ندن «آزربایجان تورک میللتی»؟ – مجید جوادی
سون گونلرده اینتئرنئت دونیاسین‌دا یئنه ده «آزربایجان تورکلوگو» مو یوخسا «ایران تورکلوگو» دارتیشماسی دوام ائدیر.
شخصیم آدینا دانیشسام، بو موباحیثه اوزوجو بیر گرچگی اورتایا قویور و او دا بودور کی بو موباحیثه‌لردن آنلاشیلدیغی اوزره بیز حله میللتلشمیش اولمادیغیمیز کیمی، حله میللتلشمک یولون‌دا بیر آددیم ایلری بیر آددیم گئری گئدیریک و هانسی یانا گئدجگیمیزی ده بیلمیریک.
هرحالدا سئوک و یا سئومه یک دوروم بوندان عبارتدیر و بیز ده بو دورمدان بیر آن اؤنجه قورتولماغا و یولوموزو تاپماغا چالیشمالیییق. اونون اوچون ده یئرلی گؤردوم کی بیر آکتیویست اولاراق بو حاقداکی گؤروشلریمی پایلاشام.
من شخصاً «آزربایجان وطنی» و «تورک میللیتی»نه اینانیرام و اونا گؤره ده «آزربایجان تورک میللتی» قاورامینی دوغرو بولورام.
البته بو قونویا نئچه آچیدان باخماق اولار. من گونوموزون رئاللیقلاری آچیسیندان باخماغی ترجیح ائدیر‌م.
بوگون فارس-شیعه کیملیگی محورینده فورمالاشان بیر ایران اولوس-دؤولتی وار. باخمایاراق کی بو دؤولت تاریخاً داها چوخ تورک دؤولتی اولوب و تاریخی بایراغی اولان آسلان-گونش بئله تورکلره عایید اولوب آما بوگونون رئاللیغی اورتادا؛ ایران بیر فارس-شیعه اولوس-دؤولتی‌دیر. بو فارس-شیعه اولوس-دؤولتی و حتی اونون رئژیم ایچی و دیشی موخالیفت آخیملاری قویو و قاتی شکیلده تورک-عرب دوشمنی‌دیر و هانسیسا منطیقله اؤزللیکله ده تورک وارلیغینا تحمول ائتمک ایستمیر، چونکو ذاتاً وارلیق فلسفه‌سی تورک-عرب دوشمن‌لیگی اوزرینه قورولودور. بیز بوگونکو ایرانین ایچینده نوفوس اولاراق چوخونلوق اولماغیمیزا رغما مؤوجود اولوس-دؤولت ایچینده ان یاخشی احتیمال ایله بیر سیرا آزینلیق حاقلاری الده ائد‌رک یاشایابیلریک کی او دا زامانلا بیزیم یوخ اولماغیمیزا ندن اولار و آرتیق تاریخ اولاریق.
بو ندنله بیز تاریخ صحنه‌سینده قالماق ایستییریکسه میللتلشمک و اؤز موققدراتیمیزا حاکیم اولماق مجبوریتیندییک. بو سورج ایراندان آیریلاراق می اولمالی یوخسا یاپیسی دگیشمیش بیر ایران ایچینده می اولمالی، او آیریجا بیر موباحیثه قونوسودور.
رئاللیغا باخیلیرسا بیز میللت اولاجاق ایسک، کی اونون آدی تورک میللتی اولاجاقدیر، بیزه بیر وطن لازیمدیر. وطنی اولمایان بیر میللت اولسا اولسا عراق و سوریه تورکمنلری کیمی یاخود آمئریکانین قیزیل دریلی لری کیمی اولار. بئله بیر میللتین میللی حاکیمیته صاحب اولماسی آنجاق خیال اولابیلر. بیر تاریخ اوستادینین دئدیگی کیمی، میللت سو ایسه وطن بارداق‌دیر، بارداق اولمادان سویون شکلی اولماز و ده یئره جالانیب یوخ اولار.
