نئچه واختدیر کی گوناز تی وی تیلویزییاسی یئنه ده کئچمیشده کی کیمی بیر سیرا سند سیز و بیر یؤنلو باخیشلارلا آزربایجانین میللی چالیشقان لارینی چیرپماغا باشلاییب دیر.
حال بو کی بو تیلویزییا کئچمیشده ائتدیگی یالنیش ایشلریندن بیر تجربه قازانمادان بو یانلیش یؤنتمی ایره لی سورمکله بیر یؤندن آزربایجانین میللی حرکتی ایچینده نئچه تیره لیک سالیب و دوشمانلاری سئویندیریر,بئله کی اَن آغیر ضربه نی اؤز ایچیمیزدن بیزه وورور , بیر یؤندن ده میلتیمیز و حرکت آراسیندا آیریلیق سالماغا ندن اولور,بئله کی خالق بو ایختیلافلاری گؤرن کیمی گوونی حرکته آزالاجاقدیر.
کئچمیشده ائله کی میللی چالیشقانلار بیلیرلر بو تیلویزییا هر بیر توپلومو کی بیرجه ذره گوج صاحیبی اولوب,چالیشماغا باشلامیشدی  و هر بیر چئشیدلی یول ایله وطن اوچون آددیم آتماق ایسته ییردی چیرپماغا باشلاییردی.بئله کی حتی احمد اوبالی تام سیاسی,میللی و اینسانی اخلاقدان اوزاق بیر ایشله دوستاقدا اولان دیرلی میللی چالیشقانلاریمیزا کی اؤزلرینی ساوونماغا هئچ بیر تریبونلاری یوخودور ساتقینلیق دامغاسی ایله محکوم ائتمیشدیر.آما بو یانلیش ایشلرینه باخمایاراق میللی آکتیویست لریمیز بؤیوک روحلا اؤز اؤزل یاشملارینی دا فدا ائدیب و حرکت ده اویمامازلیق یارانماسین دییه بو اخلاقسیز ایشلرین قارشیسیندا بیر تپکی گؤسترمه میشلر و تکجه دالدا تذکر وئرمه یی یئترلی بیلمیشلر.

آما گؤرونور کی گوناز تی وی و اونون باشیندا اولان احمد اوبالی جنابلاری بو تپکی گؤسترمه مه لری باشقا جور آنلاییب و بئله دوشونوبدور کی حرکتده تکجه اولان گوجدور و هر کیمسه نی قارشیسیندا گؤرورسه اونو هر بیر اخلاقدان اوزاق اولان ایشلرله یارقی لاماغا حاقلیدیر.

بو دؤنه ده اوبالی جنابلاری اؤز خیال لاریلا و آرخادا تام آیدین اولان پروقراملار اساسیندا بیر اوچ بوجاق چکیب و اونون هر بیر بوجاغینا اؤز دئدیگی کیمی بیر-بیرلری ایله باغلانتی لاری اولمایان اینسانلاری قویموش و اونلاری جنایتکار,حاکمیت آدامی,چته قارداشلاری و باشقا باشلیقلارلا تانیتدیریر.حال بو کی ایندییه دک هئچ بیر سند بو اوچ نفرین بیر-بیرلری ایله باغلی اولدوقلارینا سرگی له یه بیلمه ییب و هر بیر پروقرامدا سندلرین سرگی له مه یینه سؤز وئریب و بیر سیرا اینسان لارین گلیب شهادت وئرمک لریندن دانیشیر کی یئنه ده بو گونه دک بو دوروم سورونمک ده دیر,نه بیر سند اورتایا قویولوب و نه بیر اینسان گلیب شهادت وئریب!
بو گونده تام اخلاقسیز و بلیرلی اولان داورانیشلا حرکتین تشکیلات لارینی بیر-بیر لریله قارشی-قارشییا قویماق آماجی ایله پروقرامی ایره لی سورمکده ایدی.

دوغروسو سیز جه بو ایشلرله اوبالی دئمیشکن آزربایجان میللی حرکتی قازاناجاق می ؟ یا پرده آرخاسیندا باشقا ندن لر و قازانان لار واردیر ؟!؟!