میللی فعال عباس لسانی محکمه‌یه چاغیریلدی
آزربایجان میللی حرکتی‌نین آدلیم فعاللاریندان اولان جناب عباس بی لیسانی ، اردبیل اینقیلاب محکمه‌سی‌نین بیرینجی شؤعبه‌سینه چاغیریلیب. ساوالان پورت-ون بیلگی‌لرینه گؤره، سه‌شنبه(آراگونو-۸مهر) سپتامبرین ۳۰دا اردبیل‌ین اینقیلاب محکمه‌سی طرفیندن عباس لسانی‌یه احضاریه گونده‌ریلیب. بو احضاریه‌ده، میللی فعالین ۹/۱۰/۱۳۹۳ تاریخینده بو محکمه‌ده حاضیر اولماسی ایسته‌نیلیب.
آرتیراق کی، میللی فعالین محکمه‌یه چاغیریلماسی ۱۳۹۰ اینجی ایلینده اورمو گؤلونون قورودولماسینا گئدن کوتلوی اعتراضلارلا ایلگی‌لیدیر.
جناب عباس بی لسانی‌نین اورموگؤلو ایله باغلی بو دوسیاسی قونوسوندا سون قورولان محکمه، میللی فعالین اعتراضی ایلا اوزلشیر و محکمه حؤکوم وئرمه‌دن باشقا بیر زاماندا قورولماسینا قرار وئریلیر.سون زاماندا قورولموش محکمه‌ده آزربایجان میللی فعالی، عباس بی لسانی ایران ایسلام جومهوریتی‌نین یاسالارینا دایاناراق محکمه‌نین یئتکیلی و آچیق (علنی) اولمادیغینی ایره‌لی سورموش و اؤزوندن مودافیعه ائتمکدن ایمتیناع ائتمیشدی.
عباس لسانی دفعه‌لرجه ایران‌ین گوونلیک گوجلری طرفیندن توتوقلانمیش و حبس ائدیلمیشدیر. اولوسلارآراسی عفو اؤرگوتو بو میللی-مدنی فعال‌دان حیمایه ائتمه دوغرولتوسوندا بیلدیریش وئرمیشدیر.
