توپلوموموزدا سئوگینی دیله گتیرمه‌نین چتینلیکلری
👤 گونش ایشیق
سئوگی، یالنیز بیر اولای دئییل، گؤرونمه‌ین بیر جادودور. او، فیزیکی شکیللره سیغماز، لاکین حرکتلرده، سؤزلرده، باخیشلاردا و گؤستریملرده جان تاپار. بیر شخصین سئوگیلیسی اوچون سئوگینی ایفاده ائتمه‌سینین نئچه یولو وار: تصدیق‌‌ائدیجی سؤزلر، کیفیتلی واخت آییرماق، هدیه‌لر آلماق، ایلگی گؤسترمک و فیزیکی تماس. هر بیری، عشقین بیر رنگی، بیر نغمه‌سیدیر.
سئوگینی ایفاده ائدن سؤزلر، دویغولاری چاتدیرمانین ان جادولو یولودور. سئوگی دیلینده، سؤزلر بیر شاعردیر، بیر موسیقیدیر. تقدیر ایفاده‌لری، عشقی چاتدیرماق اوچون گوجلو بیر واسیطه‌دیر. سئوگی‌دولو سؤزلر، سئویلن شخصی دگرلی حیس ائتدیریر، اونو تشویق ائدیر و تقدیر اولونما احتیاجینی قارشیلاییر. هر سؤز، بیر گول کیمی آچیلیر و قوخوسونو یاییر.
فیزیکی تماس، عشقی ایفاده ائتمه‌نین ان گوجلو یوللاریندان بیریدیر. فیزیکی یاخینلیق، عشقین دواملیلیغی اوچون حایاتی اهمیت داشیماقلا بیرلیکده، فردلرین اوشاقلیق دؤورونده‌کی دویغوسال گلیشیم سوره‌جینده ده اؤنملی رول اویناییر. لاکین هر توپلومون سئوگی گؤسترمه بیچیمی فرقلیدیر و فیزیکی تماسین بیر ایفاده شکلی اولاراق قبولو دگیشکه‌نلیک گؤستریر. بعضی مدنیتلرده آشکار سئوگی ایفاده‌لری خوش قارشیلانمایابیلر.
فردین کاراکتئر اؤزللیکلری ایله یاناشی، اونو یئتیشدیرن عاییله و یاشادیغی توپلوم و مدنیت ده سئوگینی ایفاده ائتمه بیچیمینی بؤیوک اولچوده ائتکیله‌ییر. گونئی آزربایجان’دا، گله‌نکلر و اینانجلار ایله اؤلکه قانون‌لاری، بو بؤلگه‌ده یاشایان اینسانلارین سئوگی دیللرینی ائتکیله‌ین ایکی اساس فاکتوردور. اسکی تورک گله‌نکلرینده، والدینلرین اوشاقلارینا سئوگی گؤسترمه‌سی و یا سئوگیلیلرینه یاخینلیق گؤسترمه‌سی، بؤیوکلرین حضوروندا حؤرمتسیزلیک اولاراق قبول ائدیلیردی. بو آنلایش یاواش-یاواش دگیشسه ده، فردلرین هم شفاهی، هم ده حرکتلرله سئوگیلرینی ایفاده ائتمه احتماللاری آرتمیش اولسا دا، اسکی گله‌نکلرین قالینتیلاری گونوموز توپلوموندا حیس ائدیلیر.
گونئی آزربایجان’دا ایسه جوتلر آراسیندا و دیگر ایلیشکیلرده، مثلاً والدین-اوشاق دینامیکاسیندا، سئوگی ایفاده‌لرینین شفاهی اولاراق ایستیفاده‌سی چوخ یایغین دئییل. بیر چوخ دیگر مدنیتلرده سئوگیلیلرین بیر-بیرلرینه گؤزل صیفتلرله موخاطیب اولدوغو حاللارین عکسینه، گونئی آزربایجان توپلوموندا فردلر عومومیتله بیر-بیرلرینه گرچک آدلاری ایله موخاطیب اولماقدا اوستونلوک وئریرلر.
بوندان علاوه، بیر چوخ فردین والدینلریندن شفاهی سئوگی ایفاده‌لری آلماماسی، اونلارین گله‌جکده حایات یولداشلارینا و اوشاقلارینا سئوگی گؤسترمکده چتینلیک چکمه‌لرینه سبب اولماقدادیر. بو شفاهی یاخینلیق چاتیشمازلیغی، عشقی ایفاده ائتمه موضوعسوندا اوتانجلیق حیسینه یول آچابیلیر.
اؤلکه قانون‌لاری ایسه، سئوگی ایفاده‌لری اوستونده‌کی محدودیتلری آرتیریر. گونئی آزربایجان’دا یالنیز دیگر عاییله عوضولرینین حضوروندا عشقی ایفاده ائتمک یایغین اولماماسی ایله بیرلیکده عئینی زاماندا بو نوع ایفاده‌لر عومومی یئرلرده ده قانونلار واسیطه‌سیله عومومیتله محدودلاشدیریلیر و یا قاداغان ائدیلیر، خصوصاً فیزیکی تماس باخیمیندان.
یئنی نسیل اؤز سئوگیلرینی ایفاده اتمکده داها جسارتلی اولسالار دا، قانونلارین گتیردیگی محدودیتلر ایله گونئی آزربایجان’داکی کؤکلو گله‌نکلر و اینانجلارین تأثیری، فردلرین سئوگیلرینی اؤزگور و ساغلام بیر شکیلده ایفاده ائتمه‌لرینه مانعدیر. سئوگی، بیر چای کیمی آخمالیدیر، لاکین بعضیلر اوچون قفسلرین آرخاسیندا قالمیش بیر قوش کیمیدیر.
یازی دیرنیش گنجلیگی درگیسی‌نین ۶-جی ساییسیندا یایینلانمیشدیر.
