سیز نَسینیز؟- صیف الدین آلتایلی
“دونیا دوزلمیر کی، دوزلمیر بابا!” مممد آراز
قربین موستملکه‌چی قوه‌لرینین رهبر ایشچیلری اولوسلار آراسی ییغینجاقلاردا نووه سلاحلارینین ایختیصار ائدیلمه‌سی، کلوروفلوروکاربون گازلارینین بوراخیلماسی و … ایله باغلی موذاکیره‌لرده تئز-تئز بو ایفاده‌لری ایشلدیرلر: “بو دونیا هامیمیزیندیر، بو دونیانی قورومالیییق. چونکی هامیمیز بورادا یاشاییریق، طبیعتین طارازلیغینی داها آرتیق تخریب ائده بیلمَریک و … و …”
گئدیب آداملارین یاخاسینا یاپیشیب گؤزونون ایچینه باخا-باخا سوال وئره‌جکسَن:
“آغالار، دئدیکلرینیزده صمیمیصنیز؟!”
آمئریکا قیتا‌سی تاپیلاندان سونرا اورانین یئرلی خالقینی، یعنی قیزیلدریلیلری و آزتئکلری سویقیریملا محو ائدیب آخیرینا چیخدینیز. یوزایللر بویو گوجونوزون چاتدیغینی وحشیجه‌سینه اَزیب چیغنادینیز. خیروشیما و ناقازاکیده ایلک دفعه آتوم بومباسینی پارتلادیب اون مینلرله اینسانی بیر آندا محو ائد‌رک سویقیریم تؤرتدینیز. او گوندن اوزوبری ده سلاحلانما یاریشینی ایمپئریالیست پسیخوزونوزو تامین ائتمک مقصدیله سرعتله یئریدیرسینیز…
اولجه گمیلرله و عصرین ان معاصر سیلاحلارییلا آلتدان گئیینیب اوستدن قیفیللاندینیز قول اووونا چیخدینیز. توتا بیلدیینیز یازیق آفریقالیلاری آپاریب اسیر بازارلاریندا ساتدینیز. ساتین آلدیغینیز کؤله‌لره هر جوره اینسانا ضد عمللری روا بیلدینیز. ایچینیزده دونیایا گلیب بؤیویَن و سیزه خیدمت ائد‌ن او یازیقلارین دریسینین رنگی قارادیر دئیه اونلارین سیزینله عینی آوتوبوسدا، قاطاردا، گَمیده سیاحت ائتمه‌سینه، عینی مکتبلرده تحصیل آلماسینا، عینی کیلسه‌لرده عبادت ائتمه‌سینه، عینی محله‌لرده یاشاماسینا، عینی یئمکخانالاردا یئمک یئمه‌سینه و … شدتله موخالیفت ائتدینیز، قویمادینیز. کئفینیز ایسته‌ینده اونلاری وحشیجه‌سینه دؤیه-دؤیه قتله یئتیردینیز و “زنجی ده اینسان‌دیرمی، اونو اؤلدوردویومه گؤره هئچ کس منه سورغو-سوال ائده بیلمز” دئیه سینه‌نیزی گره-گره اؤز آغلینیزجا فخر ائتدینیز.
آرادان ایللر اؤتدو و فیکیرلشه-فیکیرلشه یئنی-یئنی شیطانلیقلار تاپدینیز. اللرینیزه بابالارینیز طرفیندن تحریف اولونموش مقدس اینجیللری آلیب آفریقایا آپاردینیز. یازیق تمیز اورکلی آفریقالیلار قارشیسیندا تیراگیکومیک اویونلار صحنه‌یه قویدونوز و مین بیر جیلده بورونوب اونلارا بیر واختلار کئشیشلرینیزین جننتین آچارلارینی عوام خالقینیزا ساتدیغی آنلارداکی ساختاکارلیقلارلا یاخینلاشیب؛ “سیزی او بیری دونیادا خلاص ائد‌جک دینی گتیردیک، گلین بو دینه گیرین و او بیری دونیادا خوشبختلییه نایل اولون، جننتین آچاری بیزده‌دیر، بیزیم دئدیکلریمیزه فیکیر وئرین و بیز ده سیزه ال توتاق، الله دوستو ائلَیَک” دئیه‌رک، یازیقلاری الله و دین‌دن اؤز ماراقلارینیز اوغروندا سوی-ایستیفاده ائد‌رک آلداتدینیز. آفریکالی بیر زنجی لیدئرین دئدیگی کیمی، سیز اورالارا گئدرکن اللرینیزده اینجیللرینیز، اونلارین الینده ایسه محصولدار تورپاقلاری واردی. سیز اینجیللری اونلارا وئردینیز، اونلارین الین‌ده‌کی تورپاقلاری آلدینیز. آلدینیز، آنجاق اؤز تورپاقلاریندا قارین توخلوغونا ایشلتدیینیز اینسانلارین اینسان کیمی