ائلیس مانرو : گرچک یاشام
گونلرین بیرین‌ده، بو یئرلره، دوررینی سئوه‌ن بیری‌سی ده گلیب چیخ‌دی. هر حال‌دا او، دورری ایله ائوله‌نمک ایستیینی دیله گتیرمیش‌دی. اینانیلماز گؤرون‌سه ده، بو گئرچک‌دن بئله ایدی.
–قارداشی ساغ اولسای‌دی، اره گئتمک اونون نیینه گرک ایدی؟ – میللیسئنت بئله دئییردی.
او بئله دئمکله نیه هیم ائلییردی؟ یوخ-یوخ، آغلینیزا باشقا، پیس هئچ نه گلمه‌سین. بورادا هئچ پول‌دان-دولانیشیق‌دان دا سؤز گئتمیر. اونون دئمیی بو ایدی، دورری و آلبئرت بئک باجی-قارداشلارینین بیرگه یاشادیقلاری ائوده، اونلاری بیربیرینه باغلایان چوخ گوج‌لو ایستیقان‌لیق، دوغمالیق دویغولاری وار ایدی؛ آنجاق بوتون بونلار،–اونلارین یوخسوللوق، پینتی‌لیک ایچین‌ده کئچه‌ن یاشاملارین‌دا دوررینین یالقیزلیقلا اوز-اوزه قالدیغی چاغلاراجان بئله اولموش‌دو. چوخ گؤتورقوی‌لو، چوخ دا گؤزواچیق اولان میللیسئنت بیر سیرا اولایلارا یاناشان‌دا ندن‌سه کؤورک دویغولارا قاپیلماغی سئوردی. او بو یاشین‌دا دا، جین‌سی ایستکلره بولاشمامیش سئوگینین وارلیغینا اینانماق‌دا ایدی.
میللیسئنتین دوشونجه‌سینه گؤره،–او بونا اورک‌دن اینانیردی!–دورری بئک گلمه آدامی ایستول آرخاسین‌دا چنگل-بیچاغی دوزگون ایشله‌ده بیلمه‌سی ایله اؤزونه وورغون ائلمیش‌دی. ائله او گلمه آدام دا، چنگل-بیچاغی عینی ایله دورری کیمی ایشلدیردی. دورری همیشه چنگه‌لی سول علین‌ده توتار، بیچاقلا ایسه آنجاق یئمیی دوغرایاردی. بورادا تعجب‌لو هئچ نه یوخ ایدی: او گنجلیین‌ده اویتبی کوللئجین‌ده اوخوموش‌دو. بونون اوچون، آتاسین‌دان ارث اولاراق قالان پوللاری سونادک خرجله‌ییب کوللئجی بیتیره بیلمیش‌دی. ائله بو کوللئج‌ده او، گؤزل ختله یازماغی دا اؤیرنمیش‌دی، گؤرونور، اونون بئله گؤزل ختتینین اولماسینین دا اونلارین ائوله‌نمه‌سین‌ده بؤیوک اؤن‌می اولموش‌دو، نئجه اولسا دا، اونلار بو گلمه آداملا آنجاق بیر دفعه اوز-اوزه گؤروشموش‌دولر، اونلارین بون‌دان سونراکی بوتون ایلیشکیلری آنجاق یازیشما ایله اولموش‌دو. میللیسئنت–بو قادین کوللئجینین آدی اولان اویتبی سؤزونه برک وورولموش‌دو، هاچاغ‌سا اؤز قیزینی دا اوخوماق اوچون بو کوللئجه گؤندره بیلمک اونون ان بؤیوک اوماجاقلارین‌دان بیری ایدی.
میللیسئنت ده اوخوموش قادین ایدی. او مکتب‌ده معلمه ایشلمیش‌دی، اره ده چوخ ائله تئز گئتممیش‌دی. اؤزون‌دن اوندوققوز یاش بؤیوک اولان پورتئره اره گئدنه کیمی، اونونلا گئرچک‌دن ائوله‌نمک ایسته‌یه‌ن ایکی وورغون کیشینی اؤزون‌دن اوزاقلاشدیرمیش‌دی؛ بیرینجی‌سینی، آناسینین خاسیتی دؤزولمز اولدوغونا گؤره، ایکینجی‌سینی ایسه، هر دفعه اونونلا اؤپوشه‌ن‌ده دیلینی میللیسئنتین آغزینا سوخماق ایستدیینه گؤره یولا سالمیش‌دی. پورتئرین اوچ فئرماسی واردی، او تویلارین‌دان اؤنجه، ائولی‌لیکلرینین بیرینجی ایلین‌ده‌جه میللیسئنت اوچون واننا اوتاغی دوزلدجیینه، سونرا ایسه یانین‌دا کرئسلولاری اولان دیوان آلاجاغینا سؤز وئرمیش‌دی. توی گئجه‌سی ایسه میللیسئنته دئمیش‌دی:
–هه، اینده‌ن بئله گرک آجی تالئیین قارشینا چیخاراجاغی گؤزلنیلمزلیکلر ایله باریشماغا چالیشاسان.
میللیسئنت اونون بو سؤزو پیس آنلام‌دا دئمک ایستمدیینی بیلیردی.
اونلار ۱۹۳۳-جو ایلده ائولنمیش‌دیلر.
میللیسئنت، دئمک اولار، بیریبیرینین آردینجا اوچ اوشاق دوغموش‌دو، آنجاق اوچونجو اوشاغی دوغان‌دان سونرا او تئز-تئز خسته‌له‌نمه‌یه باشلامیش‌دی. پورتئر ده اونون بئله قادین هئیسیزلیینه دوشمه‌سینه آنلاشیق‌لی یاناشمیش، باجاردیقجا اونونلا یاخین‌لیق ائل‌مک‌دن چکینمه‌یه باشلاشمیش‌دی.
بئکلرین یاشادیقلاری ائو پورتئرین تورپاغین‌دا یئرلشیردی، آنجاق اونلارین ائوینین یئرلشدیی بو تورپاغی پورتئر اونلاردان بیرباشا ساتین آلمامیش‌دی. او بو ائوین ده اوستون‌ده یئرلشدیی تورپاغی، آلبئرتله دوررینین اؤز تورپاقلارینی ساتدیقلاری باشقا بیری‌سین‌دن آلمیش‌دی. اونا گؤره ده، آلبئرت و دورری بئکلر، دئمک اولار، اؤزلرینین آتا-بابا ائولرین‌ده کیراینشین کیمی یاشاییردیلار. آنجاق اونلار بونون اوچون پول اؤد‌میردیلر، هئچ پورتئر ده اونلاردان پول ایسته‌میردی. بونون قارشیلیغین‌دا ایسه، پورتئر چوخ آغیر بیر ایش گؤرمه‌یه باشلاسای‌دی، آلبئرت اونا گونلرله بو ایشده کؤمک‌لیک ائلیردی؛ توتالیم، آمبارین دؤشه‌مه‌سینه بئتون تؤکه‌ن‌ده، یاخود دا اوتو سامانلیغا ییغان‌دا، آلبئرت بو ایشلره قوشولوب اورکله ایشلیردی. دورری ده هان‌سی‌سا بیر ایشین قولپون‌دان یاپیشماغا چالیشار، میللیسئنت دوغان‌دا، یا دا ائوده ییر-ییغیش ائل‌یه‌ن‌ده اونون ایشلرینه ال یئتیرردی. دورری فیزیکی باخیم‌دان چوخ گوج‌لو اولدوغون‌دان، کیشی ایشلرینی ده گؤرمه‌یه گوجو چاتاردی: مئبئللری یئرین‌دن ترپتمک گرکه‌ن‌ده، یاخود پنجره‌نین آغیر چرچیوه‌لرینی چیخاریب یئنی‌دن یئرینه قویان‌دا، او بونلاری تکباشینا ائلیردی. هان‌سی‌سا آغیر ایشه باشلامازدان اؤنجه–توتالیم، هان‌سی‌سا اوتاغین دیوار کاغیذلارینی قوپارماق گرکه‌ن‌ده،–او، اؤیره‌نجه‌سی اوزره، چیینلرینی دیکلدر، سئوینج دویولان بیر گؤرکه‌مله درین‌دن کؤکسونو اؤتورر، سونرا ایشه باشلاردی. دورری چوخ ایریگؤوده‌لی، هم ده گوج‌لو ایدی، یوغون آیاقلاری واردی؛ شابالید رنگ‌لی ساچلارینین بورودویو اوتان‌جاق‌لیق دویولان اوزون‌ده قیرمیزیمتیل چیللر گؤزه دییردی. یاخین‌لیق‌دا یاشایان بیر فئرمئر نیه گؤره‌سه گؤتوروب اؤز آتینین آدینی دورری قویموش‌دو.
