سعید متین پور حاققیندا” سن هم عسگر سن هم یازار”
سعید بی متین پورون حایات یولداشی بویوک عطیه خانیم طاهیری یه درین سایقیلاریملا…
ووجدان توتوقلولارینی تانیماق فیکیرلری ایله تانیش اولماق اونلارین ایستک لری ؛ قایغی لاری و توپلوما وئردیک لری مساژی اولدوغو کیمی ایلتمک اونلاری دوغرو تانیتماق اوچون چوخ اونملیدیر. و بو دوغرو تانیتیم؛ توپلومون ایده آللاری و ایستکلرینی یوکسلدیب و قورخولارینی سیندیرماقدابویوک پایی اولا بیلر.
بونون اوته سینده عئینی یولدا اولدوغوموز آما قات قات داها چوخ زحمت چکنلری تانیماق اوزوموزو یئتیشدیریب گئتدیگیمیز یولدا ساغلام آتدیم آتا بیلمکده چوخ ائتکیلیدیر.و هر شئی دن اونملی بو بیر وفا و شرف بورجودور اینانجلاریمیزا و بو اینانجلاری ان گوزل شکیلده یاشادان موباریزلریمیزه قارشی…
ایران دا تورکلرین اوغرادیغی آسیمیلاسیون سورجینده فارس بولگه لره یاخین؛ آذربایجانین سینیر بولگه لری ان چوخ فارسلاشدیرما باسقی‌لاریندا اولان بولگه لردیر. زنگان کیمی شهرلر بیر یان‌دان کولتورل اولاراق سینیر شهر اولدوق‌لاری اوچون بیر یان‌دان دا اوستان بولوملرینده آزربایجان آدی اوستلریندن گوتورولدوگو اوچون داها آغیر کیم‌لیک قایغی‌لاریلا ایچ ایچه اولوب‌لار. .مرکزه یاخین اولماق تورک کیم‌لیگینی آشاغالايیب و فارسلاشماغی اوستون گوسترمه گی توپلومدا یایقین حالا گتیرمک ایسته ین ایداره سیستمینین قایناغینا یاخین اولماق دئمک دیر.زنگان تورک توپلومونا مرکزدن گلن هر ضربه نی ایلک آلان بولگه لردن ساییلیر. زنگان آزربایجانا یونه لن باسقیلارين اونونده دایانان ان آغیر یارا‌لاری آلان قالخان کیمیدیر.
گونئی آذربایجانین زنگانیندا مدنی موجادیله وئرررک کیملیگیمیزی یوخ ائتمکه آند ایچمیش مرکزسیاست گوجونه قارشی تورکلویو قورویان آیدین لاریمیزین چالیشمالاری چوخ دیرلی و آغیر دیر.
زنگانین اویانیشیندا چابا گوسترن آیدین جسارت‌لی چالیشانلارین امگی قات قات آغیر دیر ؛ ندن کی زنگانین آرخاسیندا تورک کیم‌لیگی اولسا دا اونونلا بورون بورونا دایانان فارسیزاسیونون قایناغی اولان مرکزده اوتورانلار وار. گونئی آزربایجان تورک کیم‌لیگینی منیمسه ین اورگی‌نین جسارتینی ان گوزل بیچیمده زنگانین دوشونور اوغلو“سعید متین پور” لا گوستردی. قهرمان زنگان آیری سئچگی لیک لره قارشی آیاقلانان بیر” اوزونه دونوش آخینیندا” آذربایجانین آچیق سوزو و واز گئچیلمز”اوزو”اولدوغونو گوستردی …ایللرجه سومورگه جی گوجلری‌نین آذربایجانا ووردووغو یارا‌لار زنگاندا قاباردی…”سعید” ۸۰ ایللیک ؛اوستونلوکچو؛ آنتی آذربایجان- آنتی تورک گوجلرین سالدیریلارینا قارشی داغ کیمی دایانیب ووقارینی قورویان زنگانین اویانيش حماسه سی‌دیر…
اوستونلوکچو سیاستین گوجونون بیتدیگی یئردیر زنجان و سالدیرغان گوجلرین بو اوجا داغی آشا بيلمه دیکلرينین بلگه سیدير “سعید” …
زنگانین حماسه اوزودور “سعید” و منجه تئهران بونو چوخ ياخجی بیلدی… زنگان یاغیلره هئچ بیر زامان یول وئرمدی ووقاری اوجا‌دیر آشابیلمز بو داغی هر گلن…
“سعید” توپراغینی سینیریندا قورودو، چون بیلیردی بیر میللتین وارلیغینی تالانلاماغا گلن لر اونجه سینیردان باسارلار نئجه کی اوزو یازیر
(1)”بیر یئرده توپراغینا گوز تیکرلر و سن عسگر اولارسان بیر یئرده کولتورونو کیرلتمه گه قالخارلار و سن یازار اولارسان و سن هم عسگرسن و هم یازار”
سعید اوزونو هم بو توپراغین گوره و‌لی عسگری گوردو، هم کولتورونون قوروجوسو و بو وطن سئورلیگین ان درین و ان اینجه آنلامی‌دیر.
