آذربايجان ميللي حركتي ايچره قادينچيليق- ماوي داغ‌قيزي
بو گونه قدر قادينچيليغا عاييد يازيلان يازيلاردا آذربايجان قادينچيليغي ايله ايلگيلي هئچ اينجله مه اولماييب، و ساده جه قادينچيليغي قبول ائديريك دييه، يازيبلار. بلكه ده بو حاقدا يازان فيكيرداشلاريميز ، قادين حاقلاري و قادينچيليق اوزره چاليشانلار و بو يولدا تجروبه صاحيبي اولماييبلار. بو يازي ني يازماقدا، يئنه ده قادينچيليغين گركلي لييين وورغولاييب ، قادينلارين ميللي حركته قاتيلماغين ايستمك نييتيم اولماييبدير.
آذربايجان ميللي حركتينده يئني باشلانان ، كؤرپه حركت كيمي ديرچلمه يه باشلايان قادينچيليق حركاتي و اونون بو گونكو جايگاهي، آماجلاري، گؤرولري ، اؤزلليكلريندن يازماق اوچون گئنيش مطالعه لر، تجروبه لر و آراشديرمالار گركير. اما بو يازيدا اؤتري اولاراق آذربايجان قادينچي حركاتينا باخيب، اونو دونيادا گئدن باشقا فمينيستي حركت لر له توتوشدورماق ايسته ييرم.
بو حاقدا يازماق گؤره وي بيرينجي نؤبه ده اؤنجول قادينچي چاليشقانلاريميزا عاييد دير ، اولسون كي بو يازي آذربايجان قادينچيليغينا عاييد قونولارين تارتيشيليب، آراشديريلماسينا بير باشلانيش كيمي اولوب، بو تئوريك تارتيشمالار و تحليل لر ايسه قادينچيليق حركتي نين گوجلنمه سي و دوغرو يولدا ايره لي لمه سيله سونوجلانسين.
دونيانين بير چوخ اؤلكه لرينده و دونيادا باش توتان بير چوخ ناسيوناليستي و انقلابي حركت لرده اولدوغو كيمي آذربايجان ميللي حركتينده ده قادينچيليق حركاتي يارانديقدان سونرا، اؤنجه اؤزونو مطرح ائديب، اثباتلاماغا چاليشيب دير. دئمك اولار ايندي ده بو اشاماني آشماقدادير و تاماميله بو مرحله دن كئچمه ييبدير. بير حالدا كي قادينلار صيرف حاقلي اولدوقلاريني اثباتلاما مجبورييتينده قالماسايديلار، انرژي لريني، قادينچيليغين داها چوخ يايقينلاشماسي، فورمالاشماسي و گوجلنمه سينه صرف ائديب، قادينلارين انكشاف و گليشمه‌لري اوچون توپلوما گركن دييشيكليكلري آراشديريب، سئزه‌بيلرلر.
حركت ده چاليشان قادينچي فعاللارين بير طرفدن ساي لارينين آز اولدوغو، باشقا طرفدن ايسه ، قارشي لاريندا اولان سنتي باخيشلار، كولتورل محدوديت لر، ارتجاعي دوشونجه لر و اركك اوستونلوك اساسيندا يارانميش قادينلارا اولان اولومسوز باخيشلار (بونلارميللي حركت ايچره نظرده آلينير و حاكميت طرفيندن اولان ، قانوني آيري سئچكيليك لر و باسقي لار سونرالار دانيشيلاجاق باشقا قونولاردان اولابيلر) اونلارين اساس گوج و انرژي لريني ، قادينچيليق اوزره چاليشماقدا حاقلي اولدوقلاريني اثباتلاماقدا و حاقلارينين تاپدالانماغيني باشقالارينا قبول ائتديرمه يه چاليشماقدا ، توكتديره بيلر.
آذربايجان قادينچي حركاتيني، دونيانين چئشيتلي بؤلگه لرينده ، همن بؤلگه نين توپلوموندا ياشايان قادين لارين ايستكلري ، كولتور ، محدوديت لر، قانونلار، سنت لر و … دن آسيلي اولاراق يارانان و يا هر هانكي ايدوئولوژي ايچره يئرلشديريليب، ايرلي له ين قادينچيليق حركت لري ايله توتوشدورماق ايسته سك، بونونلا ان چوخ اوخشارليغي اولان فمينستي حركت لر ، ناسيوناليستي حركت لر ايچره گئدن فمينيستي حركتلري دئمك اولار. بورادا بو حركتلري ناسيونال فمنيست و يا ميللتچي-قادينچي حركتلر كيمي قئيده آليريق.