دورری، میللیسئنتین ائوین‌ده اورک‌دن ییرییغیش ائل‌مه‌یه چالیش‌سا دا، اؤز ائوین‌ده ایشلمیی سئومز، ائوی همیشه تؤرتؤکونتو ایچین‌ده اولاردی. اونلارین آلبئرتله بیرگه یاشادیقلاری ائو–قارداشینین اؤلومون‌دن سونرا او بورادا تک یاشاییردی،–چوخ بؤیوک، ایچری‌سی گئنیش اولسا دا، دؤشه‌نه‌جک‌سیز و مئبئل‌سیز ایدی. آنجاق ندن‌سه، دورری ائولرین‌دن دانیشان‌دا کئچمیش‌دن قالما مئبئللری خاتیرلاماغی سئوردی: پالیددان دوزلمه بوفئت‌دن، آناسیندانقالما پالتار دولابین‌دان، آیاقلارینین باشلیغین‌دا قوزا اوخشایان یومرولاری اولان چارپایی‌دان دانیشاردی. آنجاق ائله بونون آردینجا دا دئیردی: «هامی‌سی دیر دیمزینه ساتیلیب سووول‌دو». اونون دوداقلارین‌دان بو «دیر دیمزینه ساتیلیب سووولماق» سؤزو، هان‌سی‌سا گؤزلنیلمز بیر فلاکتین گلمه‌سی کیمی سسلنردی، توتالیم، هان‌سی‌سا توفانلا بیرلیک‌ده گلن داشقین کیمی: بئله بیر دوروم‌دا ایسه، سؤزسوز، اینسانین علین‌دن دایانیب باخماق‌دان باشقا بیر ایش گلمیر، بوتون بونلار قاشیسیالینماز اولدوغو اوچون دئیینمه‌یه ده، یانیب یاخیلماغا دا دیمیر. ائوده نه بیر خالی، نه بیر شکیل قالمیش‌دی. دیواردا، هاچاغ‌سا آلبئرتین ایشلدیی «ناننلارین ارزاق ساتیشی» فیرماسینین رئکلام-تقویمین‌دن باشقا هئچ نه گؤزه دیمیردی. ائوده، آدامین گؤرمه‌یه آلیشدیغی آوادان‌لیقلارین یئرینه ایسه، گؤزون اؤیرشمدیی–تله‌لر، توفنگ، ائودووشانی و اونداترا دریلرینی تاریما چکمک اوچون تاختا لؤوهه‌لر گؤزه دییردی، بو ایسه اوتاقلارین یاشاماق اوچون یوخ، آنجاق ایشله‌مک اوچون اولدوغو آنلامینا گلدیین‌دن، ائوده درین ییر-ییغیش آپارماغی دا آنلام‌سیز ائلییردی. بیر دفعه میللیسئنت اونلارین ائوینه گلن‌ده، ایکینجی مرتبه‌یه قالخان پیللکه‌نین مئیدانچاسین‌دا بیر ییغین ایت پیس‌لیگی گؤرموش‌دو. بو ییغین تزه دئییل‌دی، آنجاق هله تام قورومادیغین‌دان ایله‌نیردی، سونرادان بو پیس‌لیگی کیم‌سه ییغیشدیرمادیغین‌دان یای بویونجا رنگی قهویی‌دن بوزا چئوریلمیش، داشلاشمیش‌دی، داها قوخوسونو دا ایتیرمیش‌دی؛ سونرادان میللیسئنت اؤزو ده باشین‌دا دولانان بئله بیر دوشونجه‌یه مات قالمیش‌دی: بیر آنلیغینا اونا ائله گلمیش‌دی، بئله بیر ائوده بو سایاغی ایت پیسلیینین اولماسین‌دا تعجب‌لو هئچ نه یوخ‌دور.
بو پیس‌لیگی لابرادور جین‌سین‌دن تؤره‌یه‌ن دئلایلا آدلی قانجیق ایت تؤرتمیش‌دی. دئلایلا ماشینلارین آردینجا هوره‌رک قاچماغی چوخ سئوردی، ائله گونلرین بیرین‌ده ده بو ماشینلارین بیرینین آلتین‌دا قالیب گبرمیش‌دی. آلبئرتین اؤلومون‌دن سونرا دئلایلانین دا، ائله دوررینین ده باشلارین‌دا بیراز چاشقین‌لیق یارانمیش‌دی. آنجاق اونلار اؤزلری بونو سئزمیردیلر. آرتیق کیمین‌سه ایشده‌ن گلجیینی گؤزلمدیین‌دن، دوررینین شام یئمیینی ده واختین‌دا حاضرلاماق کیمی بیر قایغی‌سی قالمامیش‌دی. کیرلی کیشی پالتارلاری اولمادیغین‌دان، آردیجیل اولاراق پالتار یوماق قایغی‌سی دا یوخ ایدی. ائوده دانیشماغا کیم‌سه اولمادیغین‌دان دورری ایندی میللیسئنتله، یا دا اونونلا بیرگه هم ده پورتئرله لاققیرتی وورماغا باشلامیش‌دی. او آلبئرت‌دن، اونون ایشین‌دن دانیشاردی: آلبئرت «ناننلارین ارزاق ساتیشی» فیرماسین‌دا کیچیک فورقون‌لو ماشین‌دا ایشلییردی، سونرا ایسه ائله بو فیرمانین ماللارینی بوتون ایشتات بویونجا بؤیوک یوک ماشینی ایله داشیماغا باشلامیش‌دی. آلبئرت ده کوللئج‌ده اوخوموش‌دو، اؤزو ده پیس اوخومامیش‌دی، آنجاق بیرینجی دونیا محاربه‌سین‌دن قایی‌دان‌دان سونرا ساغلام‌لیغی پوزولدوغون‌دان، گونون چوخونو تمیز هاوادا کئچیرمه‌یه یول وئره‌ن بیر ایش آختارمیش‌دی؛ بئله‌لیکله ده او، ارزاق ساتیشی اوزره فیرمادا سوروجولوک ایشینه دوزلمیش، اؤل‌نه‌جه‌ن ده ماشین سورموش‌دو. او یوک داشیماق‌دان سونرا قالان بوش واختلارین‌دا، یانیؤره‌سین‌ده‌کی اینسانلارلا قایناییب قاریشماغی سئوردی. ایشی دوشه‌ن تانیشلارینی ماشینی ایله شهرده گرکه‌ن یئرلره آپارار، خستخانادا یاتان یولداشلارینی ساغالان‌دا ائولرینه گتیرردی. ایشلدیی فیرمانین دای‌می آلیجی‌سی اولان بیر عقل‌دان چاشقین قادین گونلرین بیرین‌ده آز قالا اونو اؤلدورجکمیش؛ بیر دفعه اونون اوچون گتیردیی ارزاقلاری بوشال‌دان‌دا، بیردن آرخایا دؤنوب قادینین علین‌ده‌کی بالتانی اونو باشینا ائندیرمک ایستدیینی گؤرموش‌دو، آلبئرتین بالتادان یاییندیغینی گؤره‌ن قادین ایسه، هیککه‌سین‌دن، بالتانی یاخین‌لیق‌داکی قوتویا ائندیریب اونداکی یاغی یئره جالامیش‌دی. آنجاق بو اولای‌دان سونرا دا آلبئرت اونون اوچون ارزاق داشیماق‌دان چکینممیش‌دی. اونون بو قادینلا باغلی پولی‌سه خبر وئرمه‌یه ده اوریی یول وئرممیش‌دی، بئله ائتسی‌دی، قادینی دلیخانایا سالا بیلردیلر. قادین ایسه داها اونون اوستونه بالتا چکمک‌دن ال گؤتورموش، آنجاق هر دفعه اونو، اوستونه شوبهه‌لی گؤرونه‌ن بیتکی تومو سپیلمیش کئکسلره قوناق ائل‌مه‌یه باشلامیش‌دی، او ایسه بیراز آرالانان کیمی، ایلک دؤنگه‌ده‌جه، بو کئکسلری یانین‌دان کئچدیی اوتلوغا آتیرمیش. باشقا قادینلار، بئله‌لری آز دئییلمیش، اونون قارشی‌سینا چیلپاق چیخیرلارمیش. بیری‌سی ایسه متبخین اورتاسین‌دا چیمدیی تکنه‌دن قالخیب اونو قارشیلاییبمیش، آلبئرت ایسه آشاغی اییله‌رک، گتیردیی ارزاق باغلاماسینی اونون آیاقلاری آلتینا قویوبموش.
–گؤر نئجه اجایب اینسانلار وارمیش!–دورری بونلاری دانیشدیقجا حیرتله سسلنردی.
داها سونرا او، آلبئرتین ارزاق داشیدیغی بیر سوبای کیشی‌دن دانیشیردی، بو آدامین ائوین‌ده سیچوووللار قایناشیرمیش؛ او ارزاغی اونلاردان قوروماق اوچون توربایا ییغیب تاوانین تیرین‌دن آسیرمیش. آنجاق سیچوووللار دا بیج ایمیشلر، اونلار تاوانین تیرینه دیرماشاراق، اورادان توربانین اوستونه سیچراییر، جایناقلاری ایله توربانی دیدیب ارزاقلاری یئییرمیشلر، سونون‌دا بو یازیق سوبای یاتان‌دا ارزاغی چارپایی‌دا باغرینا باسیب یاتمالی اولورموش.