قیدالانماسینا بئله دؤزه بیلمدینیز. هر ایل موختلیف یاریشمالار تشکیل ائتدینیز، ائدیرسینیز. آج قویدوغونوز آفریقالی اوشاغین اؤلمه‌سینی آرخادا یئره قونموش حالدا گؤزله‌یه‌ن قارتالی و اوشاغین شکلینی چکه‌ن آدامینیزا “چوخ گؤزل و ماراقلی شکیل چک‌می‌سن” دئیه‌رک موکافات دا وئردینیز. آفریقانی بیر باشدان بیر باشا آددیم-آددیم بؤلدونوز و هر بیرینیزین پایینا دوشه‌نی گؤتوردونوز، حتی بو بؤلوشمه‌لر اوغروندا ایکی دونیا حربی یاراداراق بیر-بیرینیزی بوغازلادینیز، وامپیرلر کیمی قانینیزی ایچدینیز. نئچه اون میلیونلارلا محو اولموش اوجاقلاردان، یئرله-یئکسان اولان دونیالاردان، آناسیز، آتاسیز، یارسیز-یولداشسیز، کیمی-کیمسه‌سیز قالان معصوم اینسانلاردان داشا دؤنموش اورکلرینیزله درس آلمادینیز. موستملکه‌چی قورساغینیز ایرَنج ماتئریالیزملیغینا ائله بولانیب‌دیر کی، دونیادا هئچ نیی وئجینه آلمایان آج گؤزلویونوزو تامین اوچون یئنی-یئنی اوجاقلاری سؤندورمکدن ایندی ده ایمتیناع ائتمیرسینیز. آفریقا هله ده اویونجاغینیزدی. شئیخلیکدن، کراللیق‌دان و اؤز خاندانلیغیندان ساوایی اؤزگه بیر دونیا نیظامینی قطعی شکیلده آغلینا دا گتیرمه‌ین، گؤزو کورشالمیش و جهالتین پنجه‌سینده‌کی عرب دونیاسینی بارماغینیزدا اوینادیرسینیز. هئلیکوپتئرلرله گتیریب دؤولت رهبرلیگی تاختینا اوتورتدوغونوز اینسانلاری ایگیرمی ایل سونرا “کوتلوی قیرغین سلاحلارینیز واردیر، دئموکرات دئییلسینیز، اینسان حقوقلارینی تاپدالاییرسینیز” بهانه سیله آرادان گؤتورورسونوز و گویا گتیردیینیز دئموکراتییا ایله اونلارین خالقیندان هر گون اورتا حسابلا یوزلرله اینسانی قتله یئتیردیرسینیز. ان بؤیوک شهرلرینیزده و پایتاختلارینیزدا اویوشدوروجو مادده‌لرین ساتیلدیغی و ایستیفاده ائدیلدیگی ساحه‌لر یارادیرسینیز. اویوشدوروجو مادده تیجارتینین جیلووونو الینیزده ساخلاییرسینیز و ایستدیینیز اؤلکه‌یه ایستدیینیز قدر اویوشدوروجو مادده سوخورسونوز. سونرا دا آیاغا دوروب معین اؤلکه‌لره، یعنی یئرآلتی ثروتلری ایسته‌نه‌ن قدر بول اولان اؤلکه‌لره، “اویوشدوروجو مادده‌لری ایستئحصال ائدیب اینسانلاری زهرلَییرسینیز، بو سببله سیزه دئموکراتییا گتیرجییک، سیزه اینسانلیغی سئومیی و اونو قوروماغی اؤیردجییک” دئییب اورالاری ایشغال ائدیر و یئنیجه بوراخدیغینیز سلاحلارینیزی اورالارداکی یازیق اینسانلارین اوستونده سیناییرسینیز. اونلاری اینسان یوخ، سلاحلارینیزی اوستونده سینادیغینیز سیناق مخلوقاتی گؤزونده گؤرورسونوز. سونرا دا دوروب، تاریخی اینسان سئوگیسیله دولو، هر خالقا، هر میللته، هر مدنیته نهایت‌سیز میدان بوراخان، اونلاری کؤلگه‌سی آلتیندا یوزیللر بویو فیراوان و خوشبخت یاشادان بیزلره “باربار، سویقیریمچی” آدینی قویورسونوز.
سیزده نه اوز وارمیش ایلاهی…؟!
دوز یوز ایلدیر آختاردیغینیز حالدا بیزیم سویقیریمچی اولدوغوموزو ثبوتا یئتیره‌جک بیر دَنه ده سند تاپمادیغینیزی بیله-بیله اوزونوز قیزارمادان و یالان دئدیینیزی بیله-بیله بیزی اتهام ائدیرسینیز.
دونن خوجالی‌دا تؤرتدیردیگینیز سویقیریمی آغلینیزا دا گتیرمیرسینیز…
دوغرودان دا، سیز نَسینیز!..
(ایسته ین مئدیا قورومو مقاله نی یایا بیلَر)
کؤچورَن: آرازنیوز