تبریز سسی خبرـ یوروم سیته‌سی‌نین یادداشتی؛ سولدوزون آجیلی حادیثه‌سی، سویقیریمی
یازین خوش- صفالی گونلریندن بیرینده بیز، آزربایجان تورکلرینه پای بؤلدولر، بورا اولدو بیزیم‌کی، نبیلیم هارا دا، اولدو سیز آزربایجان‌لی‌لارین‌کی، بویورون تئز اولون‌کی، بیزیم‌ده ایشیمیز وار، سیلاح‌لارینی اوزوموزه شوشله‌ییب تئز اولون، ال دبردین، یوخسا شهری یئرله یئکسان ائدریک دئیه، شهرین اورتاسیندا رئژه کئچیب، مانوور وئرمه‌یه باشلادیلار.
۳۱–فروردین-۱۳۵۸ سولدوزون کوردوستان دئموکرات حیزبی و اونون باشچی‌سی قاسیملو الیله تؤره‌دیلن بو سوی قیریمین یارانماسینین، ایل دؤنومودور. دورمادان، دینله‌مه‌دن، دوشمنی ترسه توتاراق یا دوشونه‌رک، یا دا بیله- بیله بیزیم بو کورد قونشولاریمیز، فارس حاکیمییتیندن ایستمه‌لرینی، بیزدن، بیز آزربایجان تورک میلتیندن آلماق ایسته‌دیلر. کئچمیش‌لرده آلدیقلاری بس دئییلدی، یئنه‌ده ایسته‌دیلر، سولدوز (نقده)کوردلرین‌کی‌دیر، یئرلی‌لر، اهالی تئز بوشالتسین، ائله نقد قویسون اووجوموزا، یوخسا، بو ایز، بو نیشان، گؤرورسونوزکی، الی دولو گلمیشیک. سویوق‌بولاق (مهاباد) پادگانین‌دان قرات اولان سیلاح‌لارلا(۳۰-بهمن ۱۳۵۸) ایرانین کوردوستان دئموکرات حیزبی فروردین‌ین آخیر گونلرینده سولدوز شهری‌نین اورتاسیندا یاراقلی رئژه‌یه باشلادی، شهرین آدلیم آداملاری بو ایشی ان آزی شهر اورتاسیندا یوخ، باشقا یئرده اولماسینی ایسته‌دیلر. موللا صلاح(سولدوز کوردلری‌نین آخوندو) ایله عبدالرحمن قاسیملو، حیزب اؤنجولو، قابول ائتمه‌دیلر هئچ، شهری بوشالدیب، تسلیم ائتمه‌سینیده اونلاردان ایسته‌دیلر و دورمادان، دؤزمه‌دن ایچری تپیلیب ورزیش ایستادیومونا ییغیشدیلار. بونو گؤرن، شهرین تورک اهالیسی، چاراسیزلیقدان، ائحتیاتلی اولاراق، تک-توک شخصی سیلاح‌لاریلا، ائولرینین اوستوند، پوسقایا گیردیلر(سنگر).بو آرادا بیر قورشون آتیلماقلا ، هرنه دیدی بیر- بیرینه، تپه‌دن – دیرناقادک یاراقلانان کوردلر، خییاوان‌لارا تؤکوله‌رک، قاباقلارینا نه گه‌لیر، ارتئشین اوتوموتیک سیلاح‌لاری ایله اود پوسگؤردولر(یاغدیردیلار). عمومی قیرقین باشلاندی، اما شهر تسلیم ائدیلمه‌دی و ۳-گونه‌ده‌ک جان-مال – ائو – وطن- ناموسلارینی قوروماقا باشلادیلار، مؤهؤمماتلاری قورتارماقدایدی، نئیله‌مک، بیر سیرا اهالیدن اؤزونو، اورمویا یئتیره‌رک، شهر ایچینده نه‌لر اولدوغونو، بیلدیره‌رک، یاردیم ایسته‌دیلر. اورمونون ایمام جومه‌سی واسیطه اولاراق، ارتئشدن،۲- نفربر و ۱۰۰۰ دانا سیلاح آلاراق، بیر بیلگی یاییب، جماعاتدان یاردیم ایستمکله، سولدوزا دوغرو یولا دوشورلر. جماعاتدان دا قاتیلانلار ۶۰۰-زه یاخین، سحر تئزدن یولا دوشوب، گئجه، ساعات ۱۱-ده سولدوز یاخینلیغیندا بیر کندین یاخینلیغیندا مؤوزه توتورلار، گئجه‌نین یاریسیندا، شهرین ایچینه گلیب ، یوروش ائدنلری بیر سس اوجال‌دانلا باریشا چاغیریرلار. کوردوستان دئمکرات‌لار حیزبی، سس کسیلدیکدن آمان وئرمه‌ییب، آتش آچیرلار و دؤیوش باشلانیر. حیزبیچیلر داوام گتیرمه‌دن، قادین – اوشاقلاری گیرؤوه توتورلار، چوخ دیقتلی یوروشلرله گئرووگانلار آزاد ائدیلیب، حیزبین عملیات سیتادینا یوروش گئدیر و اله آلینیر، اوندان سونرا دؤیوشلر شهردن قیراقا چکیلیر و شهر ائو آراسی تئرورچولاردان تمیزله‌نیر. حسنی‌نین بو چوخ دیقتلی،هیزلا گئدن یوروشوطرفی باریشا مجبور ائدیر و سولدوزلولارین، هم‌ده بوتون آزربایجان‌لی‌لارین ازبرینده بیر ائلیمیزه، یوردوموزا سیلینمه‌یه‌ن، داییمی یاشاماغا جاناتما خاطیره‌سی قالیر، و اونو بیر قهرامانجاسینا باغیرلارینا باسیرلار. کاش وطنیمیز آزربایجان یولوندا، باشقا روحانی‌لریمیز‌ده بئله اولایدی.
او گوندن بری داها، بئله قیرقینلارا کوردلرین تئرورچولاری ال اوزادانمادیلار، اما، هردن بیر، بورا بیزیمدیر، ورا بیزیمدیر، دئیه گونئی آزربایجانین توپراقلارینا گؤزتیکه‌رک، فارس ایستیمارینین دییرمانینا سو توکمه‌ده‌دیرلر. اولسون‌کی، عاغیلا- باشا گلیب و او شریک دوشمانی توتسونلار.