–آلبئرت همیشه دئییردی، گرک یالقیز آداملارین دورومونا آجییاسان،–دورری بئله دئییردی، آنجاق ساناسان، ایندی اؤزونون ده یالقیز اولدوغونو، بو سؤزلرین اؤزونه ده عایید اولدوغونو اونودوردو.
آلبئرتین ایش باشین‌دا اوریی دایانمیش‌دی. آنجاق او، اؤلومون‌دن اؤنجه ماشینی یولون قیراغینا سوروب ساخلاماغی چات‌دیرا بیلمیش‌دی. او چوخ آخار-باخارلی بیر یئده اؤلموش‌دو: یولون قیراغی ایله گؤز یاشی کیمی دوم‌دورو بیر ایرماق آخیردی، اونون یاتاغی بویونجا ایسه، قارا اودون‌جاق‌لی پالید آغاجلاری سیرالانمیش‌دی.
بیردن دوررینین اؤز سویلارینین کئچمیشی ایله باغلی آلبئرت‌دن ائشیتدیی اولایلاردان دانیشماغی دا اولوردو. اونلارین اولو بابالارین‌دان ایکی قارداشین چایلا اوزوب مئشه‌لیک بیر یئرده، ییرتیجی حیوانلارین چئوره‌سین‌ده نئجه سودییرمانی تیکدیکلرینی دانیشاردی. اورادا هئچ ایندی ده یاشاییش یوخ‌دور، آنجاق اونلارین تیکدیکلری بندله دییرمانین اوچوقلاری ایندیدک ده قالیب‌دیر. اونلار بورادا بؤیوک بیر ائو تیکیبمیشلر، ائدینبورق‌دان اورایا مئبئل داشیییب گتیریبمیشلر، آنجاق بو فئرمادان اونلارین هئچ بیر قازانجی یوخ ایمیش، بو نئجه‌سه اونلارین ایله‌نجه‌سی ایمیش. باخ اونلاردان قالما مئبئللر بو ائوه ده گلیب چیخمیش‌دی، سونرادان دا یاواش-یاواش دیر-دیمزینه ساتیلمیش‌دی. دوررینین دئمه‌سینه گؤره، بو مئبئللری هورن بورنونون یانین‌دان فیرلانیب، هورون گؤلون‌دن کئچه‌رک، چای ایله گتیرمیش‌دیلر. آه، دورری، میللیسئنت دئمیش‌دی، بو اولا بیلمز. سونرا دا مکتب ایللرین‌دن قالما کؤهنه جوغرافییا کیتابینی گتیریب دوررینین یانیلدیغینی اونا گؤسترمیش‌دی. دئمک، اوندا اورادا هان‌سی‌سا کانال وارمیش، دورری ترس‌لیک ائلمیش‌دی. من یاخشی خاتیرلاییرام، آلبئرت اونلارین هان‌سی‌سا کانال‌دان کئچیب گلمیین‌دن ده سؤز آچمیش‌دی. یوخ‌سا پاناما کانالی ایمیش؟ چوخ اولا بیل‌سین بو، بو ائری کانالی اولوب، میللیسئنت دئمیش‌دی.
–دوزدور،–دورری رازیلاشمیش‌دی.–هورن بورنونون یانین‌دان اؤت‌رک، ائرن کانالی ایله اوزوب کئچیبلرمیش.
–کیم نه دئییر دئسین، دورری اصیل لئدی‌دیر،–میللیسئنت، گونلرین بیرین‌ده پورتئره دئمیش‌دی؛ او ایسه رازیلاشاراق سوسموش‌دو. او خانیمینین اینسانلارلا باغلی بئله کسکین بویوروقلار وئرمه‌سینه آرتیق آلیشمیش‌دی.
–او بیر قادین کیمی موریئل سنوونو آزی یوز خال قاباقلاییر،–میللیسئنت اؤزو اؤز سؤزونه قوت وئره‌رک، دوررینی اؤزونون ان یاخین باجی‌لیغی ایله توتوشدوروردو.–من موریئل سنوونو اورک‌دن سئویرم، آنجاق دوررینین اوندان اوستونلویونو ده دئمک‌دن چکینمیرم.
پورتئر اؤز خانیمین‌دان بئله سؤزلر ائشیتمه‌یه آلیشمیش‌دی: «من موریئل سنوونو اورک‌دن سئویرم، اونو کیم‌سه‌نین آیاغینا وئرمره‌م». «من موریئل سنوونو سئویرم، آنجاق بو هئچ ده او دئمک دئییل، اونون بوتون ائلدیکلرینی دوغرو ساییرام».
موریئل سنوو، چوخ یامان سیقارئت چکردی، دئیردین لاپ پاراووز توستولییر. دانیشیغی دا چوخ قابا ایدی: «اللهین یانینا دیرماشاسان»، «شالوارینی دول‌دوردو»، آز قالا شالواری‌می باتیرمیشدیم»، هابئله بونون کیمی بایاغی سؤزلر ایشلدردی.
میللیسئنت هئچ ده بیردنبیره موریئ‌لی اؤزونه ان یاخشی باجی‌لیق سئچممیش‌دی. اره گئتدیی ایلک ایللرده او، توپلومون یوخاری قاتلارین‌دان اولان قادینلارلا ایلیشکیلر قورماغا چوخ چالیشمیش‌دی. وکیل‌لیک ائل‌یه‌ن میسسیس نئسبیتله، هکیم ایشله‌یه‌ن میسسیس فیننیقانلا، میسسیس داودلا یاخینلاشماغا چالیشمیش‌دی. آنجاق اونلار، کیل‌سه‌ده‌کی قادین کومیته‌سینین بوتون آغیر ایشلرینی اونا گؤردورسه‌لر ده، اونو هئچ ائولرینه چای ایچمه‌یه ده چاغیرمامیش‌دیلار. میللیسئنتین اونلارلا گؤروشو کومیته‌نین ییغین‌جاقلارین‌دان قیراغا چیخمامیش‌دی. سونرا اؤزو بونون نیه‌سینی آنلامیش‌دی: بورادا اونون اری پورتئرین نئچه فئرماسینین اولماسی اؤن‌م‌لی دئییل‌دی، اونلار میللیسئنته فئرمئر آروادی اولدوغو اوچون یوخاری‌دان آشاغی باخیردیلار.
میللسئنت قیزی بئتتی-جینه فورتئپیانودا چالماغی اؤیرتمک اوچون معلم آختاران‌دا موریئلله تانیش اولموش‌دو. موریئل موسیقی معلمی ایدی. او مکتب‌ده ده ایشلیر، ائولرده ده موسیقی درسی دئیردی. اوندا چوخ آغیر ایللر ایدی، او دا آغ ائلمزدی، هر درس اوچون وور-توت ایگیرمی سئنت گؤتورردی. بون‌دان باشقا دا او، کیل‌سه‌ده اورقان چالار، تئز-تئز آیری-آیری خورلاری چالیشدیراردی، آنجاق بونلارا گؤره پول آلمازدی. اونلار میللیسئنتله ائله دوغمالاشمیش‌دیلار، چوخ کئچمه‌دن موریئل اونلارین ائوین‌ده دورری‌دن هئچ ده آز اولمایاراق گؤرونمه‌یه باشلامیش‌دی، آنجاق اونون بورادا دورری‌دن سئچیله‌ن اؤز آیریجا یئری وار ایدی.
موریئلین یاشی اوتوزو کئچ‌سه ده ایندیدک ارده اولمامیش‌دی. اره گئتمکله باغلی او، آچیق-ساچیق، زارافاتلا، بیراز دا گیلئی‌لی دانیشاردی، بو کونودا ان چوخ پورتئرین یانین‌دا سؤز آچاردی.
–پورتئر، باشا دوشه بیلمیرم، نئجه اولا بیلر سنین تانیشلارینین آراسین‌دا منه ائوله‌نه‌جک بیری‌سی تاپیلماسین؟–او سوروشاردی.–منیم ایشیمه یارایان بیر کیشی آختاریب تاپ‌سانا.
–تاپماغینا تاپارام،–پورتئر دیللنردی،–آنجاق قورخورام اونلاری سنه بیه‌ن‌دیره بیلمه‌یه‌م.
یای تتیلین‌ده موریئل مونرئالا، باجی‌سینین یانینا گئدردی، بیر دفعه ایسه هئچ واخت اوزونو گؤرمدیی، آنجاق مکتوبلاشدیغی، امیقیزی‌سی ایله امیوغ‌لوسونون یانینا، فیلادئلفییایا دا گئتمیش‌دی. اورادان قایی‌دان کیمی ایلک سؤزو اورادا گؤردویو، تانیش اولدوغو کیشیلردن اولموش‌دو.
