آدينيزا من اولوم – سعيد موغانلى
آدینیزا آتام جانی
آدیمی کسیلیم موغان قوزوسو تک آدینیزا
قورخا-قورخا یازیرام آدینیزین ایلک حرف‌لرینی مئساژ اوچون سئوگیلیمه…
بئش آسلان- بئش شهید – بئش قار چیچگی
بئش گوللـه‌له‌نمیش آذربایجان جمهوریت‌سیزلیگی!
نئجه داد وئریر دوستاق سورگونلویو؟
وطن زندانیندا داریخار آدام!
«گزمه‌یه غریب اؤلکه —– اؤلمه‌یه، وطن یاخشی»
اؤلمه‌یین نه اولار؟ نه اولار قاداسی…
آدینیزا گووه‌نیریک هلم…
آدینیزدان اوتانا-اوتانا یازیرام سیزین،
آدینیز آزادلیق‌دیر (خیابان آدلاری اولمایان آدینیز)
آدینیزدان قوش اوچوردورام زندان باجاسینا دوغرو
شاعیر اولورام آدینیزا
قورخاق=لاشیرام، گونو-گوندن اؤلومو دوشونه‌رک!
آزادلیغین شعارینی من باشاریرام، آجلیغینی سیز…
هارا اؤلورسوز؟ بیزی یـیـه‌سیز بوراخیب هارا شهید لیدرلر؟
آدینیز بازار-بایجاندا حراج اولوب، آذار-بایجاندا حلّــاج…
بو قدر قارین قولو خالقی یالقیز بوراخمایین!
اوروجونوز قبول اولسون…
بو قدر آخماق شاعیرلره ایچکی گرکدیر، – «قاتی‌قانینیزدان اولورسا»…
اؤلومونوزسه شعر قونوسو دئییل داها
شعار قونوسودور یاشامینیز،
وطن دیشیندا گؤبک‌لرینی اوتاران وطن‌دیش‌لره!
سیغیناجاق آختاریر آدینیزین ایستی قوجاغیندا وطن گؤیرچین‌لری.
آدینیزا من اؤلوم / آدینیزا آنام جانی/ آدینیزا قوزو قوربانلیغی کسیلیم موغان دؤش‌لرینده…
آج قالمایین نه اولار… بیز آج لیدرلر ایسته‌میریک.
گلین شعرلریمی یئیین
اوره‌ییمی بویورون لوطفن
گؤزلریمین گیله‌سینی / یاشیلدان ماوی‌یه چالار بو شعریم…
بویورون سئوگیلیمین دوداقلارینی اورتاقجاسینا، «شاعیر منیمله بیرگه»-
اؤلوم اولسون قلبی قارالیغیما…
یومون گؤزلرینیزی بیر آن
بویورون آزادلیغا چیخاق شعرلریمدن
بویورون اوره‌ییمده اورژانس حاضیرلیغی
بویورون گؤزلریمده افطار قوناقلیغی
بویورون، قوربان کسیرم شعریمی آیاغینیزا
بویورون، اؤلمه‌یین بیر آز …
آدینیزا من اؤلوم / آدینیزا قوچ قوربان – قوزو قوربان …
باخین؛ اؤیرنجی قیزلارین دیرناقلاریندا یازیلیب آزادلیق آدلارینیز
باخین؛ قانینیز رنگینده‌دیر بو لاک – قانینیز رنگینده‌دیر بو ارک…
باخین؛ یوروش باشلاناجاق ایندی شعرلریمده.
یووووخ، … آغلامیرام کی… آسئتون دامجیلاییب گؤزلریمه!
سئوگیلیمین لاک‌لارینی سیلیرم قان رنگیندن.
یاواش-یاواشـــــجا سئویرم سیزی آزادلیق بَــی‌لری،
تراختورلاری ماوی بویاییرام، داغلاری یاشیل
گؤزلریمین رنگینه بنزه‌سین دئیه دوستاق
آغلامیرام کی… گؤزلریمی سورتورم دیوارلارینا..!
هله اؤلمه‌یین بیر آز جانا
یاشایین نه اولار؟!. یاشامالسیز سیز…
یاشایین جنوب جمهورییتینین پرئزیدئنت آدای‌لاری،
اؤلمه‌یین من اؤلوم،
بویورون یئیین بو شعرلری/ بویورون،
یئمه‌لی‌دیر آزادلــــیــــق، یئمه‌لی‌دیر عـــشــــــــق
بویورون عاشیق اولاق، آشیق اولاق بیرلیکده
سن عاشیق وطن یاخشی— گئیمه‌یه کتن
بویورون / بویورون
آج قالمایین باری،
باشین یئره سوخوم بو بویدالیغین
هله اوتانمیرام، یازیرام سیزه…
باشین یئره سوخوم بو مملکتین
آجیندان اؤلور قهرمان‌لاری.
اؤلمه‌یین مـــن اؤلوم …
در همین زمینه