“سعید”ين اویکوسو زنگانین دردلریله باشلانيب بوغونتولارا هایقیراراق باشا گئتمه نین اویکوسودور.
اوز توپراغیندا سورگون یاشایان فارسلاشماق زوروندا اولان میللتی ایله باشلاندی “سعید”.
آذربایجان دا گئت گئده فارس دیلی‌نین یایقین دوروما گلمه سی اوندا دیل‌سیز اوشاق‌لارین دردینی بوگودوب بو درده چاره تاپماق دوشونجه سینی بسله ییرمیش نئجه کی بیر یئرده زنگانین دیلسیزله ین اوشاق‌لاری‌نین فارسجا اوخوماق زوروندا اولماق لارینین دردینی بئله یازیر
(2) “کند ده درس وئردیگیم سورج ده بوسونوجا چاتدیم کی کندین اوشاقلاری و گنج لری یئنی توپلومدا چالیشیب یاشاماق اوچون دیلسیزدیرلر”
سعیدین حماسه سی پارام پارجا بیر میللتین دیرنیش حماسه سی‌دیر زنگانی آزربایجان‌دان و تورکلوگوندن آییرماغا قالخان‌لارا هایقیردیغی هارای هارای من تورکم سسی‌دیر.
“بیز زنگان تورکلری ائله بیل هر تورک شهری‌نین اهالیسیندن داها آرتیق شهریمیزین آدین گتیرمه لی ییک یالنیز اوستانیمیزین اوستونده آذربایجان آدی اولماماق اوچون و لهجه میزده فعل لرین اکینی باشقا شکیلده سویله دیگیمیز اوچون آزربایجان خالقی‌نین بئینیند ه اونلاردان فرقله نیریک زنگانا یول‌لاری دوشمه ین لرین بعضی تورک اولدوغوموزو بیلمزلر”.
“ آذربایجانین وارلیغینی یوخ ائتمه گه قالخان گوجلره قارشی بونجا دویارلیلیغینی بو یازی‌لاریندا آنلاماق قولایدیر اوستوندن آذربایجان آدی سیلینمیش آذربایجانین آچیق گوزو زنگانین من تورکم هارایی دیر” سعید” . اونون میلتچی لیگی ده اینسانچیلیغیندان قایناقلانیر او اینسانین اوزگورلوگونه دریندن ایناندیغی اوچون میللتی اوچون ساواشماغی سئچیب دیر. او اوزگورلوگ اوچون ساواشماغی اینسانی “اینسان”ائتدیگینه ایناندیغی اوچون سئچیب دیر.
(3)”اگر داشناک ارمنی تهران دا باغیریر؛ آماجی تورکیه دییل که ایندی نه عوثمانلی وار نه خاندانلیغی؛ بیر گون ارمنی لرین یاشادیغی بو گون کوردلرین یئرلشدیگی وان گولو ده دییل بوراسی او من “تورکون” باشینا باغیریر بوگون ایران دا”.
سعید بیر میللتی ساوونوب دویارلی لیقلا سیاسی اویون‌لاری آنلایا‌بیلمه کده اورنک آلینماسی گرکن بیر دوشونوردور..
وطن سئوگی‌سینی توم اوزلم لری ایله اوز ایچینده بسله یی‌شی اوندان اولغون بیر ساواشچی یارادیب دیر..
“سعید” زنگانین آجی‌لارین‌دان باشلانیر و تاریخ بویو بیر یارا‌لی وطنجه بوگویور. قوزئی آزربایجانین توپ‌راق‌لاری‌نین ایشغا‌لی‌نین آجی‌سیلا گونئی آزربایجانین توپلومسال کولتورل ایستئماری‌نین قایغی‌سین بئله آنلا‌دیر
: (4)“اگر آرازین او تاییندا بیزیم توپراق بوتونلوگومور تهلیکه ده دیر آرازین بو یانیندا تورکون حیثیتی و کولتور بوتونلوگوموز تهلوکه ده دیر بیر بولومده بدن یاغمالانیر او بیر یئرده روح”.
منجه سعید بیزیم یاشادیغیمیز پارام پارجا قایغی‌لاری بوتونوایله آنلادا بیلن اولغون بیر وارلیق دیر… اونون دوشونجه یاپی‌سی‌نین زیروه سینی میللی حرکتین توتوق‌لولارینا گوره یازدیغی یازی‌لاردا دویدوم… یازی‌لاری‌نین یازدیغی سورجده توتوق‌لانان هر میللتچیمیزی آدیلا یازیب حاققینی ساوونوب و اونلاری ساوونماغی میللی گوره و بیلدیرن سعیدین اینسانینا اولدوغو سئوگی‌سینده دالدیم… هر توتوق‌لانان اویرنجی و میللی فعالین آرخاسیندا دورماغی یازی‌لارین دا وورغولاییب اوزونو و هامیمیزی سوروم‌لو گورور .