–بیل‌سه‌نیز نئجه قورخونج ایدی! اورالاردا چوخ گنج یاشلارین‌دا ائوله‌نیرلر؛ هامی‌سی دا اوجدانتوتما کاتولیکلردیر، آروادلاری اونلار اوچون آرا وئرمه‌دن اوشاقلار دوغورلار، هئچ دوغوش‌دان اؤل‌نی ده اولمور. منیم اوچون آختاریب بیر ار تاپمیش‌دیلار، آنجاق ائله ایلک گؤروش‌دنجه منیمله اونون خاسیتینین اویوشمایاجاغینی آنلادیم. بیلیرسینیز نئجی‌دی، بو یاشین‌دا هله ده اؤزونو آنا اوشاغی کیمی آپاریردی. بیر باشقاسی ایله تانیش اولدوم، اوندا دا چوخ بؤیوک بیر چاتیشمازلیق تاپدیم. بو آدام آیاق دیرناقلارینی توتماغی سئومیر. باخیرسان، آیاقلارین‌دا ائله بیل اوزون، ساری جایناقلاری وار! ایندی سیز من‌دن اونون چیلپاق آیاقلارینی هارادا گؤردویومو سوروشمایاجاقسینیز، دئییل‌می؟
موریئلین بوتون پالتارلاری گؤی بویالی اولاردی، آنجاق گؤی بویانین چوخ‌لو چالارلارینی سئچمیی ده باجاراردی. قادین گرک اونون اوزونه یاراشان پالتار سئچمیی باجارسین، یوخ‌سا پالتار آنجاق ائله ایینی اؤرتمک اوچون دئییل، بو اونون سؤزلری ایدی. پالتار دا ائله اتیر کیمی‌دیر. بو سیزین وارلیغینیزین ان اؤن‌م‌لی گؤستریجیلرین‌دن بیری‌دیر. چوخلاری ائله دوشونور، گؤی بویالی پالتار ساریشینلارا یاراشیر، آنجاق بئله دئییل. گؤی پالتاردا ساریشینلار سولغون گؤرونورلر، بو اونلارین گؤرونوشونو کورلاییر. گؤی بویالی گئییملر ان چوخ موریئل کیمی دری‌سی ایستییه دؤزوم‌لو اولان قادینلارا یاراشیر؛ بئله دریلر گون ایشیغین‌دا قارالان‌دا دا بو قاراشین‌لیغینی ایلبویو ایتیرمیر. گؤی بویا شابالی‌دی ساچ‌لی، قونور گؤزلو قادینلارا داها چوخ یاراشیر–یعنی موریئل کیمی قادینلار اوچون‌دور. او پالتار آلماغا هئچ واخت پول اسیرگمزدی–اینی اوچون قیزیرغانماغی آخماق‌لیق ساناردی. دیرناقلاری همیشه چوخ پارلاق، تئز گؤزه چارپان لاکلا بویاناردی: بو لاکلار اریک، قانقیرمیزی، یا دا قیزی‌لی رنگلرده اولاردیلار. بالاجابوی‌لو، یومروبه‌دن‌لی اولسا دا، آردیجیل فیزیکی چالیشمالارلا بئلینین اینجلیینی قورویوب ساخلایا بیلیردی. اونون بوینونون اؤن طرفین‌ده–بوغازینین سینه‌سینه بیرلشدیی یئرده، ائله بیل، گؤزگؤرونمز باهالی بویونباغی‌سینین بیر باهالی داشی کیمی گؤرونه‌ن خالی واردی، باشقا بیر خالی ایسه گؤزونون کونجون‌ده اولوب، دونوب قالان گؤز یاشینی آندیریردی.
–سنه «یاخشی گؤرونورسه‌ن» دئمک آزدیر، سنه گرک «نئجه ده سئویم‌لی‌سه‌ن» دئیه‌سه‌ن،–بو سؤزلری بیر دفعه، هئچ اؤزو ده اؤزون‌دن گؤزله‌مه‌دن، میللیسئنت دئمیش‌دی.
سونرا دئدیی سؤزدن اؤزونو ایتیریب قیزارمیش‌دی: دئیه‌سه‌ن، لاپ اوشاق کیمی دانیشیرام.
موریئل ده یونگولجه قیزارمیش‌دی، آنجاق بو، ائشیتدیی سؤز دؤشونه یاتدیغی اوچون اولموش‌دو. او اؤیولمک اوچون چالیشمیش، ایستدیینی اله گتیره بیلمیش‌دی. بیر دفعه اووللینه کونسئرت وئرمه‌یه گئدرکه‌ن او، یولوستو، اؤزونو میللیسئنت ایله پورتئره گؤسترمک اوچون قاچیب گلمیش‌دی.
اونون اینین‌ده، دالغالاندیقجا، اؤزو-اؤزون‌دن ایشیق ساچیرمیش کیمی گؤرونه‌ن گؤزل گؤی دونو واردی.
–بو گؤردویونوز هله هامی‌سی دئییل، ایندی‌لیک‌ده اینیم‌ده نه وارسا تزه‌دیر، هامی‌سی دا ایپک‌دن‌دیر.
دئمک اولماز، او اؤزونه کیشی تاپا بیلمیردی. او اؤزونه یاراشان کیشیلری چوخ تئز-تئز تاپیردی، آنجاق بو کیشیلردن هئچ بیری اونو اؤز ائوینه قوناق چاغیرا بیلمیردی. او باش‌چی‌لیق ائلدیی خورلا باشقا شهرلره گئدن‌ده ده اؤزونه گرکه‌ن کیشیلری آختاریب تاپماغا چالیشیردی. بیردن تورونتویا اؤز یئتیرمه‌لرین‌دن بیرینین وئردیی فورتئپیانو کونسئرتلرینه گئدن‌ده ده بو اونون یادین‌دان چیخمازدی. موسیقی‌دن درس دئدیی اوشاقلارین ائولرین‌ده ده بو آختاریشلارین‌دان قالمازدی. اورادا اوزلشدیی عمیلرین، آتالارین، بابالارین آراسین‌دان گله‌جک ارینی تاپماغا چالیشاردی؛ آنجاق اونلاردان هئچ بیری اونو اؤتوره‌ن‌ده موریئلین ائوینه گلمزدیلر، اونو ماشین‌دان دوشوروب ال ائلیر، چیخیب گئدردیلر–بیریلری بونو چکینگه‌ن‌لیکله، باشقالاری اوتانمادان ائلیردیلر–بوتون بونلارین نیه‌سی ایسه اونلارین ائولی اولماقلاری ایدی. او بیردن اوتوروب دوشونردی: اونلاردان هان‌سینین‌سا آروادی یاتاق خسته‌سی اولا بیلمزدی‌می؟ یاخود ایچکی دوشکونو، دؤزولمز بیر ایفریته اولسا؟ بونلار اولا بیلردی. آنجاق اونلارین چوخوسو اؤز آروادلارین‌دان دانیشماغی هئچ سئومزدیلر، ائله بیل، قادینلا یوخ هان‌سی‌سا بیر قاراباسما ایله یاشاییردیلار. بو کیشیلر اونونلا باشقا شهرلرده‌کی موسیقی ییغین‌جاقلارینا گئدن‌ده بئله، بونو موسیقینی سئودیکلری اوچون ائلدیکلرینی دئیردیلر. یا دا اونونلا باشقا شهره گئده بیلمک اوچون موسیقی یاریشماسینا گئدن اوشاقلارینین کیچیک اولدوغونو دئییب، آنجاق ائله بونا گؤره اونونلا یولداش‌لیق ائلدیکلرینی وورغولاماغا چالیشاردیلار. اوزاق شهرلرده اونلار موریئ‌لی گونورتا یئمیینه قوناق ائلمیی سئوردیلر. موریئل اونلارا «دوستلاریم» دئیردی. میللیسئنت ده بو ایشلرین‌ده اونو دوغرویا چیخارماغا چالیشاردی. بورادا پیس نه واردی آخی، هر شئی آداملارین گؤزو اؤنون‌ده دئییل‌دی‌می؟ آنجاق بو ایلیشکیلرین آز قالا هامی‌سی پیس بیر سونلوقلا بیتردی. گؤروردون، گونلرین بیرین‌ده، اونلارین خانیملاری زنگ ائل‌ییب دئدیلر: «میسسیس سنوو، بیزی باغیشلایین، داها اوشاغا موسیقی اؤیرتمک ایستییمیزدن داشینمالی اولدوق». بیردن هئچ بو زنگلر ده اولمازدی. کیشیلر اؤنجه‌دن رازیلاشدیریلمیش گؤروشه گلیب چیخمازدیلار، اونلارا گؤندریله‌ن خاتیرلاتما مکتوبونو جاواب‌سیز قویاردیلار، بونونلا دا هر شئیی اونوتماق گرکردی.
–من آخی اونلاردان چوخ شئی ده ایستهمیرم،–موریئل دئیینردی.–هئچ اولماسا دوست اولاراق قال‌سینلار. یوخ‌سا گؤرورسه‌ن، اؤمورلوک، دؤنمز بیر دوست اولاجاقلارینا آند ایچیرلر، آزجا بیر قانقارالدیجی دوروم یارانان کیمی ایزسیز-سوراق‌سیز یوخا چیخیرلار. آنلامیرام، نه اوچون بئله ائلییرلر؟
–سن بونو باشا دوشمه‌لی‌سه‌ن، موریئل،–بیر دفعه بونونلا باغلی میللیسئنت اونا دئمیش‌دی،–آرواد باشقاسینین آیاغینا وئریله بیلمز. دوستلوق ائل‌مک یاخشی‌دیر، آنجاق ائولی‌لیک بون‌دان یوخاری‌دا دایانیر.