ناسيونال فمنيستي (ميللتچي قادينچي) حركت لر دونيانين فرقلي اؤلكه لرينده با ش توتوب ، فرقلي سونوجلارا واريب. بو حركتلره باخاندا بلكه دئمك اولار 100% قادينلارين روللاري و قاتيليملاري ايله سونوجلانان حركت لر اولوبلار، اما بونلارين يوز فاييزينده قادينچيليق حركاتي ني گؤرمك اولمور يالنيز بو حركتلرين بير سيراسيندا ميللي و ناسيوناليستي حاقلاردان باشقا قادين حاقلارينادا يئر آيريليب، حركته قاتيلانلار قادين حاقلاري اوغروندا دا موباريزه آپاريبلار. حتي بو قيسم حركت لرين هاميسيندا دا قادينچيلار تام ايسته ديكلري سونوجلارا وارماييب، تام ايده آل دورومو يارادا بيلمه ييبلر. اؤرنك اولاراق 1960-اينجي ايللرده مكزيكالي لارا عاييد آزادليق حركاتي آمئريكادا ياراندي، “اكينچي ايشچيلر بيرليي” بو حركتي تمثيل ائدن اؤرگوت كيمي تانينيردي. مكزيكالي قادينلارين بو حركتده اؤنملي رول داشيديقلارينا باخماياراق، اركك اوستونلوك و جنسي ايري سئچكيليكلره اساساً ، قادين حاقلاريني تاماميله الده ائده بيلمه ديلر. مشروطه انقلابينا باخديقدا ايسه اوخشار دورومو گؤرمك اولار و … .
دونيا دا گئدن فمينيستي حركت لري آراشديرماقلا ، صيرف قادينچيليق اساسيندا يارانان حركت لرين ، قازانديقلاري اوغور ، قادينچي ميللتچي حركتلرين و يا باشقا ايدوئولوژي لرله برابر سورن قادينچيليق حركت لرينين قازانديقلاري اوغورلاردان ، داها گوجلو و گئنيش اولدوقلاري گؤرونور.
بونون هر هانسي توپلومدان و شراييط دن آسيلي اولاراق ، بير سيرا اؤزل ندن لري اولا بيلر. اما گئنل ليكده ايكي اؤنملي ندني سيرالاماق اولار.
1. صيرف قادينچيليق اساسيندا اولان حركت لره قاتيلانلار بوتون گوج، انرژي، واخت و امكانلاريني بونا آييريب، اساس رسالت لري قادين حاقلاري اوزره چاليشماق اولوبدور. بيرحالدا كي ميثال اوچون ميللتچي –قادينچي حركت لره قاتيلانلار ، اوزلليكله قادينلار قادين حاقلاري ايله ياناشي ميللي حاقلاري اوغروندادا چاليشمالي اولورلار، بو ايسه اونلارين گوج، انرژي، واخت و امكانلاريني ايكي يئره بؤلور.
2. عموميت ده بير چوخ ميللتچيليك حركتلري (ناسيوناليستي حركت لر) باش وئرن اؤلكه لر ، مستعمره، گئري قالميش و اوچونجو دونيا اؤلكه لري اولوبلار. بو مساله ايكي آچيدان قادينچيليغي ائتگي له يه بيلير. بيرينجي بو توپلوملاردا اولان كولتور و قادينلارا اولان باخيش دير. گئنلليكده بو توپلوم لاردا قادينلارا اولان باخيشلارين اولومسوز اولماغي، قادينلارين سياسال، توپلومسال و اكونوميك ساحه لرده ايشتيراك و اينكيشافلارينا لازيمي زمين ياراتمير. او اوزدن سياسي، اجتماعي، انقلابي حركت لر يارانيرسا ، قادينلارين ايشتراكي آزاليب، قادينچيليق و قادين حاقلارينين پايي بو حركت لرده آز دوشور. ايكينجي آچيدان بئله دئمك اولور كي بو حركتلرده ايشتيراك ائدن قادينلار همن توپلوم لاردا اركك اوستونلوك اساسيندا ايللر بويو كؤك سالان كولتوردن ائتگي لنه رك ، اؤز حاقلاري ايله تانيش اولماديقلاري و يا تانيشليقلارينين آز اولدوغو اوچون ميللتچيليك حركتلرينده ميللي حاقلاري جنسي حاقلاردان اوستون توتوب داها چوخ اونون اوغروندا چاليشيرلار. و بو حركتلر قادينلارين قاتيلماقلارينا حركت ايچره يئر آييرا بيلسه لرده، قادينچيليغي و قادين حاقلاريني قاورايا بيلمه ييب، سونوج آلديقدان سونرا قادينچيليق ساحه سينده گليشمه ييب، يئنه ده توپلومدا قادينلاري ايكينجي سويه ده گؤرورلر.
