دونن آخشام ( 92.7.3 ) تبریزدن خویا قاییداندا مرند، کؤشکسارای آراسیندا، یالقیز آغاج کندینین یاخینلیغیندا ماشینلاردان اولاشان بیر ایزدیحاما راستلاشدیق. آوتوبوس مینلرجه باشقا ماشین کیمی دایانماغا مجبور قالدی. دالدان گلن بوتون ماشنلار دا بیزیم کیمی؛ ایندی نه گئتمه یه یول وار ایدی نه قاییتماغا. اوزاقدان بیر دومان گؤرسه نیردی. بللی کی بیر شئی یانیر. آوتوبوسدا اولانلار عمومیتله بؤیوک بیر ماشین توققوشماسین دوشوندولر. آنجاق شوفئر کؤمکچیسی نئچه یوز مئتر ماشیندان آیریلیب قاباغا گئدیب قاییدانداندان سونرا کند اهالیسینین یولو باغلاماغینی خبر گتیردی. دئمه کند اهالیسی یولون خطرلی اولدوغو و تئز تئز قضالار اوز وئردییینه گؤره اعتراض بیلدیریردیلر و حقیقتا بیر حاقلی اعتراض. یانیلماسام 30 کیلومتره یاخین بیر ماشین ترافیکی یاراتماغی باشارا بیلمیشلر. ایکی طرفلی ترافیک چونکی یول بوتونلوکده ایکی باشا بیر یولدور.
تام ایکی ایل بوندان اؤنجه بو اعتراض یئریندن 20 کیلومتر خویا طرف یولون خطرلی اولدوغو عزیزلریمیز ایبراهیم جعفرزاده و عائیله سینین آرامیزدان کؤچمه سینه سبب اولموشدو. شاید کند اهالیسی بیلمه دن بو ایل دؤنومده او رحمتلیکلره بیر آنما تؤره نی توتوب و یولدان کئچن مینلرجه ماشینی دا بو تؤره نه قاتمیشدیلار.
ساعات یاریم اوردا ماشینین قالماسی آوتوبوسدا چئشیدلی باخیشلارلا قارشیلانیردی. زامانین آغیر کئچمه سی شوفئری حیرصلندیریردی. هردنده خوشا گلمه ین سؤزلر اوندان ائشیدیلیردی. عموم اورتا یاشلی و یاشلیلار سوسوب، هنگامه نی سسسیزجه ایزله ییردیلر.
بو دورومدان هامیدان چوخ سئوینه نی اؤزوم سانسایدیم دا، بیر ، ایکی یاشلی اوشاغین بو فورصتدن فایدالانیب آوتوبوسدا باشدان آخیرا قاچیب، اویناماغی و میسافیرلره بیر رئکلام کیمی باش قاتیجی اولدوغو، منی بو قراره گتیردی کی مندن ده بو دورومدان چوخ ممنون اولان وار.
آنجاق هر زاددان چوخ اذیت ائدیجی نئچه گنج اؤیرنجینین بو دوروما اولان اعتراضلاری ایدی. سانکی بتر گؤزله ینله ری وار. اؤزللیکله منیم یانیمدا اوتوران گنج هردن ائله بیشمه میش سؤزلر دئییردی کی اؤز اؤزومه دئییردیم: الهی ایلدیریم گؤندر جهالت پرده سین یاندیر…؛ بیلمیرم دونیادا چوخ شئی لر ترسه اولموش کیمیدیر. بئله دورومدا عموما گنجلر مدنی اعترضا قاتیلارلار. شاید کارل مارکس جنابلاری اوردا حضورلاری اولسایدی او جاوانی بورژوازی نوماینده سی آدلاندیراردی. بو اعتراضی تکجه کندلیله رین حاققی یوخ بلکه اونون دا حاققی اولماغا او گنجه جهد گؤسته رن من ائله ده اوغورا چاتا بیلمه دیم.
هر حالدا! یول همیشه کی کیمی آچیلدی. البته مرند فرماندالیغیندان ائله بیل بیری گلیب یول قیراغینذان بیر کؤرپو وورماغینا سؤز وئره رک، کندلی له ری یولو آچماغا راضی ائله میشدی. تبریز، مرند، خوی، ماکی، قاراعئینی، قارازیادین و او یاخینلیقدا اولان باشقا نئچه شهر و کند مسافرله ری یالقیزاغاجلیلارین اعتراضلارینی گؤردولر. اعتراض سسی تکجه یالقیز آغاجدا قالمادی و سس گرکلی اولان شخصله رین قولاغینا چاتدی. مینلرله او یولدا جانلارینی ایتیرن اینسانین سسی؛ و یالقیزآغاج او آخشام تام مدنی اولاراق اونوتدوغوموز حاقلاری بیزه خاطیرلاتدی؛ یاشاسین یالقیزآغاج

يازى سالار كورلو فيس بوك صايفاسيندان آلينميشدير