بو سؤزلر موریئ‌لی اؤزون‌دن چیخاردی. دئمه‌لی، میللیسئنت اونو بوراجان اسکیک بیری‌سی ساییر؟ دوغرودان‌می، موریئلین بیر آنلیغینا دا اولسا بئله، هئچ بیر پیس آنلامی اولمایان ایله‌نجه‌یه قاپیلماسینا او بئله پیس یاناشیر؟ قاپینی چیرپیب گئدن‌ده او، بیله‌رک‌دن، قاپینین آغزین‌دا اکیلمیش گوللری تاپادایاراق اؤز ماشینینا ساری آتیلمیش‌دی. بو اولای‌دان بیر سوتکا کئچمیش میللیسئنتین اوزو آغلاماق‌دان شیشیب قیزارمیش‌دی. آنجاق بو کوسولولوک اوزون سورمه‌دی. ائرته‌سی گون موریئل گؤز یاشلاری ایچین‌ده قاییدیب گله‌رک، باغیشلانماق دیله‌دی.
–من اؤزومو لاپ دلی کیمی آپاردیم،–او بونو دئییب، قوناق اوتاغینا کئچه‌رک، پیانینونون آرخاسین‌دا اوتوروب چالماغا باشلادی.
موریئل دینیب دانیشمایان‌دا دا میللیسئنت اونو باشا دوشوردو. موریئلین قانی دورولان‌دا، بو اونون اؤزونه یئنی دوست تاپماسی دئمک ایدی، او، اینجه، قوس‌سه‌لی ماهنیلار چالیردی، توتالیم، «مئشه چیچکلرینی» یاخود دا بئله‌سینی:
اونون اینین‌ده‌کی کیشی گئییملرین‌دن
آه نئجه، ساده‌لیک، گؤزل‌لیک یاغیر…
آنجاق موریئل کوسکون اولان‌دا پیانینونون دیللرینی تبیل کیمی دؤیجله‌ییب، «گؤزل دان‌دی» سایاغی گولمه‌لی ماهنیلار اوخویاردی:
باشی بده‌نین‌دن آیری
دوشه‌نه‌جه‌ن بو کرالین،–
بئله دئدی کلئیوئرهاوس،–
گرک چوخ‌لو قانلار آخسین.
میللیسئنت آراسیرا تانیشلاری اوچون شام یئمیی قوناق‌لیغی دوزلدردی(آنجاق او، فیننئقان، نئسبیت، داود کیمی اونا سایمازیانالیق گؤستره‌ن تانیشلارینی بو شام یئمیینه چاغیرمازدی)، اوندا دورری ایله موریئ‌لی ده بو شام یئمکلرینه چاغیراردی. شام یئمیی بیته‌ن‌دن سونرا موریئل پیانینودا چالار، دورری ایسه شام‌دان سونرا اونا قاب-قاشیغی یوماق‌دا یاردیم ائلیردی.
بازار گونلرینین بیرین‌ده، آلبئرتین اؤلومون‌دن ایکی ایل سونرا، میللیسئنت یئرلی اینگیلیس کیل‌سه‌سینین کئشیشینی شام یئمیینه قوناق چاغیرمیش، بو یاخینلاردا اونا قوناق گلمیش دوستونو دا اؤزویله گتیرمیی خاهیش ائلمیش‌دی. کئشیش سوبای اولسا دا، موریئل آرتیق چوخ‌دان اوندان علینی اوزموش‌دو. نه اتدیر، نه بالیق، موریئل اونو بئله دیرله‌ن‌دیریردی. بونا گؤره هاییف‌سیلانیردی دا. میللیسئنت بو کئشیشی، ان چوخ دا اونون سسینی چوخ بیه‌نیردی. میللیسئنت اینگیلیس کیل‌سه اینانجینا اویغون اولاراق بؤیوموش، آنجاق اری پورتئر(شهرین بوتون آدلی-سان‌لی آداملاری کیمی) اونیات کیل‌سه‌سی ایله باغلی اینانجا تاپیندیغین‌دان، او دا سونرادان ارینین اینانجینا کئچمیش‌دی، آنجاق یئنه ده اینگیلیس کیل‌سه‌سی ایله باغلی اینانج اونون داها چوخ خوشونا گلمک‌ده ایدی. گئجه عبادتی، کیل‌سه زنگلرینین سسی، خورلا اوخوماق، دهلیزی دعا اوخویاراق کئچمک–بوتون بونلاری، باشقا اینانجلاردا اولان آیینلرده‌کی کیمی، باساباسلا ایچری دولوشوب اوتوراجاقلاردا اوتوران کوتله ایله یاناشی قویماق اولاردی‌می؟ هله بو گؤزل سؤزلری دئمک‌دن یاشادیغین کؤورک دویغولار: «ایلاهی، بیز یازیق گوناهکارلاری باغیشلا. اؤز گوناهلارینی بوینونا آلانلاری یامان‌لیقلاردان سن اؤزون قورو، ایلاهی. توبه ائد‌نلره سونسوزلارادک سوره‌جک عؤمور وئر. سنین سؤزون ایله…»
پورتئر ده اؤز اینانجی ایله باغلی اولان کیل‌سه‌یه گئدردی، آنجاق بورادا باش وئره‌نلری هئچ بینمزدی.
بو شام یئمیینه چوخ جدی هازیرلاشیردیلار. اوستو ناخیش‌لی باهالی ایپک سوفره‌نی، گوموش سالات قاشیقلارینی، ال ایشی اولان، اوستون‌ده بنؤوشه شک‌لی چکیلمیش، قارا دئسئرت بوشقابلارینی اورتایا چیخارمیش‌دیلار. سوفره‌نی اوتوله‌مک، گوموش قاشیقلاری تمیزله‌مک گرکیردی، آنجاق میللیسئنت، تمیزلندیک‌دن سونرا دا گوموش قاشیقلارین اوستون‌ده لکه قالاجاغین‌دان، چنگللرین دیشلرین‌ده‌کی بوز ارپین سوناجان ایتمیجیین‌دن، توی جئهیزی اولان چاینیکین بوغازین‌داکی ساری لکه‌لرین گؤزه چارپاجاغین‌دان قورخوردو.
او گونو ائرته‌دن میللیسئنتین اوریین‌ده بیربیریله دیدیشه‌ن ایکی‌لی دویغولار یئر آلمیش‌دی: هیه‌جانلا ممنونلوق، اومیدله، اینام‌سیزلیق دویغولاری اونو اوزوب الده‌ن سالیردی. هیجانلانماغا ایسه دیردی. بیردن باوارییا رئسئپتی ایله دوزلتدیکلری مارمئلاد قاتیلاشمادی؟(او چاغلار هله سویودوجو اولمادیغین‌دان، یای آیلارین‌دا ارزاقلاری زیرزه‌می‌ده ساخلاییردیلار.) بیردن بیسکیویت گرکه‌ن قدر شیشمه‌دی؟ بیردن شیش‌دی، آنجاق قورو آلین‌دی؟ بیردن پئچئنیئ کیفلنمیش اون ایگی وئرر، سالاتا بؤجک دوشر؟ آرتیق ساعت بئش‌ده میللیسئنت باشینی ائله ایتیرمیش، ائله بیر اوچونمایا دوشموش‌دو، متبخ‌ده اونون یانین‌دا قالماق دؤزولمز اولموش‌دو. موریئل اونا کؤمک ائل‌مک اوچون واختین‌دان قاباق گلمیش‌دی، آنجاق میللیسئنت اونون کارتوفو اینجه دوغرایا بیلمه‌می‌سین‌دن آجیقلانمیش‌دی، سونرا دا او، یئرکؤکونو بیچاقلا دیده‌ن‌ده علینی یارالاییب ائو ییه‌سینین قانینی بیراز دا قارالتمیش‌دی؛ بون‌دان سونرا میللیسئنت اونون علین‌دن ایش گلمدیینی دئییب، موریئ‌لی پیانینودا چالماغا گؤندرمیش‌دی.
موریئل اؤزونون فیروزه رنگ‌لی کرئپ‌دن اولان دونونو گئیینمیش، چوخ سئودیی ایسپان دوخی‌سی ایله اتیرلنمیش‌دی. کئشیش‌دن بیر آداخ‌لی اولاراق علینی اوزسه ده، آنجاق اونون قوناغینی هله گؤرممیش‌دی، نه بیلمک اولاردی، بیردن نسه آلین‌دی؟ او بئله اوزاق یولچولوغا چیخیب‌سا، چوخ اولا بیل‌سین یا سوبای‌دیر، یا دا دول کیشی‌دیر. گؤرونور هم ده وارلی‌دیر، یوخ‌سا بئله اوزاقلارا گلیب چیخا بیلمزدی. بیریلری اونون اینگیلتره‌دن، بیر باشقالاری ایسه آوسترالییادان گلدیینی دئییردیلر.