سيرالاديغيميز ندن لرين هر ايكيسي آذربايجان ميللي حركتينده يانسيديلير. آنجاق بوردا بير سيرا سواللار يارانير؛ بئله ديرسه آذربايجان دا گئدن قادينچيليق حركاتي نين سونو نه اولاجاق؟ كئچميش و باشقا حركت لرين بير چوخوسوندا آلينان نتيجه نين آذربايجان ميللي حركتينده تكرار اولونماماسينا دائير نه ائتمك لازيم؟ بو حركت ايچره گئدن قادينچيليق حركاتيني دئدييميز حركت لردن فرقلنديرن ائتكنلر(عاميللر) وارمي؟
بيرينجي ندنه گلديكده آذربايجان ميللتچي قادينچي سي ، ميللي حاقلاريلا قادين حاقلاريني عئيني درجه ده اؤنمسه ييب، بو حاقلارين هئچ بيريني باشقاسيندان اوستون توتمامالي دير. آنجاق ميللي حركت ايچره چاليشان ارككلر قادينچيليغي داها چوخ منيمسه ييب، بو يولدا قادينچي فعاللارا يارديمجي اولماقلا، بو سورونون چؤزولمه سينه سبب اولابيلرلر.
ايكينجي ندنني ائتكيله‌ين و بو گونكو آذربايجان قادينچيليق حركاتيني باشقا و كئچميش حركتلردن فرقلنديرن ائتكن، دونيا گئديشاتي و دونيا سوييه‌سينده، اؤزلليكله باتي دونياسيندا اؤزونه يئر آچميش فمنيستي حركت لردير. بونلار آذربايجان قادينچي حركاتيندا بير كاتاليزور كيمي تاثير بوراخير. بو گون عموميت ده انسان حاقلاري و اؤزلليكله قادين حاقلاري و دئموكراسي قوراللارينين دونيا سوپرگوجلري وريندن دستكلنمه سي ، حاكميت لري و اؤلكه لري بو حاقلارا ديه‌ر وئرمه يه دوغرو سوق ائتديرير. باشقا يؤندن آذربايجان قادينچيسي كئچميش و باشقا حركت لردن تجروبه قازاناراق، كوتله و ميللتچيلر ايچره قادينچيليق ايستكلريني گوجلو شكيلده و ايستكلريندن گئري چكيلمه دن موباريزه آپاريب، ايره‌لي‌لمه‌يي بيرينجي اولويت سانير. آذربايجان قادينچيسي پيلانلاريندا آذربايجان قادينيني بوگونكو دورومون آراشديريب، گلجك اوچون ايده‌آل توپلومو تعريف ائديب، بو استقامتده چاليشمالي‌دير.
ميللي حركت ايسه سؤزده قادين حاقلاري و قادينچيليغين گركلي اولدوغونو يوخ، اولوسلار آراسي قادين حقوق مدافيعه كنوانسيونلاريندا قبول اولونان حاقلارا اينانيب ، بونون اوغروندا چاليشماغي گؤر‌ه‌و سانماليدير.
ميللي حركت فعاللاري بئله دوشونمكله كي قادين حاقلاري گلجكده اؤدنه‌جك، و بو گون بونا چاليشماق گركلي دئييل، كال و گئري قالميش دوشونجه ني سرگيله‌ييرلر.
بوتور دوشونجه لري آرادان قالديريب، اونون يئرينه آذربايجان توپلومو ايله ايلگيلي و آذربايجان قادينين دورومو ايله اويغون بير قادينچيليغين تمل داشين قويماق، آذربايجان قادينچيسي نين اؤنملي گؤرولريندندير. بو گون آذربايجاندا كوتله ايچره ميللي حاقلاريلا ياناشي ، قادين حاقلاري اوزره‌ده اويانيش آپارماق گركير و قادينچيليق حركاتي ميللي حركت ايچره يوخاري سوييه لي و اؤنملي يئر تاپمالي دير.
ياخين گلجكده آذربايجان قادينچي حركاتي نين فورمالاشميش و سيستماتيك شكيلده ايرلي له‌ييب، اؤزونه عاييد چيزگي‌لر جيزيب، يئني و موشخص تعريفلر وئريلمه‌سي گؤزله‌نيلير.
