تبریز سسی خبر ـ یوروم وب سیته‌سی‌نین یادداشتی: دیشاری‌دا قورولان کئچیجی گونئی آزربایجان پارلمانینا باخیش
۱۵-مارت -۲۰۱۴ ده دانیمارکانین کوپئنهاگ شهرینده قورولماسینی بیلدیرن ۹ نفرلیک قوروجولارینا گؤره، بو قورولتای‌دا گ.آز. آ کئچیجی پارلمان یارادیلیب و وارلیغی دونیایا بیلدیریلدی. بیلدیگیمیزجه ۲۶ نفردن اولوشان بو قورولتای پارلمانین یارانماسینا قول آتیب و ایشه باشلاماسینا قرارلاشیب‌دیر، آنجاق بیر توپلانتی‌دا، او تاریخدن ۲ آی سونراسینا نظره آلیبلار کی، اورادا اورتایا چیخان و گؤرونن چتینلیک‌لری گؤتور-قوی ائدیب، چؤزوب یولونو هامارلاسینلار. بو خبر یاییلدیقدان سونرا اینجله‌مه‌لر، آچیقلامالار، گؤتور-قوی ائتمه‌لر باشلادی و قونوشمالار، دانیشیقلار (موصاحیبه‌لر) آپاریلدی. چوخلو اوی وئرن و قارشی چیخان‌لار اولسا دا هله‌ده‌بیر اورتاق نوقطه‌یه یئتیشیلمه‌ییب‌دیر.
یؤنچو(مووافیق)لره گؤره، زامان بیزی گؤزلمیر اؤلکه‌ده -اورتا دوغودا دییشیکلر هیزلا گئدیر و گئری قالمیشلار آیاق آلتیندا قالیب تاپدالانیرلار، باشقا یؤندن اولوسلار آراسی اورگان‌لارا گیرمه و سؤزو-سووو چاتدیرماغا چتینلیک‌لر وار و بیر اؤرگوت(تشکیلات) کیمی او یئرلره گئتمه گره‌کیر. اوزون زامان‌دیر دانیشیب-قونوشمادا قالمیشیق، نئچه دؤنه چاغیریش اولوب باش توتماییبدیر. چاغیریلانلارین چوخو گلمیرلر و بو یؤندن سوچلودورلار ،۲۰۰۹- دا و ۲۰۱۱-ده بو قونودا چاغریلیش اولدو و بوگون –صاباح ائله‌دیلر، گلدیک بو گونه چاتدیق، بو گونده ده ایشه کئچمه‌سه‌یدیک، نه زامانا قالاجاغیدی بللی دئییلدی(ائلدار قاراداغلی، اوجاق تی‌وی ایله موصاحیبه‌ده ).پارلمانین مووققتی(کئچیجی) اولماسینا تاکید اولوبدور و شاییعه‌لر اوزرینده دئییر کی هئچ ده تشببوس دئییل و ایکی آیین ایچینده قورولاجاق دیر. باشقالاریندا آزجا اویان –بویان یوموشاقلیقلار گؤرونور.
قارشی دورانلار(موخالیف‌لر) پارلمان اولماسینی گئرچک بیر نییاز گؤرورلر آما اونون قورولماسینی بو راحاتلیقدا و یونگول‌لوکده سانمیرلار، اونو تم تله‌سیک، گیزلین و قاپالی فورمادا اولدو و آز ساییلییدی، پارلمان قورماغا یئترلی دئییلدیر، اونا پارلمان آدینی قویماق دوغرو دئییلدی، بئله گئدرسه بو آد دا باشقا کئچمیشده‌کی‌لرتک، یئرسیز آرخاسیز آدا چئوریله‌جکدیر. اونون ایچری ایله باغلیلیغی یوخدور و گوجسوز –آرخاسیزدیر. ائله ایندیدن ایکیجه‌لیک‌لر یارانیب بؤیومکده‌دیر ائله‌کی، بیر سیراسی اونو تشببوس(ال اوزادما، الده ساخلاما)و باشقالاری ایشه باشلاما بیلیر. ایچرینی اوقدر ده سیاسی لشمیش بیلمه‌ییب و کولتورل-سوسیال(ایجتیماعی) دؤنمینی کئچیرمک‌ده گؤرورلر و بئله دوروم‌دا پارلمان گوجسوز-آرخاسیز اولور و گئت-گئده گوجدن دوشرکن گئچمیشده‌کی داک، میللی شورا، کونسئی، گاماج و باشقا.
آزجا دیقتلی اولاندا هر ایکی یؤنده ده دانیلماز دوروم‌دا گئرچکلیک‌لر گؤرونور. بیز ایچریده‌کی لره بئله نظره گلیرکی گئچمیشده بو ایشه گؤره چاغیریلیشلاری دانماغ اولماز، گلمه‌یه‌نلری شاید ده سوچلو حسابلاماق اولار آما بیر باشا قووماق دوغرو دییل. گؤرونورکی، ایندیلیک‌ده هم ائشیکده هم ده ایچریده چوخ بؤیوک-بؤیوک چتینلیک‌لر وار و بیر اوزوجو دوروم‌دا هله‌لیک دایانمیشیق، ایچریده گئتدیکجه جماعتی اورتایا چیخارما و خییاوان – مئیدان اعتیراضلاری یولا سالما چتینلشیب و بیرجور سولقونلوق گؤروندویونده، رئژیم ده دیقتینی فارسجایا عایید اولمایان میللی ترپه‌نیشلره آرتیریب‌دیر. ایچریده هله‌ده دین جمعییت‌ده آرتیق رول اویناییر و اوممتچیلیکدن، میلتچی‌لیگه دؤنوش اؤنملی بیر دوروما گله‌بیلمه‌ییر.باشقا یؤندن دیشاریداکی سیاسی تشکیلاتلار اؤز ایچریلرینده اساس و بینؤوره‌لی قونولاردا هله ده بیرلشه بیلمیرلر، دییالوق آپارمادا دؤزوم سوزدورلر و کئچمیشده قورولان اورگوت‌لر یولاچیجی اولاماییب و چوخ حالدا ایچریدن قول آییرما دورومونا یاخینلاشیرلار. هر ایکی یؤنده بئله بیر کاپالی دوروما گلیب چاتما دؤزوم‌له، دانیشمالاری، قونومالاری آرتیریب اورتاق‌لیقا چاتیب و آشاغی سوییه‌لی ایختیلافلاردان وازگئچمه‌لییک.
تبریز سسی خبر ـ یوروم وب سیته‌سی
۰۴/ آپریل /۲۰۱۴