آزربایجان میللی دیره نیش تشکیلاتی بوتون چتینلیکلره رغماً اون بیرینجی ایلینده (قیسا ویدئو)
۱۳۸۴ هجری شمسی تاریخینده قورولان آزربایجان میللی دیره نیش تشکیلاتی میللتلرین اؤز مقدراتینی تعیین ائتمه حاققی ایلکه سیندن یولا چیخاراق جمعی عملین اؤنملیلیغی اساسیندا تشکیلات بیچیمینده حرکت ائتمه یی ترجیح ائتمیشدیر. اون بیر ایل بیر چاتی آلتیندا مختلف چتینلیکلره رغماً هرهانسی بیر بؤلونمه یاشامادان گئجه گوندوزونو بیربیرینه قاتان تشکیلات اویه لری بیرآرادا چالیشمایی باشارمیشدیر.
ایران سیاسی کولتورو باشدا اولماق اوزره مختلف توپلومسال ندنلردن قایناقلانان ایرانداکی جمعی عمل قارشیتی پیسخولوژی نین اورتدیگی بوتون چتینلیکلره رغماً تشکیلات اساسیندا داها وئریملی چالیشابیله جه یی اینانجینی قورویاراق چئشیدلی سیاسی ائوره لرده سیاسی عملین تشکیلاتلا آنلام تاپا بیله جه یی دوشونجه سینی قوروموشدور.
آزربایجان میللی دیره نیش تشکیلاتی گئچمیش اون بیر ایلده مختلف شانتاژلار و اینصافسیزلیقلارا معروض قالمیش بیر طرفدن ایرانداکی مؤوجود سویچولوقلا مجادله ائدرکن باشقا طرفدن یالان بهتانلار و افترالار قارشیسیندا اییلمه میشدیر. دونیادا خبر ساحه سینین اؤنملی اولدوغونو وورقولایاراق مختلف خبر سایتلاری و گؤرسل چالیشمالارلا میللتین سسی اولماغی اومود ائده رک گونئی آزربایجان میللی حرکتینین سؤیلمینی توپلوم ایچینده یایقینلاشدیرماغا چالیشمیشدیر.
آزربایجان میللی دیره نیش تشکیلاتی گونئی آزربایجان میللی حرکتی نین قوتساللیغی و بؤیوکلویونه ایناناراق بو حرکتین هرهانسی بیر شخص، مرکز و تشکیلاتا منحصر قالابیلمه یه جه یی دوشنوجه سی ایله میللی حرکتین بیر پارچاسی کیمی اؤزونو گؤرموش و بوتون شخص و تشکیلاتلارین سایقی ایچینده تعاملدا اولماغینی ساوونموشدور. آزربایجان میللی دیره نیش تشکیلاتی بوتون شخص، تشکیلات و جریانلارین اؤز باخیشلارینی سایقی ایچینده ایله ری سورمه یی سیاسی توپلولوق و حرکتلرین ان دوغال حاققی بیلمیش گونئی آزربایجان توپلومو اوچون داها فایدالی اولاجاغینی دوشوندویو اؤز باخیشلارینی سؤیله مه یی آزربایجان میللی دیره نیش تشکیلاتی نین ان دوغال حاققی بیلمیشدیر.
بؤلگه نین دورومو و مؤوجود سیاسی قوشوللارینی دیققته آلاراق گونئی آزربایجان تورک توپلومونون اؤزگور بیر یاشاما یئتیشمه سی آرزوسویلا چالیشان تشکیلات اویه لری گونئی آزربایجان تورک توپلومونون اؤزگورلویونو ایلکه ائدن بوتون شخص، مرکز و جریانلارا اؤز سایقیسینی بیلدیره رک گونئی آزربایجان میللی حرکتی نین مختلف دؤنوش دؤنملرینی باشلیقلار شکلینده گؤسته رن یئنی قیسا ویدئوسونو تقدیم ائدیر.
