سئوگی و آزادلیق
گۆنئی آزربایجان‌دا قادینلارین سئوگی و آزادلیق دوشونجه‌سی تکجه شخصی دویغولار ایله یوخ، اونلارین توپلومداکی یئری و موباریزه‌سی ایله ده باغلیدیر. سون ایللرده ایران‌دا، اؤزللیکله تبریزده باش وئرن حادیثه‌لر قادینلارین آزادلیق یولوندا نئجه جسارتله آددیملادیغینی گؤستردی.
اعتراضلارین ایلک گونلرینده اعتراضچیلارا قاتیلماقدان شوبهه دویان و یا اورکلرینده قورخو حیس ائدن اولسا دا، بو قورخو همن یئرینی جسارته و قهرمانلیغا و قرارلیلیغا وئردی. پولیس چوخ ایدی و کوچه‌لر قورخونج گؤرونوردو. آما بیر قادینین جسارتی و سسی بو قورخونو سیندیردی و اعتیراضلار باشلادی. بیر نئچه گون دوام ائدن بو اولایلار قادینلارین یالنیز اؤز آزادلیقلاری اوچون دئییل، هم ده میللتین تاپدالانمیش حاقلاری اوچون نئجه موباریزه ائتدیکلرینی گؤستردی.
بو اعتیراضلارین ان تأثیرلی آنلاریندان بیری گنج قیزلارین آنالاری و دوستلاری ایله بیرلیکده شهرلرده ال-اله وئریب آزادلیق اوچون سسلرینی اوجالتدیقلاری آنلار ایدی. اونلار قورخمادان مئیدانا چیخدیلار، گئری آددیم آتمادیلار. اگر بیر کیشی یارالاندی ایسه، قادینلار درحال اونا یاردیم ائتدیلر.
بو اعتیراضلاردا اؤز گؤزلریمله گؤردوم کی، قادینلارین جسارتی خالقین قارشیسینا چیخان گوونلیک گوجلرینین جانینا قورخو سالمیشدی و بونو هر حاللاریندان گؤرمک اولوردو. ان ماراقلی شئی قادینلارین ساییسینین کیشیلردن داها چوخ اولماسی ایدی. یاشیندان آسیلی اولمایاراق، گنج و یاشلی قادینلار بیرلیکده موباریزه مئیدانینا یعنی خیابانلارا آددیم آتیب اعتراض ائدیردیلر. اونلار یوکسک سسله بئله دئییردیلر:
«آزادلیق، عدالت، میللی حؤکومت»
بو موباریزه‌ده بیر چوخ اینسان حایاتینی ایتیردی. آیلار حقی و حدیث نجفی کیمی قهرمان قیزلار بو حرکتین رمزی اولدولار. اونلارین اؤلومو گونئی آزربایجان قادینلارینین موجادیله‌سینین اونودولماز و دانیلماز پارچاسینا چئوریلدی.
گونئی آزربایجان قادینلاری یالنیز اؤز حاقلاری اوچون دئییل، بوتون دونیا قادینلارینین حاقلاری اوغروندا موباریزه آپاریر. اونلار سئوگی ایله مئیدانلارا چیخیب، بیرلیکده اعتیراض ائدرک، داها گوجلو و جسارتلی اولدوقلارینی گؤستردیلر.
بو موجادیله، سینیرلاری آشاراق باشقا اؤلکه‌لرده‌کی قادینلارا دا ایلهام قایناغی اولدو. آنا یوردوموزون دیگر پارچاسی اولان قوزئی آزربایجان جمهوریتی‌نده قادینلار سمبولیک فعالیتلرله بو حرکته دستکلرینی ایفاده ائتدیلر. دونیانین دؤرد بیر یانیندا آزادلیق‌سئور اینسانلار آراسیندا دایانیشما روحونو دیرچلتدی و اؤزگوون حیسینی گوجلندیردی. بونون اوچون ده، قادینلارین بو موجادیله‌سی ساده‌جه بیر بؤلگه‌نین اینسانینین آزادلیغینا دئییل، بوتون بشریتین داها یاخشی و اینسانی شرایطده یاشاماسی اوچون یارانمیش بیر فرصت اولدو.
دونیانین هر یئرینده قادینلار، بو موباریزه‌یه دستک وئرمک اوچون میتینگلر و ائتکینلیکلر تشکیل ائتدیلر. اونلار یالنیز اؤز آزادلیقلاری اوچون دئییل، هم ده گله‌جک نسیللر اوچون داها عدالتلی و آزاد بیر توپلوم و وطن قورماق اوغروندا موباریزه ائدیردیلر و بو موباریزه دوام ائدیر. سئوگی و بیرلیک ایچینده باش وئرن بو حرکت تاریخده درین ایز بوراخدی. بوتون چتینلیکلره باخمایاراق، گونئی آزربایجان‌دا قادینلار هله ده آزادلیقلاری اوغروندا موباریزه‌نی دوام ائتدیریرلر.
هئچ بیر قوشوموز اولمامالیدیر کی، اونلار یاخین گلجکده تکرار آیاغا قالخیب آزادلیغی هایقیراجاقلار، آنجاق بعضن یازاراق، بعضن سؤزلرینی یایاراق و بعضن ده فرقلی مدنی اطاعتسیزلیک مئتودلاریلا سسلرینی اوجالدیرلار و هئچ زامان گئری آددیم آتمیرلار. چونکو آزادلیق اونلار اوچون ساده‌جه بیر حاق دئییل، حایاتین اؤزو دئمکدیر.
بیزیم قادینلار سئوگینی تکجه شخصی موناسیبتلرده دئییل، هم ده وطنلرینه، تورپاقلارینا، کیملیکلرینه اولان باغلیلیقلاری ایله ایفاده ائدیرلر. اونلارین سئوگیسی آزادلیق اوغروندا موباریزه آپارماق، قورخمادان خیابانلارا چیخماق و گله‌جک نسیللره آزاد بیر وطن میراث قویماقدان عیبارتدیر. بو سئوگی آزادلیقلا بیرلیکده یاشاماغا داوام ائدیر.
یازی دیرنیش گنجلیگی درگیسی‌نین ۶-جی ساییسیندا یایینلانمیشدیر.