موریئل پیانینودا بورودینین «کنیاز ایقور» اوپئراسین‌دان «قیپچاق رقصلرینی» چالماغا باشلادی.
دورری گئجیکیردی. ائله ایشلرین بئله باشایاق اولماسی دا بونا گؤره ایدی. ات سووسونو یئنی‌دن زیرزه‌مییه دوشورمه‌لی اولدولار، یوخ‌سا ژئلئ ارییه بیلردی. بیسکویتی پئچ‌دن چیخاردیب قیراغا قوی‌دولار، بیراز دا قال‌سا قورویاردی. کیشیلر اوچلوک‌ده آرتیرمادا اوتوروب آچیق هاوادا قلیانالتی ائلییر، کؤپوک‌لو لیموناد ایچیردیلر. میللیسئنت هله آتا ائوین‌ده ایچکی دوشکونلویونون نئجه آجی سونلوقلا قورتاردیغینی گؤرموش‌دو–اونون اون یاشی اولان‌دا آتاسی ایچکی‌دن پارتلاییب اؤلموشودو–اونا گؤره ده، او تویلارین‌دان قاباق پورتئرین بوینونا بیر ده هئچ واخت ایسپیرت‌لی ایچکی ایچمیجیینی قویموش‌دو. او، سؤزسوز ایچکینی بوسبوتون آتمامیش‌دی، اونون همیشه آمباردا گیزلی یئرده دالدالادیغی چاخیر بوتولکاسی اولاردی، آنجاق پورتئر ایچکی ایچ‌ن‌ده آروادین‌دان اوزاق گزیب دولاناردی، اونا گؤره ده، میللیسئنت اونون ایچمه‌مکله باغلی وئردیی سؤزون اوستون‌ده دایاندیغینی سانماق‌دا ایدی. بو، او چاغلاردا فئرمئرلرین هامی‌سی اوچون سینانمیش بیر یول ایدی: اونلار آمباردا گیزلینجه ایچر، آنجاق ائوده اؤزلرینی آییق گؤسترمه‌یه چالیشاردیلار. بوراسی دا وار، آروادلاری اونلاردان ایچممیی طلب ائل‌مه‌سه‌لر، چوخ اولا بیل‌سین، بو کیشیلرین بیر چوخو اؤزلرینی ایچکی دوشکونو اولماق‌دان ساخلایا بیلمزدیلر.
موریئل بده‌نینی گؤزه چارپ‌دیران دونون‌دا، دیکدابان آیاققابیلارین‌دا آرتیرمایا گلن‌ده، کیشیلرین ایچدیی لیمونادی گؤروب سئوینجله سسله‌ن‌دی:
–اوی، نه یاخشی، بورادا منیم سئویم‌لی ایچکیم وارمیش! جین قاتیلمیش لیمونو چوخ سئویرم!–آنجاق لیمونادی دادان کیمی، اوزونو تورشودوب، پورتئره دئدی:–سن یئنه اؤز بیلدیینی ائلییرسن، ائل‌می؟ یئنه جین آلماغی اونوت‌موسان دئمک!
بون‌دان سونرا موریئل کئشیشی قیجیقلاندیرماغا باشلاییب، اوندان اوستون‌ده گزدیردیی، ایچکی دولو قومقومانین یانین‌دا اولوب اولمادیغینی سوروش‌دو. کئشیش ده یا قادینا اولان سایغی‌سین‌دان، یا دا داریخماق اوجباتین‌دان، اؤزونو چاشدیریب، قومقوماسینین بورادا اولاماماسین‌دان تسوفلندیینی دئدی.
بو آن کئشیشین آرخاداشی موریئلله تانیش اولماق اوچون آیاغا قالخیب یاخینلاش‌دی. او اوجابوی‌لو، آریق، ساری-قوس‌سه‌لی اوزو قیریشلارلا دولو اولان بیری‌سی ایدی. موریئل اونو والئه ائل‌یه بیلممیش‌دی. موریئل قوناقلا یاناشی اوتوروب اونو دانیشیغا توتماغا چالیش‌دی. اؤزونون موسیقی درسلرین‌دن دانیشاراق، یئرلی چالیب اوخویانلاری اله سالماغی دا اونوتمادی. اینگیلیسلره ده ایلیشمک‌دن چکینمه‌دی: بازار گونو مکتبین‌ده وئردیی کونسئرت‌ده اینگیلیسدیل‌لی آپاریجینین اونون شوپئن‌دن موسیقی ائتودلری چالاجاغینی دئیه‌ن‌ده–بستکارین آدینی «چوپپین» کیمی سسلندیردیینی خاتیرلاییب گول‌دو.
پورتئر بو دانیشیقلارین گئدیشین‌ده ایشلرینی گؤرمیی ده چات‌دیریردی، گئدیب یویونوب-دارانمیش، کوستیومونو گئیینمیش‌دی، آنجاق آرادابیر گؤزونو آمبارا ساری دیکیب باخیر، ائله بیل، اورادا هان‌سی‌سا بیر ایشینی یاریمچیق قویدوغو اوچون داریخیردی. یاخین‌لیق‌داکی اؤروش‌ده اوتلایان اینک برک‌دن بؤیورمه‌یه باشلادی، بؤیورتونون کسیلمدیینی گؤره‌ن‌ده پورتئر قوناقلاردان عذر ایسته‌ییب، نه باش وئردیینی اؤیره‌نمه‌یه گئت‌دی. سن دئمه بوزوو مفتیل چپردن کئچمک ایستیرکه‌ن ایلیشیب قالمیش، سونرا ایسه دارتینان‌دا ییخیلمیش، مفتیللردن آسیلاراق بوغولوب اؤلموش‌دو. پورتئر گئری قاییدیب اللرینی یودو، آنجاق بوزووون اؤلمه‌سینی دانیشیب قانقاراچی‌لیق سالماق ایسته‌مه‌دی. «بوزوو چپره ایلیشیب قالمیش‌دی»–آنجاق ائله بونو دئمکله یئتین‌دی. او اؤز اوریین‌ده ایستر-ایستمز بو ایتکینی بوگونکو شام یئمییله باغلادی، بوتون بونلارا گؤره ایش-گوجونو آتیب، بزنیب اوتورمالی اولموش‌دو، اؤزو ده بو ندیر؟–یئمیی ده بوشقابلاری دیزلرینین اوستونه قویوب یئییردیلر. هئچ اینسانا یاراشان شام یئمیی دئییل‌دی بو.
–اینکلر بالاجا اوشاقلاردان آرتیق ارکؤیون اولورلار،–میللیسئنت دیلله‌ن‌دی.–بیر ده گؤرورسه‌ن باشینین برک قاریشدیغی یئرده شیلتاق‌لیقلاری توتور!–اونون بالاجا اوشاقلاری آرتیق یئمک یئمیش، یؤره‌سینه تاختا چپر چکیلمیش اوشاق چارپاییلارین‌دا اوروروب، متبخ‌دن بؤیوکلر اوچون داشینان یئمکلری باخیشلاری ایله سوزوردولر.–دورری یامان گئجیک‌دی، گلین بیز اونسوز باشلایاق. کیشیلر یقین ایندی آجین‌دان اؤلورلر. هئچ اولماسا آچیق هاوادا بیر تیکه یئمک یئیک. بیز آراسیرا، بازار گونلری، بئله‌جه آچیق هاوادا شام ائلمیی سئویریک.
–باشلایاق، باشلایاق!–آرتیرمادا قویولموش ماسایا یئمک داشیماغا کؤمک ائل‌یه‌ن موریئل برک‌دن سسله‌ن‌دی. ایستولون اوستونه کارتوف، یئرکؤکو سالاتلاری، سووس، کله‌م سالاتی، ادویات وورولموش یومورتا، سویوتما تویوق، قیزیل بالیق اتین‌دن قوتاب، قیزدیریلمیش بیسکویت، هر جور ادویاتلار دوزولموش‌دو.
هر شئیی یئنیجه دوزوب قورتاران‌دا، ائوین تینین‌دن، یئیین یئریدیین‌دن‌می، یوخ‌سا هیاجان‌دان‌می، تؤوشویه‌رک گلن دورری گؤرون‌دو. اونون اینین‌ده آغ خاللاری اولان گؤی پارچادان تیکیلمیش، آغ یاخالیق‌لی یای دونو واردی،–بئله پالتارلاری یا آزیاش‌لی قیزلار، یا دا قوجا قاریلار گئیینیرلر. یاخالیغینین اوستون‌ده آددابوددا سال‌لانان ساپ قیریقلاری گؤزه دییردی: گؤرونور، یاخالیغا برکیدیلمیش کروژئوا قوپدوغون‌دان، دورری اونو یئنی‌دن تیکمک‌دن‌سه، قوپاریب آتماغی اوستون توتموش‌دو، هاوا چوخ ایستی اولسا دا اوست دونونون قوللارینین بیرین‌دن آلت دونونون قولونون اوجو گؤرونوردو. تلمتلسیک مازلانمیش آغ آیاققابیلاری، یئریدیکجه، اوتلارین اوزرین‌ده آغیمتیل بیر ایز بوراخیردی.
