سون گونلرده میلی حرکتده دوام ائدن تخریباتلاری قینایان بیر طومار چیخدی. میلی حرکتین بیر سیرا آغ ساققاللاری‌نین تشبثو ایله باشلادیلان بو مثبت ایشه بیز ده آراز نیوز اولاراق دستک وئررک طوماری یاییدیق و اینسانلاری ایمضالاماغا چاغیردیق.
اما قیسا مدت ایچینده بللی اولدو کی معلوم بیر جریان، آغ ساققاللارین باشلاتدیغی بو خئیر ایشی مصادره ائدیب اوز هدفلرینه آلت ائدیبلر.
بو معلوم جریان سادجه اؤزلرینه یاخین اولان انسانلاردان ایمضا آلیب و اونلارا منتقد اولانلارین ایمضالارینی حذف ائدیرلر.
بو تشبوثو مصادره ائدن معلوم جریان آچیقجا ایفاده ائتدی کی سادجه اؤز ایستدیکلریندن ایمضا آلاجاقلار و هدفلری «ضد میلی» اولانلاری حرکتدن آریندیرماق(حذف ائله مک)‌دیر.
عجبا! کیمین میلی، کیمین ضد میلی اولدوغونا قرار وئرمک صلاحیتینی کیم بونلارا وئریب و جمهوری اسلامی کیمی منتقدلری حذف ائدرک‌می میلی بیرلیک قوراجاقلار؟! البته بونون جوابینی بو شخصلر وئرمه‌لیدیر.
آیریجا ایمضالارین توپلانما طرزی و بیر گونده تصاعدی شکیلده یوزلرجه تانینمایان و بیلینمه‌ین آدین لیسته‌یه قویولماسی طومارین مشروعیتینه کؤلگه سالمیشدیر.
آراز نیوز اولاراق بیر داها بو ایشین اصلینی دستکله‌دیگیمیزی و آغ ساققاللاریمیزین یاخشی نیّت ایله بو ایشه اقدام ائله‌دیکلرینه ایناندیغیمیزی بیان ائدریک. فقط معلوم جریانین بو خئیرخواه ایشی مصادره ائدرک غیراخلاقی و حذفی ذهنیتله اصلی هدفیندن منحرف ائله‌دیگینی قیناییریق.
شبهه‌سیز بو طرز جمهوری اسلامی واری ایشلر میلی حرکتده بیرلیگه ندن اولماماقلا برابر وار اولان ایختلافلاری داها درین‌لشدیرر.
آراز نیوز یازارلار هیئتی
۲۲ شهریور ۱۳۹۶