مهر آیینین بیری مکتبلرین آچیلیش گونو هر بیر اویرنجینین اونودولماز گونللریندن بیریدیر. آنجاق بوگون گونئی آزربایجان تورک اوولادلارینا شیرینلیگی ایله برابر حوزون دولو نیسگیللی بیر گوندور. ۹۰ایلدن آرتیقدیرکی آشیری فارس میللیتچیلیگینیه دایالی بیر ذهنییت آسیمیلاسیون سیاستی اساسیندا ایراندا غیر فارس میللتلرین دیللرینی بوتون ساحه ده قاداغا ائدیب و اونلارین وارلیغینی تالان ائتمک اوچون بوتون گوجونو سفربر ائتمکده دیر.

پهلوی دونمیندن باشالانان آسیملاسیون سیاستینده آزربایجان تورکلری اوزل یئر آلیر. عیرقیچی ذهنیت ایستر کئچمیش رژیمده ایستر حاضیرکی ایران ایسلام جمهوریتی دونمینده، آزربایجان تورک میللتینین وارلیغینی یوخ ائتمک و تورک کیملیگینی دگیشدیریب یئنی قوندارما بیر کیملیک وئرمک اوچون دونیادا بنزری گورونمین غیراینسانی متودلار، ظولم، حیله -حوققا و ساختا تئوریلره ال آتیبدیر.

بو اوزون سورجده ایستعمارچی رژیم کیملیگیمیزین اساس فاکتورو اولان آنا دیلیمیزی قاداغا ائدرک چالیشیرکی بیزی اوز کیملیگینده اریدیب یوخ ائتسین. فارس عیرقیچیلیغی اوز غیراینسانی هدفینه ناییل اولماسا دا بیزه هر ساحه ده بویوک زیانلار وروب. دیلیمیزله برابر یئرآلتی و یئر اوستو وارلیغیمیزی تالان ائدیب و آنا وطنیمیر آزربایجانی یوخسول و گئریده قالمیش بیر بولگه یه چئویریب. آنجاق بو رژیم هرکسدن یاخشی بیلیر کی مین ایللر بویو دولتلر و امپراطورلوقلار قوروان بیر میللتی یوخ ائتمک بوقدرده ساده دئگیل. اونا گوره رژیم «یانیق یئر سیاستی» اساسیندا حاضیردا آزربایجان نین چئوره و دوغاسینی محو ائتمگه چالیشیر.

بوتون بو آجیناجاقلی گئرچکلری گوز اونونه آلاراق آزربایجان میلی حرکتی و بو بویوک چترین آلتیندا فعالیت ائدن سیاسی تشکیلاتلار و میلی فعاللار میلتمیزین موقددراتینی بلیرله مک و وطالعینی تعیین ائتمک اوچون آیاغا قالخیبلار . آرتیق هر بیر آزربایجان گنجی اوز وارلیغینا گونیر و اوز کیملیگینه فخر ائدیر. بوندان سونرا ایران رژیمی یاخشی باشا دوشمه لیدیرکی آزربایجانیلارین دینج و باریشجیل ایستکلرینه بویون اگیب و آرتیق بو ظولملره سون قویمالیدیر. اینترنت و اینفارماسیا زامانیندا اینسانلاری حیله و حوققا ایله یوندمک مموکون دئگیل. آرتیق اینسانلار دونیادا باش وئرنلری ان قیسا زاماندا اویرنیر.

بو ادعانی بولگه میزده باش وئرنلر ده تصدیقله ییر. عراق، سوریه و دیگر قونشو اولکه لرده باش وئرن جنایتلر و انسانی فاجعه لره دیققت ائتدیگیمیزده اورادا اساس عامیلردن بیری رژیملر طرفیندن اویغولانان آیری سئچکیلیک و تبعیضی گورمکده ییک. عراقدا شیعه دولتی سوننی لری دیشلایاراق و سوریه ده علوی آزینلیغی دیگر ائتنیک و مذهب منسوبلارینی حکومتدن اوزاخلاشدیرماسی دورومو ایندکی وضعیته چاتدیریب. البته کی بو آیری سئچکیلیک باشقا فورمادا ایراندادا وار و هر آن بولگه ده کی دوروم و اورادا یانان آتش ایرانادا سیچرایا بیلر. و البته کی آیری سئچکیلیکلری اورتادان قالدیراراق بئلنچی بیر فاجعه نین یاشانماسینی اونلمک ایران دوولتینین باشلیجا بیر وظیفه سیدیر و بو ایشی گورمز ایسه او زامان بوتون اولابیلجکلردن البته کی ایران ایسلام رژیمی مسئولدور.

حاقی یاشاماق لازیمدیر. آنا دیلینده تحصیل هر بیر اینسانین ان دوغال حاقدیر و کیمسه نین اونو بیر اینساندان آلماغا حاققی یوخدور.

آزربایجان میلی دیرنیش تشکیلاتی

۳۱ شهریور ۱۳۹۴