سعیدین بو یازی‌لاری ني عباس بی لیسانی‌نین توتوقلانماسینا گوره اوخویاندا گوز یاشلاریمدا بوغولدوم
(5)” …عباس لسانی آجلیق ائیلمینده دیرو بیز اونو یالنیز بوراخا بیلمریک بیزه احتیاجی یوخدور چونکو اونون سسی ایندیدن تاریخده سسله نمک ده دیرآما بیزیم الیمیزده داها بیر باهانا وار کی سوسقونلوغو سیندیریب و بیزی دائمی سوسقونلوغا چاغیرانلارین اومودون یوخ ائدک”
سعیدین سون‌سوز دویارلی لیغی اونون اینسان‌لارینا بسله دیگی سئوگی‌سی ومیللی سوروملولوق چاغريلاری توم بویوت لاريلا اولغونلاشمیش بیر ایناملی موباریز کیشیليگي نی اورتایا قویور… او وطنی‌نین قایغی‌سین چکن هر اینسانیمیزی میللی بیرلیگیمیزی داها گوجلندیرن بیر وارلیق اولاراق گورور… توتوق‌لانان‌لارا یازدیق‌لارینی اوخویاندا مین کره و بلکه میلیون کره بو سورونو چیزدیم بئینیمده کی .
سعید قارداش ایندی ده سن توتوق‌لوسان قلبین خسته‌لیگی معده ن آغری‌سی و حاق‌سیز آجی‌لارین خبرینی اوخویوروق بیز سنه نئیلیه بیلدیک…نئیلدیک؟؟؟
بون‌لاری بیر کیجیک باجی اوره گیله یازیرام ،
من توتوق‌لو اولمادیغین گونلر یازدیغین بو سوزلرینی گونلرجه اوخویوب اوزومو سورغولاییب گوز یاشلاریما بوغولموشام
” “بو تورکلوک سوزونو گوز اونونه آلیب اونو خالقا آنلاتالیم بو یولدا خالقین وئردیگی هزینه نی اوزونه و دونیایا آچیقلایالیم ندن ان آزی ۸ آدی اویرنیلمیش عائیله سی تانینمیش شهیدین قانین‌دان واز گئچمیشیک ندن گوستریلرده و شیکنجه آلتین‌دان یارا‌لی و انگل‌لی اولان‌لاری تانیتدیرمیریق ندن آی دا اونلار صحیفه یازان‌لار دوستاقداکی‌لارین آدینا بیر نئچه سطیر یازماییرلار”…”
سعید قارداش سنین اینسانینا بسلدیگین سئوگینله بیر میللت میللت اولماغی باشارا بیلر .
سید قارداش بو حرکت سنین سئوگین کيمی سئوگیلرله یاشایا بیلر یئریه بیلر و اوزگورلوگونه انگل اولان گوج لری يئنه بیلر …
سعید قارداش سن بیزیم یارينا دوغرو گئدن قوتسال ساواشیمیزین آچیق آلنی سان.
سن ۸۰ ایل سومورگه جیلیگین اوزگورلوک له سونلاندیغینين باشلانقیجیسان و بونو فاشیزم چوخ یاخجی آنلادی …
سن بیر کیشی دئییل، میلیون میليون کیمليگي تاپتالانميش اينسانین توتوقلانمیش اوزگورلویوسن ،
سن تکجه سن ديیلسن،
تک ديیلسن
بیر تک میللت سن فاشیزم زیندانیندا…
پا ورقی
1.در جايی خاکت را نشانه میروند و سربازت میسازند و در جایی فرهنگت را می الایانند و نویسنده میشوی و تو هم نویسنده ای و هم سرباز
2.
در دوران تدریس در روستا به این نتیجه رسیدم که کودکان و نوجوانان روستايی برای زندگی و کار در جامعه ی جدید بی زبان هستند
”
3.اگر ارمنی داشناک در تئهران فریاد میکشد نه بر سر ترکیه آست که دیگر نه عثمانی است و نه سلسله و نه در خاکی در کنار دریاچه ی وان که روزگاری ارمنی ها ساکن بودند و امروز کردها ساکن هستند که بر سر من تورک در ایران است
4.”اگر در آنسوی آراز تمامیت ارضی ما در خطر است در اینسو نیز تمامیت فرهنگ و حیثیت ترک در خطر است در قسمتی تن به یغما میرود و در جایی دیگر روح
…”.
5.
عباس لسانی در اعتصاب غذاست ونمیتوانیم در این حال رهایش کنیم نیازی به ما ندارد و از هم اکنون صدایش در تاریخ طنین انداز است اما ما را بهانه ای دیگر به دست داده که سکوت را بشکنیم و کسانی را که مارا به سکوت دائم میخوانند ناامید سازیم”.
مهسا مهدیلی
