه وار نه مسامحه. بیریلرى بیزه قوناق گلیب، سوفره میزى آچیب چوره گیمیزى پایلاشمیشیق ایندى نان‌کورلوق ائدیب و ادبسیزجه بیزدن توپراق ایدعاسى ائدنلرین جاوابى باشقا جور اولار. “ دئیه بابک چلبیانلی اؤز فیکیرلرینی پایلاشدی.
او همچینین آزربایجان‌دا قورولماسی موحتمل اولان دؤولت و حاکیمیتین چرچیوه‌سینده کوردلرین عئینی حاقلارا مالیک اولاجاقلارینی وعد ائدیب دئدی : باتى آزربایجان تاریخ بویو تورک توپراغی اولوب و بوندان سونرادا بئله اولاجاق آزربایجان توپراقلاریندا یاشایان هرکس دیلیندن، دینیدن، عیرقیندان آسیلى اولمایاراق آزربایجان وطنداشى ساییلیب و بیر آزربایجان تورکو کیمین عینى حقوقا مالیک اولاجاقلار.
هر حالدا گرچکلری نظرده آلیرساق، ایندیکی دورومدا باتی آزربایجان اوستانی ایران اؤلکه سینین اراضیسیدیر و هئچ بیر شخص و قوروم اینسانلارین اوستان آراسی و شهر آراسی موهاجیرتلرینین قارشیسینی آلابیلمز. آیدیندیر کی ایران اؤلکه سی نین سانترالیستال یؤنه تیمی بیر چوخ آخساقلیقلارا مالیکدیر. بو آخساقلیقلاردا اوستانلاردا موهاجیرتلرین سببی اولموشدور. ایران ایسلام جومهوریتی بؤلگه نی تهلیکه لی و گوونسیز ائدن سیلاحلی-تروریست پارتیلرین عمللری قارشیسیندا کوردوستان اوستانین گئری ساخلاییر و توپلومون ایشسیزلیک ندنلریندن آسیلی اولاراق باتی آزربایجان اوستانینا موهاجیرتلر چوخالیر. ایران دؤولتینین چیخاردیغی سایغاجلارا اساسن اؤلکه نین ان چوخ موهاجیر قبول ائدن اوستانلار سیراسیندادیر. کورد عاییله لرینین چوخ ساییدا اوشاق گتیرمه سینی نظرده آلساقدا بو بؤلگه نین ائتنیک باخیمدان جمعیتی نین ده ییشیله جه یینی تخمین ائتمک چتین اولماز. بونلارا رغمن آزربایجانلیلارین میللی حاکیمیت دن یوخسون اولمالارینی و کورد تروریست گروپلارین تهلیکه سینی نظرده آلاراق ایندیکی دورومدا آزربایجانلیلارین و میللی حرکتده اولان سیاسی شخصلر و گروپلارین گؤره‌وی نه دیر.؟ بونو آ.م.د.ت نین خالقلا ایلیشگیلر مسئولو ایله اورتایا قویدوق. او، باتی آزربایجان‌دا بؤلگه‌نین ائتنیک باخیمدان ده‌ییشیلمه مسئله‌سین پلانلی شکیلده کورد تروریست‌تشکیلاتلاری طرفیندن ایره‌لی سورولمه‌سینی ایدیعا ائدیب و ایرانلا ایلیشگیلری اویغون اولمایان اؤلکه‌لرین‌ده بو گئدیشلرده رولو اولدوغونو وورغولادی.
بابک چلبیانلی بو باره‌ده ساوالان پورت‌لا دانیشیقدا دئدی :“کورد مسئله سى نه یازیق کی حاضیردا ایرانین و بیرسیرا خاریجى گوجلرین آلتى اولوب ایران ایسه اوز عمرونو اوزاتماق اوچون هر طورلو چیرکین اویونا ال آتیر و اونلاردان بیر ایشی‌ده بیلینجیلى شکیلده باتى آزربایجان دا دئموگرافى ده‌یشتیرمه سیدیر. بو آرادا ایرانلا حسابلاشماق ایستین خاریجى اولکه لر ایسه ایرانى یارالاماق اوچون کورد ائتنیکینه دستک وئریر و اونلارین یایلماجى سیاستیندن حمایت ائدیرلر چون اونلار سادجه ایکى کوردوستان و ایران فاکتورونو نظرده آلیرلار حالبوکى اوراسى گونئى آزربایجان توپراقلاریدیر.
بابک چلبیانلی منسوب اولدوغو تشکیلاتین بو قونودا فعالیتلریندن دانیشیب دئدی : بیز آزربایجان میلى دیرنیش تشکیلاتى اولاراق باتى آزربایجاندا هر هانکى یارانان بیر اولاى اوچون تدبیرلریمیزى آلیریق گونلوک راپورلار توم شهرلر و کندلردن توپلاییب آنالییز ائدیریک و اونا گوره حرکت ائدیریک. باتى آزربایجاندا کورد تروریست هؤرگوتلرین سایى و سیلاحلارینین آمارى هرگون آلینماقدادیر و هر زامان تهلوکه حیس اولونورسا بویوک تورک خالقیمیزین دسته‌گى ایله گرکن جاوابى وئرمگه حاضیریک .
بو واسطه ایله آزربایجان میلى حرکتى چرچیوسینده فعالیت ائدن باشقا سیاسى پارتیلرى و عزیز میلى فعالاردان باتى آزربایجان داها آرتیق دیقت ائتمه لرین خواهیش ائدیرم.حاضیر چوخ حساس و تاریخى گونلر یاشاییریق هر هانکى بیر قصور بیزلرى آغیر دوروما سوروکله‌یه بیلر.
آزربایجان میلى دیرنیش تشکیلاتى اولاراق دوشمن لرین سالدیرسینا باخمایاراق گونو گوندن ایراده میز موحکملشیر چون وطن یولو میلت یولدور آرخامیزدا بویوک آزربایجان تورک میلتى وار ، وطنیمیزى میلتمیزى قوروماق بیزیم اوچون بویوک شرفدیر.

دانیشیغی آپاران: ساوالان پورت اینترنتی سیته سی