–من گئجیکمزدیم،–دورری دئدی،–بیر وهشیلشمیش پیشیک واردی، اونو گولله‌له‌مه‌لی اولدوم. ائویمیزین یانین‌دا وئییلله‌نیردی، اؤزونو آپارماغین‌دان قودوز اولدوغونو آنلادیم.
شام یئمیینه قوناق چاغیریلدیغی اوچون دورری ساچلارینی ایسلاداراق سان‌جاقلارلا برکیدیب، دالغالاندیرماغا چالیشمیش‌دی. بئله ساچ دوزومو و انلیکله قیزارتیغی ایشیل‌دایان یاناقلاری ایله او، باشی فارفوردان، بده‌نی سامان تپیلمیش پارچادان دوزلمه گلینجییه اوخشاییردی.
–قاباقجا ائله بیلدیم پیشیک کورسه‌یه گلیب،–دورری اولایی آنلاتماغا باشلادی،–آنجاق سونرا گؤردوم بونا اوخشامیر. من کورسه‌یه گلن پیشیکلری چوخ گؤرموشه‌م: اونلار قارنی اوسته سورونور، دؤشه‌مه‌نین اوستون‌ده یومبالانیرلار. بونون ایسه آغزینین سویو آخیردی. من دوشوندوم، ان یاخشی‌سی ائله بونو گولله‌مک‌دیر. سونرا اونو توربایا سالیب وئردیم فرئد ناننا، خاهیش ائلدیم اونو اوول‌لی‌ده‌کی بایتارا آپارسین. بیلمک ایستییرم، بو پیشیک دوغرودان‌می قودوز ایدی، یوخ‌سا یوخ، فرئ‌ده گلینجه او الله‌دان ایستییر بیر ایش دوشسون، ماشینینی هاراسا سوروب گئت‌سین، دئیه‌ن کیمی رازیلاش‌دی. بو گون بازار گونو اولدوغون‌دان، اولا بیل‌سین، بایتار ائوده اولماسین، فرئ‌ده دئمیشه‌م اونو ائوده تاپماسا توربانی ائوینین کاندارین‌دا قویوب گل‌سین.
–یاخشی، بو یازیق بایتار هارادان بیله‌جک بو سووقاتی اونا کیم گؤندریب؟–موریئل سوروش‌دو.
–قورخوسو یوخ‌دور. من توربانین اوستونه کیچیک بیر مکتوب یازیب برکیتمیشه‌م. آنجاق اونون آغزین‌دان سو آخماغینی اؤز گؤزلریمله گؤرموشه‌م.–دورری بارماغینی آغزینا آپاریب پیشیین آغزین‌دان نئجه سو آخدیغینی گؤسترمه‌یه چالیش‌دی.–بیزیم یئرلر نئجه‌دیر، بیه‌نیرسینیزمی؟–دورری بیردن گؤزلنیلمه‌دن آرتیق بو شهرده دؤرد ایلدیر یاشایان، ایکی ایل اؤنجه اونون قارداشینی دفن ائلمیش کئشیشه ساری دؤنوب سوروش‌دو.
–دورری، سن دئیه‌سه‌ن بیراز قاریشدیردین، کئشیش یوخ، میستئر ایسپیرس بیزیم یئرلره ایلک دفعه گلیب.–میللیسئنت دیلله‌ن‌دی.
دورری سایغی ایله باشینی یئلله‌ییب قوناقلا سالاملاش‌دی، آنجاق بوراخدیغی یانلیش‌دان اؤزونو ایتیرمه‌دی. او یئنه دانیشماغا باشلاییب، بو پیشیی اؤنجه وحشی پیشیک ساندیغینی دئدی، بونون دا توکلری اونلارینکی کیمی چوخ سیخ ایمیش، وشهی پیشیکلر ده قودوز اولمایینجا اینسانلارا یاخینلاشمازلار.
–هر حال‌دا من قزئت‌ده اعلان وئره‌جه‌یه‌م، سؤزسوز، بو کیمین‌سه ائو پیشیی‌دیرسه، اوندا یازیقلار اولسون. من بونون نئجه آغیر ایتکی اولدوغونو اوچ آی بون‌دان اؤنجه دئلایلا آدین‌دا ایتجیزی‌می ایتیره‌ن‌ده دویدوم. اونو ماشین وورموش‌دو.
چوخ ایری گؤوده‌لی بیر ایت اولان دئلایلایا بو «ایتجیز» سؤزو هئچ یاراشمیردی، بو ایت گون اوزونو دوررینین یانین‌دا دولاناردی، دورری هارایا گئت‌سه او دا آرخاسینجا قاچار، آرادابیر سئوینیرمیش کیمی آتیلیب دوشر، بیردن ده یوللا کئچه‌ن آوتومیبیللرین آرخاسینجا قاچیب هورردی. دورری دئلایلانین اؤلومونه گؤره یاسا باتمامیش‌دی؛ اونون دئمیینه گؤره ایتینین بئله بیر سونلوقلا اؤلجیینی چوخ‌دان گؤزلییرمیش. آنجاق او ایندی دئلایلانی «ایتجیزیم» آدلان‌دیران‌دا میللیسئنت دوررینین اؤز ایتینه اولان سئوگی‌سینی ده، اونون اؤلومون‌دن کدرلندیینی ده، اونلاردان گیزلتدیینی دوشونمه‌یه باشلادی.
–گلین، اؤز بوشقابینیزا یئمک قویون، یوخ‌سا بیز ایندی هامیمیز آجین‌دان ییخلیب اؤلجییک،–موریئل میستئر ایسپیرسه دئدی.–سیز قوناقسینیز. گرک بیرینجی سیز باشلایاسینیز. بیردن یومورتانین ساری‌سی گؤزونوزه توند دی‌سه قورخمایین سیزی زهرلمز، بو تویوقلارین یئمینه گؤره بئله اولوب. سالات اوچون یئرکؤکونو اؤزوم دیدمیشه‌م، ائله اورکله دیدیردیم، جوشقونلوغوم‌دان بارماغی‌می دا دیدمه‌یه باشلامیشدیم، بیردن سالات‌دا قان گؤرسه‌نیز منیمکی اولدوغونو بیلسینیز. یاخشی‌سی سوسوم، یوخ‌سا میللیسئنت ایندی منی اؤلدورر.
میللیسئنت ایسه بیراز آجیقلا گولوب، چیمخیردی:
–دوز دئییل! او علینی دیدیب ائل‌مه‌ییب!
میستئر ایسپیرس دورری دانیشان‌دا اونون دئدیکلرینه چوخ دقتله قولاق آسیردی. اولا بیل‌سین، ائله بونا گؤره ده، موریئل اؤزونو بئله گؤزه چارپدیرماغا چالیشیردی. دوررینین داورانیشلاری یقین میستئر ایسپیرسه چوخ قئیری-عادی گؤرونور، میللیسئنت دوشونوردو،–او اؤنجه‌لر بئله بیر، علین‌ده توفنگله گزه‌ن، گؤردویونو گولله‌له‌یه‌ن، وحشی کانادالی قادینی هئچ یئرده گؤرمه‌ییب. گؤرونور، دوررینین دانیشدیقلارینا هم ده اونا گؤره قولاق کسیلیب، سونرادان اینگیلتره‌یه قایی‌دان‌دا بونلاری تانیشلارینا دانیشیب اونلاری ایله‌ن‌دیرمک ایستییر.
دورری یئمک یئیه‌ن‌ده سوسوردو، اؤزو ده چوخ یئییردی. میستئر ایسپیرس یئیه‌ن‌ده هر ایکی اوووردونو دولدوروردو، میللیسئنت بونو سئزیب گولوم‌سه‌دی، بو قوناق دئیه‌سه‌ن چوخ دا ائله دانیشماغی سئوه‌ن آدام دئییل‌دی. دانیشیغی قیزیش‌دیران کئشیش ایدی: او یئنیجه اوخودوغو «اورئقونا گئدن یول»۱ آدلی کیتاب‌دان سؤز آچمیش‌دی.
–نئجه آغیر، قورخولو بیر عؤمور سورورموشلر!–کئشیش دئدی.
میللیسئنت بو کیتابلا باغلی ائشیتدیینی دئدی:
–منیم اورئقون‌دا قانداشلاریم یاشاییر، آنجاق اورادا هان‌سی شهرده یاشادیقلارینی اونوتموشام آرتیق،–او دیلله‌ن‌دی.–گؤره‌سه‌ن اونلاردامی اورا بو یوللا گلیبلر؟
–بو یوللا گلیبلرسه، اوندا بو هاراداسا یوز ایل بون‌دان اؤنجه باش وئریب،–کئشیش دئدی.
–اوی، من بونون بئله چوخ‌دان اولدوغونو دوشونمزدیم،–میللیسئنت دئدی.–اونلارین سویادی راففئرتی اولمالی‌دیر.
