٨ مارت “ایشچى قادینلار گونو” و یا ” قادینلار گونو” آدى ایله تانینان اصلینده بیرلشمیش میللتلر طرفیندن بو گون “قادین حاقلارى و اولوسلار آراسى باریش گونو”اولاراق تانیملانیب.

آزربایجان اینسانى بوگون ایراندا ایکینجى درجه لى وطنداش سایئلیر و بیر چوخ بدوى حقوقوندان یوخسوندورلار. عیرقیچى ایران – فارس شریعت رژیمى استیبدادى آلتیندا یاشایان تورک توپلومو آیرى سئچکیلیک، ایستیسمار، ایستعمارا معروض قالاراق مادى و معنوى نعمتلردن محروم قالیب و گئرچک آنلامى ایله بیر کوله یاشامینا محکوم اولوبلار.
تورک قادینلارى ایسه ایکیلى عیرقیچى شریعت یونتیمى و توپلوم ظولمونه معروض قالیبلار.اونلار تورکلوکله بیرگه قادینلیق سوچو ایله یاشاماقدادیرلار.
بو دورومدان قورتارماق اوچون البته کى ایراده، ایستک، اعتیراض و موباریزه ائتمک لازیمدیر و بونودا قادینلار باشلاتمالیدیر.آزربایجان کولتورو و توپلوموندا قادینلار بویوک حورمت و یئره صاحیبلر و بیر چوخ زامان ارکک ایگیدلرله بیرلیکده خاتون ایگیدلر یان یانا دویوشوب و موباریزه میدانلاریندا دوشمنلرله ساواشیبلار کوراوغلو ایله نیگار، قاچاق نبى ایله هجر ستارخانلا زینب پاشا و… دوشمنلره قارشى ایگیدجه ساواشیبلار.
قید ائتمک لازیمدیرکى ایران آدلانان جوغرافیدا ایلک قادین حاقلارینى رسمیته تانینان ١٣٢۴-ده “آزربایجان میلى حوکومتى” اولوب.
آزربایجان میلى حرکتى قادین -ارکک ائشیتلگینه اینانیر و هر هانکى بیر جنسیتیندن آسیلى اولمایاراق بوتون آزربایجان اینسانین حقوقونو مدافعه ائتمگى ساوونوماغى اوزونه میلى بورج و گورو بیلیر.
٨ مارت دونیالیق “قادین حاقلارى و اولوسلار آراسى باریش گونونو” باشدا تورک قادینلارى اولماقلا بوتون دونیا قادینلارینا تبریک ائدریم.

آزربایجان میللی دیره نیش تشکیلاتی سؤزجوسو