منه گؤره بیز نه قدر میللتیمیزه اؤنم وئریریکسه او قدر ده وطنیمیزه اؤنم وئرمه لیییک، چونکو او وطن اولمادان میللت یوخ اولماغا محکوم‌دور.
دوشونوره‌م کی وطن سئوگی‌سی حاقین‌دا آنادولو تورکلریندن درس آلمالیییق، چونکو اونلار هر سؤزون باشیندا دئییرلر بیزیم آنادولودان باشقا وطنیمیز یوخدور و نه یین باهاسینا اولورسا اولسون اونو ساوونمالیییق.
بیزیم ده آزربایجاندان باشقا وطنیمیز یوخدور!
یالنیز بعضی اینسانلاریمیز دئییرلر کی آزربایجان بوتون ایران تورکلرینی قاپسامادیغی اوچون بیزیم وطنیمیز اولا بیلمز.
بو دوستلاریمیزی اولو اؤندر آتاتورکون بیر سؤزونه ایستیناد ائد‌رک جوابلاماق ایسته ییرم.
آتاتورکه دئییرلر کی «پاشام، چیزدیغینیز میثاقی میللی سینیرلارینین دیشیندا قالان تورکلرین حالی نه اولاجاق بس؟» اولو اؤندرین داهییانه جوابی ایسه بئله اولور: «بیز میثاقی میللی سینیرلاری ایچینده بیر تورک دؤولتی قورا بیلسک اونون دیشیندا قالان تورکلر ده بو دؤولتین سایه‌سینده یاشام شانسی تاپاجاقلار، یوخسا هامیمیز بیردن یوخ اولاجاغیق!»
بو داهییانه جواب او زامانین آنادولو تورکلری اوچون نه قدر گئچرلی ایدی ایسه بوگون ده بیزه او قدر گئچرلی‌دیر.
(گونئی) آزربایجان هارادیر؟ سوروسونا ایسه من بئله جواب وئریرم. «بوگونکو ایرانین قوزئی باتیسیندا تورکلرین یاشادیغی بیتیشیک تورپاقلارین هامیسی آزربایجاندیر».
بیر وطن مفهومو داشییان و بیر رئاللیق اولان «آزربایجان » آدینی بعضی تاریخین درینلیکلرینه قویلانان آدلارلا قیاسلایانلار، یاخود اونون یئرینه نه اولدوغو بللی اولمایان اویدورما آدلار اؤنر‌ن اینسانلار بیلینجلی بیر یانلیلقی ایچینددیرلر. بوگون اگر اون مینلر «یاشاسین آزربایجان» دیه باغیریرسا دئمک کی آزربایجان بیر رئاللیق‌دیر، وار، یاشاییر و بیر بیلینج یوکو داشیییر.
بیر رئاللیق اولان آزربایجانین سینیرلارینی دا تاریخه گؤمولن توزلو سطیرلر دئگیل، بیزیم استراتئژیک گوجوموز بلیرله‌یه‌جکدیر. زامانین‌دا زنگه زور آزربایجان ایدی، آما آرتیق دئگیل. دونه‌نه قدر کرکوک کوردیستان دئگیل ایدی آما بوگون دئفاکتو اولاراق کوردیستاندیر، صاباح دا رسما کوردیستان اولسا شاشیرماماق لازیم.
دوستلار گونئی آزربایجان بیر رئاللیق‌دیر و اونون سینیرلاری دا بیزیم گوجوموز قدر اولاجاق. دویغونو و رومانتیزمی بیر قدر بوراخین و بؤلگه‌ده دوام ائد‌ن گرچک مققدرات ساواشینا باخین.
اینانین کی اگر بیز گونئی آزربایجاندا تورک میللتی اولاراق وار اولابیلسک و گوجلو بیر یؤنتیم قورابیلسک قاشقای تورکلری ده خوراسان تورکلری ده بیزیم سایه‌میزده حایات‌دا قالابیله‌جکلر یوخسا هامیمیز بیردن تاریخ اولاجاغیق.
و تاریخ اولماق سورجیمیز ده سون درجه قانلی و آجی اولاجاق.