–بیر تانیشیم واردی، اونو دا راففئرتی دئیه چاغیراردیلار، او گؤیرچین ساخلاییردی،–پورتئر گؤزلنیلمز بیر قیزغین‌لیقلا بو دانیشیغا قوشول‌دو.–بو لاپ چوخ‌دان اولوب، اوندا بو ایشه باش قوشانلار چوخ ایمیش. بو گؤیرچینلرله یاخشی پول دا قازانماق اولورموش. او بونو نئجه ائلدیکلرینی بیزه باشا سالمیش‌دی: گؤیرچینلرین بیر شیلتاقلاری وار، اونلار گؤیرچین دامینا بیرباشا اوچوب گیرمیرلر، اونا گؤره ده، یوخلاما اوچون قویولموش مفتیله توخونمادان یووالارینا گیردیکلرین‌دن بو گلیش قوشساخلایانلار آراسین‌داکی مرجلرده اودوش ساییلمازمیش. مرجی اودماق اوچون گرک گؤیرچین بیرباشا اوچوب داما گیرسین و یوخلاما مفتیلینه توخونوب کئچ‌سین. بو آدام گؤرون نئیله‌ییب: کورت یاتان گؤیرچینین آلتین‌داکی یومورتالاردان بیرینی گؤتوروب، ایچینی بوسبوتون بوشال‌داراق، اورا بؤجک بوراخیبمیش. بؤجک یومورتانین ایچین‌ده ائله سس-کوی سالیبمیش، گؤیرچین تئزلیکله یومورتادان بالا چیخاجاغینی گؤزله‌مه‌یه باشلاییبمیش.
سونرا گؤیرچینی باییرا چیخاریب بوراخان‌دا او گولله کیمی اوچوب قوش‌دامینا گیرمیش، یوخلاما اوچون قویولان مفتیله توخونموش‌دو. بئله‌لیکله ده راففئرتی اولدوقجا بؤیوک بیر پول قویولموش بو مرجی، اؤز دوستو ایله بیرگه، اودموش‌دو. بونلار او هله ایرلان‌دییادا یاشایان‌دا اولموش‌دو، همه‌ن او راففئرتینین بو مرج‌دن اوددوغو پوللار اونا کانادیادک گلیب چیخماغا دا یئتمیش‌دی.
میللیسئنت سؤز آچیلان آدامین راففئرتی اولدوغونا اینانمیردی، اونا ائله گلیردی، پورتئر دانیشیغا قوشولماق اوچون بو آدی اؤزون‌دن اویدوروب‌دور.
–دئمک، سیز ائوده توفنگ ساخلاییرسینیز؟–کئشیش دورری‌دن سوروش‌دو.–یوخ‌سا، آوارالاردان، اوغرولاردان چکینیرسینیز؟
دورری چنگل-بیچاغی بوشقابینا قویوب، آغزین‌داکی تیکه‌نی یاواشجا چئینه‌ییب اودان‌دان سونرا دیلله‌ن‌دی:
–ایشیمه یارادیغی اوچون ساخلاییرام.
بیراز سوسان‌دان سونرا او دیللنیب، اؤزونون گؤستبکلرله دووشانلاری نئجه اوولاماغین‌دان دانیشماغا باشلادی. ووردوغو گؤستبکلری او، شهرین او بیری باشین‌دا اولان سامور فئرماسینا آپاریب اونلارا ساتیرمیش. دووشانلارین ایسه دری‌سینی سویور، بو دریلری تاختا لؤوهه‌لرین اوستون‌ده تاریما چکیب قورودور، سونرا ایسه اوول‌لی شهرینه آپاریر، اورادا توریستلر بو دریلری اونون علین‌دن قاپیب آلیرلار. او اؤزو دووشان اتینین سویوتماسینی دا، قووورماسینی دا چوخ سئویر، آنجاق ووردوغو دووشانلارین اتینین چوخو آرتیق قالدیغین‌دان بونلارین ایچالاتینی تمیزله‌ییب، جمدکلرینی یوخسول عائله‌لره پایلاییر. چوخلاری دووشان اتینی یئمک ایسته‌مه‌ییب، اونون وئردیی پای‌دان بویون قاچیریرلار،–اونلارا ائله گلیر، دووشان اتی یئمک ایت یا دا پیشیک اتی یئمک کیمی بیر شئی‌دیر. آنجاق اونون بیلدیینه گؤره، چین‌ده ایت-پیشیک یئمک عادی بیر شئی ساییلیر.
–بونو دوز دئییرسینیز،–میستئر ایسپیرس دیلله‌ن‌دی.–من اونلارین ایکی‌سین‌دن ده یئمیشه‌م.
–ائله بیلیرم، سیز یاخشی بیلیرسینیز،–دورری اونون سؤزونه قوت وئردی.–بئله دوشونمک عقل‌سیزلیق‌دیر.
میستئر ایسپیرس دریلرله باغلی اوندان سوروشماغا باشلادی، اونلاری سویماق اوچون اوستالیق گرکدیینی دئدی؛ دورری اونونلا رازیلاشیب، بونون اوچون هم ده یاخشی بیچاغین دا اؤن‌م‌لی اولدوغونو بیلدیردی. دورری هوسله، بو ایشه باشلایان‌دا، سویولاجاق حیوانین گؤبیینی نئجه چرتمیی گؤسترمه‌یه چالیشیب، بونو هر آدامین باجارمادیغینی دا دئدی.
–اونداترا ایله بیر آز چتین‌دیر،–اونون خزی چوخ دیرلی ساییلیر، گرک سویان‌دا چوخ سلیقه‌لی داورانماغا چالیشاسان. اونلارین خزی چوخ سیخ اولدوغون‌دان سویو بوراخمیر.
–اونداترالاری سیز گولله ایله وورمورسونوز، ائل‌می؟
یوخ-یوخ، دورری آیدینلاشدیردی، اونلاری تله ایله توتورام. هه، اونلاری تله ایله توتماق دوزگون یول‌دور، میستئر ایسپیرس رازیلاش‌دی، دورری ایسه اؤزونون اوستون‌ده ایشله‌ییب تکمیللشدیردیی سئویم‌لی تله‌سین‌دن دانیشماغا باشلادی. دئمیینه گؤره، او ایستییرمیش بو تکمیللشمه ایله باغلی پاتئنت آلسین، آنجاق سونرا بو ایشه باش قوشماغی آرتیق سایمیش‌دی. دورری چایلارین داشماغا باشلادیغی چاغلاردان، یانیؤره‌نی سو باسان‌دا یارانان ساییبیلینمز ایرماقلارین آراسین‌دا بوتون گونو نئجه گزمیین‌دن سؤز آچدی، بو چاغلار قار اری‌سه ده آنجاق آغاجلار هله یارپاقلامیرلار؛ باخ اوندا اونداترانین خزی ان یاخشی اولور. میللیسئنت دوررینین اووچولوقلا باغلی ایشلرینی بیلیردی، آنجاق اونون بو یوللا چؤرکپولو قازاندیغینی ایندی ائشیدیردی. دوررییه قولاق آسدیقجا، گؤردویو بوتون بو ایشلرین اونون اوریینجه اولدوغو دویولوردو. گؤرورسه‌ن، ایلک میغمیغالار اوچوشماغا باشلاییر، سویوق سو چکمه‌لرینه دولور، بیردن قارشینا سودا بوغولموش سیچوووللار چیخیر، دورری اؤزونون اوو باشاگل‌دیلرینی دانیشماق‌دا داوام ائلییردی. میستئر ایسپیرس ایسه لاپ قوجا اووچو تازی‌سی کیمی قولاق آسیردی: اوتوروب، یارییومولو گؤزلری ایله باخیر، مورگولییر، ائله بیل، آنجاق تربییه‌سی اونون بورادا خورول‌دایاراق یاتماسینین قارشی‌سینی آلیردی. بودور، بیردن بورنونا تانیش ای دییبمیش کیمی گؤز قاپاقلارینی گئنیش آچیر، بورون پره‌لری قاباریر، او دانیشیلان اولایین گؤزل، هم ده قورخونج کئچه‌ن آنلارینی دویماغا باشلاییر. سونرا او دوررییه اوز توتوب، اونون بیر گون‌ده نئچه میل یول کئچدیینی، سویون نئچه مئتره کیمی قالخدیغینی، اونداترانین چکی‌سینین ان چوخو نه قدر اولدوغونو، تله ایله بیر گون‌ده اونلاردان ان آزی نئچه‌سینی توماق اولدوغونو، دووشان دری‌سینی سویماق اوچون اولان بیچاقلا اونلارین دا دری‌سینی سویماق اولوب-اولمادیغینی سوروشماغا باشلادی.
موریئل کئشیش‌دن سیقاترئت آلیب یاندیردی، بیر ایکی قوللاب ووراراق اونو، باوارییا سالاتی یئدیی بوشقابا باسیب سؤن‌دوردو.
روس دیلیندن ترجمه: آراز گوندوز
آردی وار..
بیرینجی بؤلومون سونو